ރައީސް ޔާމިން ޢަބްދުލްޤައްޔޫމް ނޫން ޗޮއިސް އަކަށް ޕީޕީއެމް ޕީއެންސީ ކޯލިޝަންއިން ދިއުމަށް ސިއްރު މަޝްވަރާ ތަކެއް ކުރަމުންދާ ކަމަށް ބުނާ ވާހަކަ ޕީޕީއެމްގެ ޗީފް ސްޕޯކްސްޕާސަން ހީނާ ވަލީދު ދޮގު ކުރައްވައިފި އެވެ.

ރާއްޖޭގެ މީޑީއާ އަކުން ޔާމިން ނޫން ޗޮއިސް އަކަށް ޕީޕީއެމްގެ ތެރޭގައި ހިމޭން މަޝްވަރާއެއް ކުރެވެމުންދާ ކަމަށް ބުނެ ލިޔެފައިވާ އާޓިކަލް އެއް ޝެއަރ ކުރައްވައި ހީނާ ކުރެއްވި ޓްވީޓެއްގައި އޭނާ ވަނީ އެއީ އެފަދަ މަޝްވަރާއެއް ނުކުރާ ކަމުގެ ޔަގީންކަން ދެއްވާފައެވެ.

އަދި އެއީ "ކަނޑައެޅިގެން ހަޤީޤާތާ ޚިލާފު ވާހަކަތަކެއް ލިޔެފައިވާ އާޓިކަލް އެއް" ކަމަށް ވެސް ހީނާ ވިދާޅުވިއެވެ. 

"ޕީޕީއެމް ޕީއެންސީ ކޯލިޝަންގެ ރިޔާސީ ކެނޑިޑޭޓަކީ ރައީސް ޔާމިން، މި ކޯލިޝަން އަކުން އެހެން ޗޮއިސް އަކަށް މަޝްވަރާ އެއް ނުކުރޭ، އިތުރު ޗޮއިސް އެއް ނެތް، ޕީޕީއެމް ޕީއެންސީ ގެ ހުރިހާ ޗޮއިސް އަކީ ރައީސް ޔާމިން" ހީނާ ގެ ޓްވީޓުގައި ވެއެވެ.

އެ އާޓިކަލްގައި ޕީޕީއެމްގެ އެކްޓިވިސްޓަކު ބުނިކަމަށް ބުނެ ލިޔެފައިވަނީ ޕީޕިއެމްގެ ތެރޭގައި ދެފެކްޝަނަކަށް ބެހިފައިވާ ކަމަށެވެ. އަދި ރަސްމީގޮތުން އެކަމަށް އިންކާރު ކުރިނަމަވެސް އެއީ އެކަން ހިނގަމުން އަންނަ ގޮތް ކަމަށް އޭނާ ބުނެފައިވެއެވެ. 

އެއާޓިކަލް ގައި ބުނެފައިވަނީ ޕީޕީއެމްގެ ތެރެއިން އެ ޕާޓީއަށް ވަފާތެރި، ރައީސް ޔާމީނާ އަރިސް ގިނަ ބަޔަކު މިހާރު ބާކީކޮށްލަމުން އަންނަ ކަމަކީ އެ މީހުންގެ ބޮޑު ކަންބޮޑުވުމެއް ކަމަށާ ރިޔާސީ ޓިކެޓު ހާސިލްކުރުމަށް މުޑި ނަގައިގެން ހުންނެވި ބޭފުޅަކު ނުވަތަ ބޭފުޅުންތަކަކާ އެ މީހުންގެ ވިސްނުން އެއްގޮތް ނުވުމަކީ އެތެރޭގެ ގިނަ ކަންތައްތަކަކުން އެ މީހުން ބާކީ ކުރަމުން އަންނަ ސަބަބެއްކަމަށް އެ ޕާޓީގެ ހަރަކާތްތަކުގައި އެންމެ އިސްކޮށް، ކުރީ ސަފުގައި ހަރަކާތްތެރިވާ އެކްޓިވިސްޓަކު އެ މީޑިއާއަށް ބުނިކަމަށެވެ. 

އަދި މިހާރު އެބޭފުޅުނަން ޕާޓީ އޮފީހަށް ވަދެ މައްޗަށް އެރުން ވެސް މަނާ ކަމަށާއި ވަގެއްގެ ގޮތުގައި ލޭބަލްކޮށްފި ކަމަށްވެސް ބުނެފައިވެއެވެ. ސެނެޓަރުން ހޮވަން ބޭއްވި އިންތިޚާބުގައި ވެސް ވަކި ލިސްޓެއް ހަދައި އެއަށް ވޯޓުލައި، ރައީސް ޔާމީނަށް އެންމެ ވަފާތެރި އެންމެން ތިބީ ކަޓުވައިލައިފައި ކަމަށާއި، ލީޑާޝިޕުގެ ބައެއް މެމްބަރުން ހޮވަން ބޭނުންވި މީހުން ހޮވަން އެ މީހުންގެ ފޮޓޯ ހޯދައިގެން ގެނެސް ވަކި ބަޔަކު ހޮވީ ކަމަށް ވެސް ބުނެފައިވެއެވެ.