އިސްލާމް ދީނާއި ކީރިތި ރަސޫލާ (ސ.އ.ވ) އަށް ފުރައްސާރަކޮށް ކާޓޫނު ކުރެހި ފްރާންސުގެ ހައްދުފަހަނައަޅާފައިވާ ނޫސް މަޖައްލާ, ޗާލީ ހެބްޑޯ އިން، ތުރުކިޔޭ-ސީރިޔާ ބިންހެލުމުގައި ނިޔާވި މީހުންނަށް ފުރައްސާރަ ކޮށްފިއެވެ. 

ފާއިތުވި 48 ގަޑިއިރުތެރެއިން 5 ބިންހެލުން އައިސް ތުރްކިޔޭ އާއި ސީރިޔާއިން ނިޔާވި މީހުންގެ ޢަދަދު 5000 އަށް މިހާރު ވަނީ އަރާފައެވެ. އަދި މި ކާރިސާގައި ތުރްކިޔޭ އާއި ސީރިޔާއިން ޒަހަމްވެ އަނިޔާވި މީހުންގެ ޢަދަދު 10 ހާހުން މައްޗައް ވަނީ އަރައިފައެވެ.

އެކި އުމުރު ފުރައިގެ އެތައް މީހުން ނިޔާވެ އެތައް ބައެއް ގެދޮރު ގެއްލި، ކާބޯތަކެތީގެ ދަތިކަން ކުރިމަތިވެފައިވާ މި ހިތާމަވެރި ހާދިސާއާއި ގުޅިގެން މުޅި ދުނިޔެ އަންނަނީ ހިތާމަ ފާޅުކުރަމުންނެވެ. 

އެހެން ނަމަވެސް، ހައްދުފަހަނައަޅާފައިވާ ފްރާންސްގެ މަޖައްލާ، "ޗާލީ ހެބްޑޯ" އިން މި ފަހަރުވެސް ވަނީ މުސްލިމުންނަށާއި އިންސާނިއްޔަތަށް ވެސް އެއްވެސް ގަދަރެއް އެމީހުން ނުކުރާކަން ދުނިޔެއަށް ހާމަކޮށްދީފައެވެ. 

އެގޮތުން، ތުރުކިޔޭ-ސީރިޔާގެ ބިންހެލުމުގައި ނިޔާވި މީހުންނަށް ފުރައްސާރަ ކޮށް، އެ މަޖައްލާގެ ރަސްމީ ޓުވީޓާ އެކައުންޓް ގައި ހިއްސާކޮށްފައިވާ ކުރެހުމެއްގައި ވަނީ، "ދެން ޓޭންކްގެ (ހަނގުރާމަވެރި އުޅަނދުގެ) ބޭނުމެއް ނެތް" ކަމަށް ބުނެފައެވެ. 

ޓޭންކަކީ ބޮޑެތި ހަނގުރާމަ ތަކުގައި ވަރުގަދަ މިސައިލްތައް ފޮނުވައި އެއްފަހަރާ އެތައް ބަޔަކު މަރާލައި ތަން ތަން ސުންނާފަތި ކޮށްލަން ބޭނުންކުރާ އުޅަނދެކެވެ. 

ޗާލީ ހެބްޑޯގެ މި ކުރެހުމާއި ގުޅިގެން ގިނަ ބައެއްގެ ފާޑުކިޔުންތައް އެ ނޫހަށް ވަނީ އަމާޒުވެފައެވެ. އަދި އެއީ ވަރަށް ލާއިންސާނީ އަމަލެއް ކަމަށާ، މަރުވެފައިވާ މީހުންނަށް އަމާޒުކޮށް އެފަދައިން ފުރައްސާރަ ކުރުމަކީ ބަލައިގަނެވޭނެ ކަމެއް ނޫން ކަމަށްވެސް މީހުން އަންނަނީ ބުނަމުންނެވެ.

ޗާލީ ހެބްޑޯ ނޫހުންވަނީ މީގެ ކުރިން ތުރުކިޔޭގެ ރައީސް ތައްޔިބް އުރުދުޣާންގެ ކާޓޫންވެސް ކުރަހާފައެވެ. އެ ނޫހުން އެފަދައިން ކަން ކޮށްފައިވަނީ، އޭގެ ކުރިން އެނޫހުން ރަސޫލާ ޞޢވ ގެ ކާޓޫން ކުރެހުމާއި ގުޅިގެން މުސްލިމުންގެ ނުރުހުން ފްރާންސް އަށް އަމާޒުވެފައި ވަނިކޮށް، އެ ކާޓޫންތައް ކުރެހުމަކީ ހިޔާލު ފާޅުކުރުމުގެ މިނިވަންކަން ކަމަށް ބުނެ ފުރާންސު ސަރުކާރުން ފަތުރަމުންދިޔަ މުސްލިމުން ރުޅިއެރުވުމުގެ ޕުރޮޕެގެންޑާއާއި ދެކޮޅަށް އުރުދުޣާން ވާހަކަފުޅު ދެއްކެވުމާއި ގުޅިގެންނެވެ.