ތުރްކިޔޭ އާއި ސީރިޔާ އަށް އައި ވަރުގަދަ ބިންހެލުން ތަކަށްފަހު އެހީތެރިކަމަށް ބޭނުންވެފައި ތިބި މީހުންނަށް ފަލަސްޠީނުން އެހީތެރިވުމަށް ނިންމައި އެހީގެ ގާފިލާ ފުރައިފިއެވެ.

ފަލަސްޠީނުގެ އެއިޑް ޓީމެއް މިހާރު ވަނީ ތުރްކިޔޭ އާއި ސޫރިޔާގައި މީހުން ސަލާމަތްކުރަން މަސައްކަތް ކުރާ ޓީމްތަކަށް އެހީތެރވުމުގެ ގޮތުން ފުރައިފައެވެ.

ފަލަސްޠީނިއަން އިންޓަރނޭޝަނަލް ކޯޕަރޭޝަން އެޖެންސީ އިން ވަނީ 73 ރެސްކިޔު ވޯކާސްގެ ޓީމަކާއި އެކު ފަލަސްޠީނުގެ ފޮރިންގ މިނިސްޓްރީ ކުރިމަތިން ބަހުގައި ވަނީ ދަތުރުފަށައިފައެވެ.

ޓީމު ފުރަތަމަ ދަތުރުކުރާނީ ޖޯޑަން އަށެވެ. އަދި ޖޯޑަން އިން ޓީމު ދެބަޔަކަށް ބެހި ތުރްކިޔޭ އަށާއި ސީރިޔާގެ ބިންހެލުމުގެ އަސަރު ކޮށްފައިވާ ހިސާބަށް ދަތުރުކުރާނެއެވެ.

ޕީއައިސީއޭގެ ހެޑް އިމާދް ޒުހައިރީ ވިދާޅުވީ "އަހަރެމެންނަށް އެހީތެރިކަމަށް ނިހާޔަތަށް ބޭނުން ވެފައިވީނަމަވެސް އަހަރެންގެ ޓީމަށް އެމީހުންނަށް އެހީތެރި ނުވެ ނުތިބެވޭނެ" މިހެނެވެ.

"އަހަރެމެންނަކީ ދެރަނިކަމެތި ކަން ތަހައްމަލް ކުރަމުންދާ ބައެއް އެހެންވީމަ އެކަން ކަން އަހަރެމެންނަށް އިހުސާސު ކުރެވޭ" ޒުހައިރީ އިތުރަށް ވިދާޅުވިއެވެ.

ފަލަސްޠީނުގެ އެއިޑް ޓީމުގައި ހިމެނެނީ ފަލަސްޠީނުގެ ސިވިލް ޑިފެންސް ފޯސްގެ މީހުންނާއި، ހެލްތް މިނިސްޓްރީގެ މީހުންގެ އިތުރުން ފަލަސްޠީން ރެޑް ކޮރެސެންޓް ގެ މެމްބަރުންނެވެ.

ޒުހައިރީ ވިދާޅުވީ އޭނާގެ ޓީމު މިކަމުގައި ބައިވެރި މިވަނީ މިކަމުގައި ހުރި ދަތިކަމާއި އުނދަގުލާއި ނުރައްކާތެރިކަން އެނގިތިބެ އެކަންކަމާއި ކުރިމަތިލުމަށް ކަމަށެވެ.

ފަލަސްޠީނުގެ ސިވިލް ޑިފެންސް ފޯސް ގެ ބްރިގޭޑިއަރ އުދެއްޔު ޔޫނުސް ވިދާޅުވީ ސިވިލް ޑިފެންސް ފޯސް އިން 32 މީހަކު ފޮނުވާ ކަމަށެވެ. އަދި އެ ޓީމުގެ މައިގަނޑު މަގްސަދަކީ ވެއްޓިފައިވާ އިމާރާތް ތަކުގެ ދަށުން މީހުން ނެރުމާއި ބޭނުންވާ މެޑިކަލް އެހީ ތެރިކަން ފޯރުކޮށްދިނުން ކަމަށެވެ.

ކާރިސާ އަށް 72 ގަޑިއިރު ވެފައި ވާއިރު މަރުވި މީހުންގެ ޢަދަދު މިހާރު 20،000 އަށް ވަނީ އަރައިފައެވެ. ތުރުކިޔޭ އިން 17،134 މީހުން މަރުވެފައިވާއިރު ސީރިޔާއިން 3،317 މީހުން ވަނީ މަރުވެފައެވެ.