ފަލަސްޠީނުގެ ހުޅަނގު އައްސޭރީގައި ހުންނަ އަޤްބަތް ޖަބަރް ކިޔާ ރެފިޔުޖީ ކޭމްޕަކަށް، އިޒްރާއިލްގެ ސިފައިން ވަދެ ގަނެ 13 މީހަކު ޒަހަމް ކޮށްލައިފިއެވެ.

ފަލަސްޠީނުގެ ހެލްތް މިނިސްޓްރީ އިން ވިދާޅުވެފައިވަނީ އަޤްބަތް ޖަބްރް ރެފިޔުޖީ ކޭމްޕަށް މިސައިލާއި ބަޑި އަދި ކަރުނަ ގޭހުން ދިން ހަމަލާތަކުގައި 13 މީހަކު ޒަހަމް ވެފައިވާ ކަމަށެވެ. އަދި އޭގެ ތެރެއިން 2 މީހަކު ވަރަށް ބޮޑަށް ޒަހަމްވެ އެދެމީހުންގެ ހާލަތު ވަރަށް ގޯސް ކަމަށް ވެސް ވިދާޅުވެފައިވެއެވެ.

އިޒްރާއިލްގެ ސިފައިން މި ހަމަލާ ދިނުމުގައި ބޭނުން ކޮށްފައިވަނީ އެންޓި ޓޭންކް ގައިޑެޑް މިސައިލް ކަމަށް އިޒްރާއިލުން ވަނީ ބުނެފައެވެ.

ހަމަލާގައި ޒަހަމްވީ މީހުންނަށް ފަރުވާ ދިނުމަށް ދިޔަ ފަލަސްޠީނުގެ ރެޑް ކްރެސެންޓަށް އިޒްރާއިލުގެ ސިފައިން ހުރަސް އެޅި ކަމަށް ރެޑް ކްރަސެންޓުން ބުނެފައިވެއެވެ. އަދި އެމީހުންނަށް އެތަނަށް ވަނުމުގެ ފުރުސަތު ދީފައިވަނީ އިޒްރާއިލުން ހިންގި އޮޕަރޭޝަން ނިންމުމަށް ފަހުގައި ކަމަށެ ވެސް ބުނެފައިވެއެވެ.

ރާމައްﷲގެ ހުޅަނގު އައްސޭރީގައި ހުރި އަލްޖަޒީރާގެ ނޫސްވެރިޔާ ރިޕޯޓް ކޮށްފައިވަނީ ފަސް ގަޑިއިރަށް ދެމިގެން ދިޔަ މި ހަމަލާތަކަކީ މި ފާއިތުވި ހޮނިހިރު ދުވަހު ޖެނީން ސިޓީ ގައި ފެށުނު ހަމަލާތަކުގެ  ރައްދެއް ކަމަށެވެ. 

"37،000 މީހުން ދިރިއުޅޭ ޖެރިކޯ ސިޓީ، އިޒްރާއިލްގެ މިލިޓަރީ އިން ވަނީ ބަންދުކޮށްފައި، ހަމަލާ ދިން މީހުން ހޯދުމަށް އިޒްރާއިލްގެ ފޯސްތަކުން ހަފްތާއެއް ވަންދެން ވަނީ އޮޕަރޭޝަން ހިންގައިފައި،  އިޒްރާއިލްގެ ސިފައިން ވަނީ 10 މީހަކު ހައްޔަރުކޮށްފައި، ޤަބޫލު ކުރެވޭ ގޮތުގައި އެއީ އެހަމަލާ ތައްދިނުމުގައި ހަރަކާތްތެރިވި މީހުން" އަލްޖަޒީރާގެ ރިޕޯޓަރު ބަރނެޑް ސްމިތް ބުނެފައިވެއެވެ.

މީގެ ހަފްތާ އެއްހާ ދުވަސް ކުރިން ޖެނީން ރެފިޔުޖީ ކޭމްޕަގައި ބަލާ ފާސްކުރުމުގެ ނަމުގައި ވަދެ ގަނެ ފަލަސްޠީނުގެ 9 މީހަކު ޝަހީދު ކޮށްލައިފައިވެއެވެ. މި އަހަރުގެ މިހާތަނަށް ފަލަސްޠީނުގެ 36 މީހަކު ޝަހީދުކޮށްލައިފައިވެއެވެ.