ދައުލަތުގެ ރިޒާވް، އޭގެ ރައްކާތެރި މިންގަނޑުގައި ދެމެހެއްޓޭނެ ކަމުގެ އިތުބާރު ލިބިފައިވާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ރައްޔިތުންގެ މަޖިލީހުގެ 2023 ވަނަ އަހަރުގެ ފުރަތަމަ ދައުރުގެ ފުރަތަމަ ޖަލްސާ ގައި ރައީސް ޞާލިޙް މިއަދު ރިޔާސީ ބަޔާން އިއްވަމުން އެމަނިކުފާނު ވަނީ ފާއިތުވި އަހަރުގެ ރާއްޖޭގެ އިގްތިސާދީ ހާލަތަށް އަލިއަޅުވާލައްވާފައެވެ. 

އެގޮތުން ވިދާޅުވީ، މިދިޔަ 2022 ވަނަ އަހަރު ރާއްޖޭގެ އިޤްތިޞާދު ކުރިއަރާނެ ކަމަށް ވާރލްޑް ބޭންކުން ފުރަތަމަ ލަފާކުރީ 7.6 އިންސައްތައަށް ކަމަށެވެ. އެހެންނަމަވެސް އަހަރު ނިމުނުއިރު ވާރލްޑް ބޭންކުގެ އަންދާޒާ 7.6 އިންސައްތައިން 12.4 އިންސައްތައަށް މަތިކޮށްފައިވާ ކަމަށާ، މި ހިނގާ އަހަރަށް ރާއްޖޭގެ އިޤްތިޞާދު ކުރިއަރާނެ ކަމަށް ވާރލްޑް ބޭންކުން ލަފާކުރަނީ 8.2 އިންސައްތައިން ކަމަށެވެ. 

Advertisement

"ކޯވިޑް-19 އާއި، ހަނގުރާމައިގެ ހާލަތުން ދުނިޔޭގެ އިޤްތިޞާދަށް އެރި ލޮޅުމުގެ އަސަރު ރާއްޖެއަށް ނުހަނު ބޮޑުވި. މި ކަމަށްޓަކައި ސަމާލުވެ، ހޭލައި ތިބެ އަޅަންޖެހުނު މުހިންމު ފިޔަވަޅުތައް، ސަރުކާރުން އެޅިން. ރާއްޖޭގެ އިޤްތިޞާދުގެ ހަމަ ހިފެހެއްޓުމަށްޓަކައި މާލީ ސިޔާސަތަށް ގެންނަން ޖެހުނު ބަދަލު މިވަނީ ގެނެވިފައި. މި ފިޔަވަޅުތަކާއެކު، ކުރިއަށް އޮތް ތަނުގައި ކުރިމަތިވެދާނެ އިޤްތިޞާދީ އަޑިގުޑަން ކުޑަކުރެވިއްޖެ." ރައީސް ޞާލިހް ވިދާޅުވިއެވެ.

މި މޭރުމުން ވާހަކަ ދައްކަވަމުން ރައީސް ޞާލިހް އިތުރަށް ވިދާޅުވީ، ހުސްވި ޖަނަވަރީ މަހަކީ، މިހާތަނަށް ރާއްޖޭގެ ތާރީޚުގައި އެއްމަސްތެރޭ ދައުލަތަށް އެންމެ ބޮޑު އާމްދަނީއެއް ލިބުނު މަސް ކަމަށެވެ. އެގޮތުން އެމަހު 3.5 ބިލިއަން ރުފިޔާ ލިބިފައިވާ ކަމަށް އެމަނިކުފާނު ވިދާޅުވި އެވެ. އެހެންކަމުން، ކުރިއަށް އޮތް ތަނުގެ އުންމީދު އާވެ، ރައްޔިތުންނަށް އިތުރު ބޮޑު ތަކުލީފެއް ކުރިމަތިނުވާނެ ކަމުގެ އުންމީދު ހޯދިފައިވާ ކަމަށްވެސް އެމަނިކުފާނު ވިދާޅުވި އެވެ.

"އަދި ދައުލަތުގެ ރިޒާވް، އޭގެ ރައްކާތެރި މިންގަނޑުގައި ދެމެހެއްޓޭނެ ކަމުގެ އިތުބާރު އިރާދަކުރެއްވިއްޔާ މިހާރު މިވަނީ ލިބިފައި. މިދިޔަ އަހަރު ނިމުނުއިރު، ދައުލަތުގެ ރަސްމީ ރިޒާވްގައި 827 މިލިއަން އެމެރިކާ ޑޮލަރު ހުރި." ރައީސް ޞާލިހް ވިދާޅުވިއެވެ.

މީގެ އިތުރުން ރައީސް ޞާލިހް ވިދާޅުވީ، ކުދި އަދި މެދުފަންތީގެ ވިޔަފާރިއަށް އެހީތެރިވެދޭ އެސް.އެމް.އީ. ބޭންކަކީ އަމިއްލަ ވިޔަފާރިތައް ކުރިއެރުވުމަށް އެޅުނު އެންމެ މުހިންމު އެއް ފިޔަވަޅު ކަމަށެވެ. އެ ބޭންކުގެ ހިސާބުތަކަށް ބަލާއިރު ފެންނަނީ އުންމީދީ މަންޒަރެއް ކަމަށާ ޒުވާނުންނާއި، އަންހެނުންނާއި، އުފެއްދުންތެރި ކަމުގައި ކުރިއަށްދާ ފަރާތްތަކަށް ބޭނުންވާ މާލީ އެހީތެރިކަން އެ ބޭންކުން ދެމުންދާކަމަށެވެ. މިގޮތުން، ޖުމުލަ 1100 ފަރާތަކަށް 1.16 ބިލިއަން ރުފިޔާ އެ ބޭންކުން މިހާތަނަށް ދޫކޮށްފައިވާ ކަންވެސް އެމަނިކުފާނު ފާހަގަކުރެއްވިއެވެ.