ފުރަމާލެއާއި ގުޅާލުމަށް ނިންމާފައިވާ ތިލަފުށިން ބޭރުގެ ފަރާތްތަކަށް ދިގު މުއްދަތަކަށް ބިން ވިއްކުމަކީ ދިވެހި ވިޔަފާރިވެރިންނަށް އޮތް ބޮޑު ގޮންޖެހުމެއްކަމަށް މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެ އެވެ. 

ސައީދު މިފަދައިން ވިދާޅުވެފައިވަނީ ބޭރު ފަރާތްތަކަށް ތިލަފުށިން ބިން ވިއްކުމަށް ސަރުކާރުން ނިންމުމާއި ގުޅިގެން، ކަންބޮޑުވުން ފާޅުކުރައްވާ ކުރެއްވި ޓްވީޓެއްގަ އެވެ. 

އެ ޓްވީޓުގައި ސައީދު ވަނީ ދުރު މުސްތަގުބަލަށް ބަލާއިރު، ބޭރު މީހުންނަށް ތިލަފުށިން ބިން ވިއްކުމުން ދިވެހި ވިޔަފާރިވެރިންނަށް ލިބޭނެ ބައެއްކަހަލަ ގެއްލުންތަކަށް އަލިއަޅުވާލައްވާފަ އެވެ. 

އެގޮތުން ސައީދު ވިދާޅުވީ ދިވެހި ވިޔަފާރިވެރިންނަށް މާލެ ސަރަހައްދުން ވިޔަފާރި ބިންތައް ހޯދުމަށް މިހާރުވެސް ބޮޑެތި ދަތިތަކެއް ހުރި ކަމަށެވެ. މާލެ ސަރަހައްދުގެ ބިން ތަކަކީ އަގު ބޮޑެތި ބިންތަކެއްކަމަށާއި، އަދި ބިން ހޯދުމަށް ބޮޑެތި ދަތުތަކެއް މިހާރުވެސް ހުރިކަމަށެވެ. 

މިހާލަތު އޮތް އިރު، ތިލަފުށިން ބޭރު މީހުންނަށް ބިން ދޫކުރާނަމަ އޭގެ ސަބަބުން ދިވެހި ވިޔަފާރިވެރިން ވިޔަފާރިކުރާނެ ބިންތައް ހޯދުމަށް އިތުރު ގޮންޖެހުންތަކާއި ކުރިމަތިލާން ޖެހޭނެކަމަށް އޭނާ ވިދާޅުވިއެވެ. 

މިހާރުވެސް ސަރުކާރުން ތިލަފުށިން ދެ ބިން ބޭރުގެ ފަރާތްތަކަށް ދޫކޮށްފައިވާއިރު، ކުރިއަށް އޮތް ތަނުގައި ތިލަފުށީގެ ބިންތައް ކޮންޓްރޯލު ކުރާނީ ބަކި ބައެއްކަމާމެދު ޝައްކު ނުކުރައްވާކަމަށް ސައީދު ވިދާޅުވިއެވެ. 

އެކަން ފާހަގަކުރައްވާ އޭނާ ވަނީ ތިލަފުށިން 99 އަހަރަށް ބޭރުގެ ފަރާތްތަކަށް ދޫކޮށްފައިވާ ބިންތައް އަނބުރާ ސަރުކާރަށް ހޯދާ، ބޭރު މީހުންނަށް ބިން ދޫކުރެވޭ އުސޫލު މިހާރުން މިހާރަށް ބަދަލުކުރުމަށް ސަރުކާރަށް ގޮވާލާފަ އެވެ.

އެފަދައިން ބިން ދޫކުރުމަކީ ދިވެހި ވިޔަފާރިވެރިންގެ މުސްތަގުބަލަށް ވަރަށް ބޮޑަށް ހިޔަނި އެޅޭނެ ކަމެއްގެ ގޮތުގައި ސައީދު ވަނީ މީގެ ކުރިންވެސް ސިފަކުރައްވާފަ އެވެ. 

ބޭރު މީހުންނަށް ތިލަފުށިން ބިން ވިއްކޭ އުސޫލަށް އިދިކޮޅުން ގެންދަނީ ފާޑުކިޔުން އަމާޒުކުރަމުންނެވެ. އަދި އެކަމާއި އިދިކޮޅުން ގެންދަނީ ދެކޮޅު ހަދަމުންނެވެ. އެގޮތަށް އެކަން ނުކުރުމަށް ގޮވާލާ މަޖިލީހަށް އިއްޔެ ކުއްލި މައްސަލައެއްވެސް އިދިކޮޅުން ވަނީ ވައްދާފައެވެ. 

އެހެން ނަމަވެސް އެމްޑީޕީ ސުޕަމެޖޯރިޓީ އޮންނަ ރައްޔިތުންގެ މަޖިލީހުން ވަނީ އެ މައްސަލަ ބޭރުކޮށްލާފަ އެވެ.