ދިވެހި ގިނަ ވިޔަފާރިތަކެއްގެ ސިނާއީ މަސައްކަތް ކުރާ ރަށް، ތިލަފުށީގައި އިންޑަސްޓްރިއަލް ހަބެއް ހެދުމުގެ ބޭނުމުގައި އެރަށުގެ ބިން 99 އަހަރަށް ވިއްކާލަން ސަރުކާރުން ނިންމާފައިވާ ނިންމެވުމާއި ގުޅިގެން ރައްޔިތުންގެ މަޖިލީހުގެ މާވަށު ދާއިރާގެ މެންބަރު މުހައްމަދު ސައީދު ކަންބޮޑުވުން ފާޅުކުރައްވައިފިއެވެ. 

ސައީދު ކުރެއްވި ޓުވީޓެއްގައި އޭނާ ވަނީ، މާލޭކޮމާޝަލް ބަނދަރާއި، ބްރިޖާއި، އެއާޕޯޓް ފަދަ މުހިއްމު މުދަލަކީ ރާއްޖޭގެ އިޤްތިސާދުގެ ކުރިމަގު ކަމަށެވެ.

އަދި އެ ހުރިހާ ތަނަކާއި ގުޅިފައިވާ ބިމެއް، ވެރިކަންނިމެން 7 މަހަށްވުމުން އަވަސްއަރުވާލާފަ ނުއަގުގަ ބޭރުގެ ބަޔަކަށް ވިއްކާލަނީ ވެރިކަން ދަމަހައްޓަން ކަމަށް ވިދާޅުވެ އެ އަމަލަކީ ވޯރާ ވިޔަފާރީގެ 2 ވަނަ އެނބުރި އައުން ކަމަށްވެސް ސައީދު ވަނީ ވިދާޅުވެފައެވެ.

"ބޭރުމީހުނަށް ޤަރުނަކަށް ނުއަގުގަ އެވިއްކަނީ ދިވެހިންގެ މުސްތަޤްބަލް." ސައީދު ވިދާޅުވި އެވެ. 

ކުނި އަޅައިގެން ހިއްކާފައިވާ ތިލަފުށި 220 މިލިއަން ޑޮލަރު (18 ބިލިއަން ރުފިޔާ) ގެ އިންޑަސްޓްރިއަލް ހަބެއްގެ ގޮތުގައި ތަރައްގީ ކުރަން ސަރުކާރުން ނިންމާފައިވާއިރު، މި މަޝްރޫއު ފަރުމާކޮށްފައިވަނީ މާލޭގައި ހުރި ހުރިހާ އިންޑަސްޓްރިއަލް މަސައްކަތްތަކެއް ތިލަފުއްޓަށް ބަދަލު ކުރުމަށެވެ.

ތިލަފުށި އެއްވަނަ ފިޔައްވަސާއި ދެވަނަ ފިޔަވަހި ވަކިކޮށްލަން ބްރިޖުން ގުޅާލައި ޗެނަލް އަކުން ވަކި ކޮށްލާނެ އެވެ. މި މަޝްރޫއުގެ ދަށުން މިހާރު ތިލަފުށީގައި ހުރި 120 ހެކްޓަރުގެ އިތުރުން އިތުރު 140 ހެކްޓަރުގެ ސަރަހައްދެއް ހިއްކާނެ އެވެ. މިތަނުގައި ކުދި އިންޑަސްރިއަލް މަސައްކަތްތަކާއި ބޮޑެތި މަސައްކަތް ތަކަށް ވެސް ބިން ދޭނެ އެވެ. އެއްބައިގައި ގުދަންތަކާއި ހެވީ އިންޑަސްރިއަލް މަސައްކަތްތަކަށް ހާއްސަ ސަރަހަދެއް އޮންނާނެ އެވެ. މީގެ އިތުރުން އޮފީސް ޖާހައަކާއި ތެޔޮ ރައްކާ ކުރާ ވަސީލަތް ވެސް ހުންނާނެ އެވެ. މީގެ އިތުރުން "ލޭބަ ވިލެޖެއް" ވެސް އޮންނާނެ އެވެ. ތިލަފުށީގެ ބަނދަރު ބޮޑުކޮށް ބޭނުން ކުރެވޭނެ ފެސިލިޓީ ގާއިމް ކުރާނެ އެވެ. 

މިފަދަ ޕްލޭންއެއް އޮތް އިރު، އެރަށުން ބޭރު މީހުންނަށް ބިން ވިއްކުމަކީ ރާއްޖޭގެ އިގްތިސާދަށް ފޫނުބެއްދޭ ވަރުގެ ބޮޑެތި ގެއްލުންތައް ވާނެ ކަމަށް އިދިކޮޅުން އަންނަނީ ބުނަމުންނެވެ.