ރާއްޖެއަށް ޑްރަގް އެތެރެކުރާ ފަރާތްތައް ދޫކޮށްލުމަކީ އެފަދަ ޢަމަލު ހިންގާ ފަރާތްތަކަށް ދެވޭނެ ހިއްވަރަކަށްވާނެ ކަމަށް ކުރީގެ އިސްލާމިކް މިނިސްޓަރު ޑރ މުހައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
މިމަހު 6 ވަނަ ދުވަހު ގަތަރުގެ ދޯހާއިން ރާއްޖެ އައި އުމުރުން 23 އަހަރުގެ އަންހެނެއްގެ ލަގެޖްގައި މަސްތުވާތަކެތި ފެނުމުން ކަސްޓަމްސް އިން އެ މަސްތުވާތަކެތި އަތުލުމަށްފަހު އަންހެން މީހާ ރާއްޖެ އެތެރެވިޔަ ނުދީ ފޮނުވާލީ އެވެ.
އެކަމާއި ގުޅިގެން، ޑރ. ޝަހީމް ކުރެއްވި ޓްވީޓެއްގައި ވިދާޅުވީ، ރާއްޖެއަށް ޑްރަގް އެތެރެކުރި ފަރާތް ހައްޔަރުނުކޮށް ދޫކޮށްލުމަކީ ބަލައިގަނެވޭނެކަމެއްނޫން ކަމަށެވެ. އަދި އެކަން އެފަދައިން ކުރުން ނޫން ގޮތެއް ހޯދަންޖެހޭ ކަމަށްވެސް އޭނާ ވިދާޅުވި އެވެ.
"ދައުލަތުގެ ހައިބަތު ނަގަހައްޓައި ޤާނޫނު ހިންގަންޖެހޭ. ޑްރަގް އެތެރެކުރާ ފަރާތްތައް ދޫކޮށްލުމަކީ އެފަދަ ޢަމަލު ހިންގާ ފަރާތްތަކަށް ދެވޭނެ ހިއްވަރަކަށްވާނެ. ވީމާ ދެވަނަ ވިސްނުމަކަށް ދާންޖެހޭ." ޝަހީމް ވިދާޅުވި އެވެ.
މަސްތުވާތަކެތި އަތުލުމަށްފަހު އެމީހާ ރާއްޖެ އެތެރެވިޔަ ނުދީ ފޮނުވާލުމުގެ ބާރު އިމިގްރޭޝަން ކޮންޓްރޯލާއަށް އޮވެ އެވެ. އެ އަންހެން މީހާގެ އަތުން ފެނުނު 2.6 ކޮލޯގެ ކޮކެއިންގެ މަގުމަތީ އަގު 6.5 މިލިއަން ރުފިޔާ އަށް އަރާކަމަށް ކަސްޓަމްސް ބުންޏެވެ. އެތަކެތި މިހާރު ވަނީ ފުލުހުންނާ ހަވާލުކޮށްފަ އެވެ.
މީގެ ކުރިންވެސް މަސްތުވާތަކެތި އެތެރެކުރަން މަސައްކަތް ކުރި ބޭރުގެ މީހުން އަތުން އެތަކެތި އަތުލުމަށްފަހު އެމީހުން ރާއްޖެއިން ޑިޕޯޓް ކޮށްފައިވެއެވެ.
Advertisement
This content is created and paid for by advertisers and does not involve Voice Journalists
