ރާއްޖޭގެ ވެރިކަން ކުރާ ރަށް ފުރަމާލެއާއި ގުޅާލަން ނިންމާފައިވާ ތިލަފުށިން ނުއަގުގައި 3 ބިން ބޭރުގެ ފަރާތްތަކަށް ވިއްކާލާފައިވާކަމަށް މަޖިލީހުގެ މާވަށު ދާއިރާގެ މެމްބަރު އަދި އިދިކޮޅު އިއްތިހާދުގައި ހިމެނޭ ޕީއެންސީގެ ނައިބުރައީސް މުހައްމަދު ސައީދު ވިދާޅުވެއްޖެ އެވެ.
ސައީދު މިފަދައިން ވިދާޅުވެފައިވަނީ ތިލަފުށިން ބިން ވިއްކުމާއި ގުޅޭގޮތުން ނުރުހުން ފާޅުކުރައްވާ ކުރެއްވި ޓްވީޓެއްގަ އެވެ.
ސައީދު ވިދާޅުވީ އެޗްޑީސީން ތިލަފުށީގެ ބިން ވިއްކަން ހުޅުވައިލުމާއެކު ބޭރުގެ ތިން ކުންފުންޏަކަށް ބިން ވިއްކަން ނިންމާފައިވާކަމަށެވެ.
ތިލަފުށިން ނުއަގުގައި ބިން ވިއްކުން ސައީދު ސިފަކުރެއްވީ ދިވެހި ވިޔަފާރިވެރިންގެ ކުރިމަގު ނުއަގުގައި ވިއްކާލުންފަދަ ކަމެއްގެ ގޮތުގައެވެ. އެއާއެކު އޭނާ ވަނީ އެއީ ސަރުކާރުން ކުރާ ބޮޑު ވައްކަމެއްކަމަށް ވިދާޅުވެފަ އެވެ.
އިދިކޮޅު ކޯލިޝަނުން ހޮނިހިރު ދުވަހުގެރޭ އާޓިފިޝަލް ބީޗުގައި ބޭއްވި ޖަލްސާގައިވެސް ސައީދު ވަނީ ބޭރުގެ ފަރާތްތަކަށް ތިލަފުށިން ބިން ވިއްކާތީ ނުރުހުން ފާޅުކޮށްފަ އެވެ.
"ތިލަފުއްޓަކީ މާލޭގެ ބައެއް. ތިލަމާލެ ބުރިޖު އަދި އެޅޭނެ ދުވަހެއް ނޭނގޭ، އެ ބުރިޖުވެސް އެޅިދާނެތީ އޭގެ ކުރިން 1700 ރުފިޔާއަށް އަކަފޫޓެއްގެ މަގުން ބޭރު މީހުންނަށް އެޔޮއް ވިއްކާލަނީ ތިލަފުށީގެ ބިން. ދުއްޕާނަކަށް ނުވޭތޯ؟"
ޕީއެންސީގެ ނައިބުރައީސް ސައީދު
ކުރީގެ އިކޮނޮމިކް މިނިސްޓަރުކަންވެސް ކުރައްވާފައިވާ ސައީދު ވިދާޅުވީ މީގެ ކުރިން ރައީސް ޔާމީންގެ ދައުރުގައި ރަށްތައް ވިއްކާފައިވާކަމަށް ބޮޑެތި ތުހުމަތުތަކެއް ކޮށް ރާއްޖޭގައި އިއުލާނުކުރި ބޮޑެތި ޕްރޮޖެކްޓުތައް ހުއްޓުވާލި މީހުން މިއަދު މާލޭގެ (ތިލަފުށިން) ބޮޑެތި ބިންތައް ނުއަގުގައި ވިއްކަމުންދާ ކަމަށެވެ.
މިއީ ރައްޔިތުން ނިކުމެ ހުއްޓުވަން ޖެހޭ ކަމެއްކަމަށް ސައީދު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
