މާލެ ސަރަހައްދުން ގޯތި ދޫކުރާ އަދަދު އިތުރުކުރުމަށް ރައީސުލްޖުމްހޫރިއްޔާ ނިންމުމާއި ގުޅިގެން ބޯހިޔާވަހިކަމުގެ ހައްގު ކަށަވަރު ކޮށްދިނުމަށް މަސައްކަތް ކުރަމުން އަންނަ އާންމުންގެ އެކުވެރި ޖަމުއިއްޔާއިން ކަންބޮޑުވުން ފާޅުކޮށްފި އެވެ. 

ސަރުކާރުގެ އެ ނިންމުމާއި ގުޅިގެން އެ ޖަމުއިއްޔާގެ ކަންބޮޑުވުންތައް ހިއްސާކޮށް ނެރުނު ބަޔާނެއްގައި ބުނެފައިވަނީ މީގެ ކުރިން ސަރުކާރުން ނިންމާފައިވަނީ ގިރާވަރުފަޅު ހިއްކައިގެން 5000 ގޯތި ދޫކުރުމަށް ކަމަށެވެ. އެއީ ހުޅުމާލެއިން 1000 ގޯއްޗާއި ގުޅިފަޅާއި ގިރާވަރުފަޅު ހިއްކައިގެން ކޮންމެ ތަނަކުން 2000 ގޯއްޗެވެ. 

އެހެން ނަމަވެސް މިއަހަރަށް މަޖިލީސް ފައްޓަވާދެއްވަމުން ރައީސުލްޖުމްހޫރިއްޔާ އިއްވެވި ރިޔާސީ ބަޔާނުގައި ވަނީ މާލެ ސަރަހައްދުން ދޫކުރާ ގޯތީގެ އަދަދު އިތުރުކުރުމަށް ސަރުކާރުން ނިންމާފައިވާކަން އިއުލާނު ކުރައްވާފަ އެވެ. 

އާންމުންގެ ޖަމުއިއްޔާއިން ބުނީ ބޯހިޔާވަހިކަމުގެ މައްސަލަ ހައްލުކުރުމުގެ ނަމުގައި ސަރުކާރުން 3،000 މީހުންނަށް ބަހަން މިހާރުވެސް ނިންމާފައިވަނީ 7،000 ހިޔާ ފްލެޓު އަޅާފައިވާ ބިމަށްވުރެ 16 ގުނަ ބޮޑު ސަރަހައްދެއް ކަމަށެވެ.

އެއީ ހިޔާ 25 ބުރީގެ 250 ޓަވަރަށް ވުރެ ގިނަ ޓަވަރު އަޅައި، 200،000 އަށްވުރެ ގިނަ މީހުންނަށް ބޯހިޔާވަހިކަން ފޯރުކޮށްދެވޭނެ ޖާގަ ކަމަށެވެ.

ހިލޭ ބަހަން ސަރުކާރުން ޕްލޭން ކުރާ ބޮޑު ބިމަކީ ބިންތަދު މާލޭ ސަރަހައްދުގައި އަގުގެ ގޮތުން ބެލިޔަސް އެތައް ބިލިއަން ރުފިޔާގެ އަގުހުރި ރައުސުލްމާލެއް ކަމަށް އެ ޖަމިއްޔާއިން ބުންޏެވެ. އަދި 3،000 މީހުންނަށް ބަހަން ޕްލޭން ކުރެވިފައިވާ ބިމުގެ އަގު އެތައް ބިލިއަން ރުފިޔާއަށް އަރާއިރު އެއީ އޭގެ އެތައް ގުނަ ގިނަ އާބާދީއަކަށް ބޯހިޔާވަހިކަން ފޯރުކޮށްދެވޭނެ ފައިސާ ކަމަށެވެ.

އާންމުންގެ ޖަމުއިއްޔާއިން ވަނީ މާލެ ސަރަހައްދުން ގޯތި ދޫކުރުމުގައި ބޮޑެތި ކޮރަޕްޝަން ހިންގަމުންދާކަމަށް ތުހުމަތުތައް ކުރެވެމުންދާކަން ފާހަގަކޮށްފަ އެވެ. ނިމިގެންދިޔަ އެމްޑީޕީގެ އެތެރޭގެ އިންތިހާބުތަކަށް ނުފޫޒު ފޯރުވުމަށް ވެސް ގޯތީގެ އެކިއެކި ޑީލުތައް ސަރުކާރުގެ އިސް ފަރާތްތަކުން ހަދަމުން ދިޔަކަމުގެ އެތައް ތުހުމަތެއްވެސް ކުރެވުނުކަން އެ ޖަމުއިއްޔާއިން ފާހަގަކުރި އެވެ. 

ގޯތި ބަހަނީ ބޯހިޔާވަހިކަމުގެ މައްސަލަ ހައްލު ކުރުމަށް ކަމަށް ސަރުކާރުން ބުނި ނަމަވެސް، އެޖަމިއްޔާއިން ބުނި ގޮތުގައި ނިކަމެތި 3،000 މީހުންނަށް ހުސް ބިމެއް ދީގެން އެ މައްސަލަ ހައްލު ނުވާނެ އެވެ. 

ނުވިތާކަށް އެފަދައިން އެކަން ކުރުމުގެ ސަބަބުން މުސްތަގުބަލުގައި އެތަންތަނުގެ ސަބަބުން ކުލީގެ އަޅުންނަށް މީހުން ހެދުމަށް އިތުރު ފުރުސަތުތަކެއް ހުޅުވިގެންދާނެކަމަށް އާންމުންގެ ޖަމުއިއްޔާއިން ވަނީ ބުނެފަ އެވެ. 

އާންމުންގެ ޖަމުއިއްޔާއިން ބުނީ ރިޔާސީ އިންތިޚާބުގެ އަހަރާއި ދިމާކޮށް އެއްވެސް ދިރާއެއް ނެތި ގޯތި ދޫކުރާނެ އިތުރު ބިންތަކެއް ދިނުމަށް ކަނޑައެޅީ ސިޔާސީ މަގްސަދަކަށްޓަކައިކަމަށް ގަބޫލު ކުރެވޭކަމަށެވެ. 

އެކަންކަން ފާހަގަކޮށް އާންމުންގެ ޖަމުއިއްޔާއިން ބުނީ ގޯތި ދޫކުރާނެ ސާފު އުސޫލުތަކެއް މިހާތަނަށް އައިރު ކަނޑައަޅާފައި ނުވާއިރު، 3،000 މީހުންނަށް 200،000 މީހުން އާބާދު ކުރެވޭނެ ބިން ރިޔާސީ އިންތިހާބާއި ދިމާކޮށް ބަހާލަން އުޅުމަކީ ނުހަނު ކަންބޮޑުވާކަމެއް ކަމަށެވެ. 

ސަރުކާރުން ބަހާލަން ނިންމާފައިވާ ބިންތަކަކީ ކުރިއަށް އޮތް އެތައް ޖީލެއްގެ ހައްގު ހިމެނޭ ބިންތަކެއް ކަމަށްވާއިރު، އެ ބިންތައް މަދު މިސްކޮޅެއްގެ ހަރު މުދަލަށް ބަދަލުކޮށް ސިއްކަ ޖެހިޔަ ނުދިނުމަށް މަސައްކަތް ކުރަން ޖެހޭކަމަށެވެ. އަދި އެ ޖަމުއިއްޔާއިން ވަނީ އެ މަސައްކަތުގައި ހުރިހާ ދިވެހިން ބައިވެރިވުމަށް ގޮވާލާފަ އެވެ.