ކުރީގެ ރައީސް ޔާމީން އަބްދުލްގައްޔޫމު މިނިވަންކުރުމަށް ގޮވާލާ މިއަދު މާލޭގައި އިދިކޮޅުން ކުރި މުޒާހަރާ ކަވަރު ކުރަމުންދިޔަ ނޫސްވެރިންނަށް ހުރަސްއަޅާ ކުރި އަނިޔާތައް ސިޔާސީ ޕާޓީތަކުން ކުށްވެރިކޮށްފި އެވެ. 

އެކަމާއި ގުޅޭގޮތުން ޕްރޮގްރެސިވް ކޮންގްރެސް ކޯލިޝަނުން ނެރުނު ބަޔާނުގައި ވަނީ އިދިކޮޅުގެ މުޒާހަރާގައި ބައިވެރިވި މަޖިލީސް މެމްބަރުންނާއި އާންމު ރައްޔިތުންގެ އިތުރުން މުޒާހަރާ ކަވަރުކުރަމުން ދިޔަ ނޫސްވެރިންނަށް ފުލުހުންގެ ފަރާތުން ދިން އަނިޔާތައް ކުށްވެރިކޮށްފަ އެވެ. 

އިދިކޮޅުން ބުނީ ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުޙައްމަދު ނަޝީދާއި ރައީސް ޞާލިހުގެ އަމުރަށް ޤާނޫނާއި ޚިލާފަށް ސިފައިން ހިންގި ޢަމަލުތައް އެންމެ ހަރުކަށި އިބާރާތުން ކުށްވެރިކުރާކަމަށެވެ. 

އަދި މަގުމަތީގައި ކުރިއަށް ގެންދިޔަ އިޙުތިޖާޖުގައި ޙާލަތާއި ނުބައްދަލު ބާރުގެ ބޭނުންކޮށް އިޙުތިޖާޖުގައި ބައިވެރިންނަށް ފުލުހުން މެދުވެރިކޮށް އަނިޔާކޮށް، ޕެޕަރ ސްޕްރޭ ޖެހުމާއި، ނޫސްވެރިންނަށް އަނިޔާ ކުރުންވެސް އެންމެ ހަރުކަށި އިބާރާތުން ކުށްވެރި ކުރާކަމަށް އިދިކޮޅުގެ ބަޔާނުގައި ވަނީ ބުނެފަ އެވެ. 

އެއާއެކު އިދިކޮޅު ކޯލިޝަނުން ވަނީ އިޙުތިޖާޖުގެ ތެރެއިން ހައްޔަރުކޮށްފައިވާ ދިވެހި ރައްޔިތުން އެއްވެސް ޝަރުތަކާއި ނުލާ މިހާރުން މިހާރަށް ދޫކޮށްލުމަށް ގޮވާލާފަ އެވެ. އަދި ފުލުހުން މުޒާހަރާ ކަވަރުކުރަމުން ދިޔަ ނޫސްވެރިންނަށް އަނިޔާކުރި މައްސަލަ ކަމާ ގުޅުންހުރި މުއައްސަސާތަކުން ބެލުމަށް ގޮވާލާފަ އެވެ. 

އިދިކޮޅުގެ މުޒާހަރާ ވަކަރުކުރަމުން ދިޔަ ނޫސްވެރިންނަށް ފުރައްސާރަކޮށް އަނިޔާކޮށްފައިވާކަން ފާހަގަކޮށް މޯލްޑިވްސް ތާޑްވޭ ޑިމޮކްރެޓްސްއިން ވެސް ވަނީ ކަންބޮޑުވުން ފާޅުކޮށްފަ އެވެ. 

އެގޮތުން އެ ޕާޓީގެ ރަސްމީ ޓްވީޓާ ހޭންޑަލްއިން ކޮށްފައިވާ ޓްވީޓެއްގައި ބުނީ ރިޔާސީ ބަޔާން އިއްވުން އޮތުމާއި ގުޅިގެން މާލޭގައި އިދިކޮޅު ސިޔާސީ ފަރާތްތަކުން ކުރިއަށް ގެންދިޔަ މުޒާހަރާގެ ތެރެއިން ބައިވެރިންގެ ތެރެއިން ބަޔަކު ނޫސްވެރިއަކަށް ފުރައްސާރަ ކުރި މައްސަލައާއި މުޒާހަރާ ކަވަރުކުރަމުން ދިޔަ ނޫސްވެރިންނަށް ފުލުހުންގެ ފަރާތުން ލިބުނު އަނިޔާތައް ކުށްވެރިކުރާ ކަމަށެވެ. 

އޭގެ އިތުރުން މި ހަފްތާ ތެރޭގައި ވަގުތު ނޫސްވެރިންނަށް އިންޒާރުދިން މައްސަލަވެސް އެ ޕާޓީއިން ކުށްވެރިކުރާކަމަށް ބުނެފައިވެއެވެ.

އެއާއެކު އެމްޓީޑީއިން ވަނީ ނޫސްވެރިންގެ ހައްގުތައް ރައްކާތެރިކޮށް ހިމާޔަތް ކުރުމަށް ސިޔާސީ ޕާޓީތަކާއި ދައުލަތުގެ އެންމެހާ އިދާރާތައް ގުޅިގެން މަސައްކަތް ކުރުމަށް ގޮވާލާފަ އެވެ. 

އިދިކޮޅުގެ މުޒާހަރާގައި ނޫސްވެރިންނަށް ހުރަސްއެޅި މައްސަލައިގައި ޖުމްހޫރީ ޕާޓީއިންވެސް ވަނީ ކަންބޮޑުވުން ފާޅުކޮށްފަ އެވެ.

އެގޮތުން ޖޭޕީއިން ބުނީ އިދިކޮޅުގެ މުޒާހަރާގެ މަންޒަރުތައް ކަވަރުކުރަމުން ދިޔަ ވީޓީވީގެ ނޫސްވެރިއަކަށް މުޒާހަރާގެ ބައިވެރިން ފުރައްސާރަކޮށް އެ ނޫސްވެރިއާގެ މަސައްކަތަށް ހުރަސްއަޅާފައިވާކަމަށެވެ. އަދި އެކަން ބަލައި ނުގަންނަ ކަމަށާއި، އެފަދަ އަމަލުތައް ކުށްވެރިކުރާކަމަށް ޖޭޕީއިން ބުނެފައި ވެއެވެ. 

ޖޭޕީއިން ވަނީ އިދިކޮޅުގެ މުޒާހަރާ ކަވަރުކުރަމުން ދިޔަ ނޫސްވެރިންނަށް އަނިޔާކުރި ހަބަރަކީ ހިތާމަވެރި ހަބަރެއްކަން ފާހަގަކޮށް އެފަދަ އަނިޔާތައްވެސް ކުށްވެރިކޮށްފަ އެވެ.  

އިދިކޮޅުގެ މުޒާހަރާ ކަވަރުކުރި ނޫސްވެރިންނަށް ފުރައްސާރަކޮށް އަނިޔާކޮށްފައިވާކަން ފާހަގަކޮށް ސިޔާސީ ޕާޓީތަކުން ކަންބޮޑުވުން ފާޅުކޮށްފައި ވާއިރު، ނޫސްވެރިންނަށް އަނިޔާކުރި މައްސަލައިގައި މޯލްޑިވްސް ޖާނަލިސްޓު އެސޯސިއޭޝަނުންވެސް ވަނީ ކަންބޮޑުވުން ފާޅުކޮށްފަ އެވެ.