ޕީޕީއެމްގެ ރިޔާސީ ކެންޑިޑޭޓު ރައީސް ޔާމީން އަބްދުލްގައްޔޫމު މިނިވަންކުރުމަށް ގޮވާލާ އިދިކޮޅުން މާލޭގައި ކުރަމުންދާ މުޒާހަރާ ކަވަރުކުރަމުން ދިޔަ ދެ ނޫސްވެރިންނަށް ބޮޑެތި އަނިޔާތަކެއް ލިބިއްޖެ އެވެ. 

މިއަދުގެ މުޒާހަރާއަށް ފުލުހުން ވަނީ ވަރަށް ބޮޑަށް ހުރަސްއަޅާފަ އެވެ. އަދި މުޒާހަރާ ރޫޅާލުމަށް ފުލުހުން ގެންދަނީ ހާލަތާއި ނުބައްދަލު ބާރުގެ ބޭނުން ކުރަމުންނެވެ. 

މުޒާހަރާ ރޫޅާލުމަށް ފުލުހުން ވަނީ ބައިވެރިންގެ ގަޔަށް ޕެޕާ ސްޕްރޭވެސް ޖަހާފައެވެ. ޕެޕާ ސްޕްރޭ ޖެހީ އިންޒާރަކާއި ނުލާކަމަށާއި، އެ ވަގުތު މުޒާހަރާ ކަވަރުކުރަމުން ދިޔަ ނޫސްވެރިންގެ ގަޔަށްވެސް ފުލުހުން ޕެޕާ ސްޕްރޭ ޖަހާފައިވާކަމަށް މައުލޫމާތު ލިބިއެވެ. 

Advertisement

އެގޮތުން މޫނާއި ކައިރިން ޕެޕާ ސްޕްރޭ ޖެހުމާއި ގުޅިގެން ޗެނަލް-13 ގެ ދެ ނޫސްވެރިންނަށް އަނިޔާވެފައިވާއިރު، އެކަކު ވަނީ ލިބުނު އަނިޔާތަކަށް ފަރުވާދިނުމަށް ހޮސްިޓަލަށް ގެންގޮސްފަ އެވެ. 

އިދިކޮޅުގެ މުޒާހަރާ ކަވަރުކުރަމުން ދިޔަ ނޫސްވެރިއެއް 

މިއަދުގެ މުޒާހަރާގައި ފުލުހުންގެ ފަރާތުން އަނިޔާލިބުނު އިތުރު 4 މީހަކަށްވެސް ހޮސްޕިޓަލުގައި ފަރުވާދެމުން ދާކަމަށް އިދިކޮޅު ކޯލިޝަންގެ ތަރިޖަމާނު ހީނާ ވަލީދު ވަނީ ވިދާޅުވެފަ އެވެ. 

އޭގެ އިތުރުން މިއަދުގެ މުޒާހަރާ ރޫޅާލުމުގެ ތެރެއިން ފުލުހުން ވަނީ 11 މީހުން ހައްޔަރުކޮށްފަ އެވެ.