ޓެކްސް ބިލަށް ވޯޓު ދިނުމުގައި ޕާޓީގެ ވިޕްލައިނާއި ޚިލާފްވި ކަމަށް ބުނެ މެދު ހެންވޭރު ދާއިރާގެ މެމްބަރު ޢަލީ ޢާޒިމަށް ނަސޭހަތްތެރިވެ ސިޓީ އެއް ފޮނުވައިފިއެވެ.  

އެމްޑީޕީ އިން ފޮނުވައިފައިވާ ސިޓީ އާއި އެކު ޢާޒިމް ކޮށްފައިވާ ޓުވީޓެއްގައި ބުނެފައިވަނީ ރައްޔިތުން އަތުން ނަގާ ޓެކްސް ބޮޑު ކުރަން ވޯޓު ނުދިނުމުން ކުރީ ކުށެއްކަމަށް ބުނެ ފިޔަވަޅު އަޅައިފިކަމަށެވެ. އަދި ސިޓީ ލިބުނީ މިއަދު ކަމަށާއި ސޮއި ކޮށްފައިވަނީ 2022 ނޮވެމްބަރ 16 ކަމަށެވެ.

އެމްޑީޕީ ޕާލިމެންޓްރީ ގްރޫޕްގެ ލީޑަރ މުހައްމަދު އަސްލަމް ސޮއިކުރައްވައި ފޮނުވައިފައިވާ ސިޓީގައި ބުނެފައިވަނީ މުދަލާއި ޚިދްމަތުގެ އަގުން ޓެކްސް ނެގުމުގެ ޤާނޫނަށް އިސްލާޙް ގެނައުމުގެ ބިލަށް ގޮތް ނިންމުމަށް 18 އޮކްޓޯބަރ 2022 ގައި ޕާޓީ އިން ވިޕްލައިނެއް ނެރެފައިވާނެ ކަމަށެވެ.  

Advertisement

އަދި 16 ނޮވެމްބަރ 2022 ވަނަ ވީ ދުވަހު ރައްޔިތުންގެ މަޖިލީހުގައި އެބިލަށް ނެގުނު ވޯޓުގައި ޢާޒިމް ވިޕްލައިނާއި ޚިލާފުވެފައިވާކަމަށެވެ. އަދި ޕާޓީގެ ޤަވާއިދުގައި އޮންނަ ގޮތުން ޕާޓީއިން ތްރީލައިން ވިޕެއް ކަނޑައަޅައިފިނަމަ ޕާލިމެންޓްރީ ގްރޫޕްގެ ކޮންމެ މެމްބަރެއް މަޖިލީހަށް ހާޒިރުވުމާއި ކަނޑައެޅިފައިވާ ވިޕްލައިނާއި އެއްގޮތަށް ވޯޓު ދިނުން ލާޒިމްވާ ކަމަށެވެ. ލީޑަރޝިޕަށް ޤަބޫލްކުރެވޭ ފަދަ ސީރިއަސް ހާލަތެއް މެދުވެރިވެގެން ކުރިން ހުއްދައަށް އެދުމަކާއި ނުލައި ތްރީލައިން ވިޕަށް ޢަމަލުކުރުމަށް މަޖިލިހަށް ހާޒިރުނުވުމާއި ވޯޓުގައި ބައިވެރިނުވުމަކީ ކުށެއް ކަމަށް އެސިޓީގައި ބުނެފައިވެއެވެ.

ސިޓީގައި މެމްބަރ ޢަލީ ޢާޒިމަށް ނަސޭހަތް ތެރިވެފައިވަނީ ޕާޓީގެ ޕާލިމެންޓްރީ ގްރޫޕުން ނެރޭ ވިޕްލައިނާއި އެއްގޮތަށް ޢަމަލުކުރުމަށެވެ.