މިދިޔަ ހޯމަދުވަހު އައި ބާރުގަދަ ދެ ބިންހެލުމެއްގައި ހާލުގައިޖެހިފައިވާ ތުރުކިޔޭ ރައްޔިތުންނަށް އެހީވުމަށް އިންޓަނޭޝަނަލް އެއިޑް ކެންޕެއިން (އައިއޭސީ) އިން އެގައުމުގައި ކުރަމުންދާ މަސައްކަތުގައި އެތެރެހަށީގެ ޑޮކްޓަރ މުހައްމަދު ޢަލީ ބައިވެރިވެވަޑައިގެންފިއެވެ. 

ތުރުކިޔޭ އާއި ސީރިޔާ އަށް ސިލްސިލާކޮށް އައި ބާރުގަދަ ބިންހެލުން ތަކުގެ ސަބަބުން ނިޔާވި މީހުންގެ ޢަދަދު ވަނީ 16000 އަށް އަރާފައެވެ. މީގެތެރެއިން 12873 މީހުންނަކީ ތުރްކިޔޭ އިން ނިޔާވި މީހުންނެވެ. 

ބިންހެލުމުގައި ފުރާނަ ސަލާމަތްވި ނަމަވެސް، ބޯހިޔަލެއް، ފެނެއް، ކަރަންޓެއް، ތެލެއް، ކާނެ އެއްޗެއް ނުލިބި ހާލުގައިޖެހުމުގެ ސަބަބުން އެތައް ބަޔަކު މަރުވެދާނެ ކަމުގެ އިންޒާރު ޑަބްލިޔުއެޗްއޯ އިން ވަނީ ދީފަ އެވެ. އަދި އިމާރާތްތަކުގެ ދަށުވެގެންނާއި އެނޫންވެސް ގޮތްތަކުން އަނިޔާ ލިބި އެތައް ބަޔަކު ވަނީ އަވަސް ފަރުވާއަށް ޑޮކްޓަރުންގެ އެހީއަށްވެސް ބޭނުންވެފައެވެ. 

އެފަދަ ފަރާތްތަކަށް ގާތުން އެހީވުމަށް އައިއޭސީގެ އިންޓަނޭޝަނަލް ރިލޭޝަންސް ޑިރެކްޓަރު މުހައްމަދު އަލީ އާއި މީޑިއާ އެންޑް ޕީއާރު ޑިރެކްޓަރު އަޒްހަދު އަހުމަދު ވަނީ އިއްޔެގެ ހެނދުނުގެ ވަގުތެއްގައި ތުރުކިޔޭއަށް ފުރާފައެވެ. އަދި އައިއޭސީ މެދުވެރިކޮށް ހާލުގައި ޖެހިފައިވާ ފަރާތްތަކަށް ދިވެހިންގެ އެހީ ފޯރުކޮށްދިނުމަށް އަމަލީ ގޮތުން އެ ދެ ބޭފުޅުން އަންނަނީ ހަރަކާތްތެރިވަމުންނެވެ. 

އައިއޭސީގެ ދެ އޮފިޝަލާ ގުޅިވަޑައިގަތުމަށް ޑރ. މުހައްމަދު އަލީ ވެސް ރޭ ތުރުކިޔޭ ފުރާވަޑައިގެންފައިވާއިރު، ފުރުމުގެ ކުރިން ފޭސްބުކުގައި އޭނާ ކޮށްފައިވާ ޕޯސްޓެއްގައި ވިދާޅުވީ ތުރުކީއަށް ވަޑައިގަންނަވަނީ އެތާގެ ހާލަތު ދެނެގަތުމަށާއި އަދި ކިތަންމެ ކުޑަ ނަމަވެސް އެހީއެއް ވެދެވެން އޮތް ވަރަކަށް ވެދިނުމަށް ކަމަށެވެ.

"ދިވެހިރާއްޖެއަކީ ކިތަންމެ ކުޑަ ގައުމެއް ކަމުގައި ވިޔަސް، އަޅުގަނޑުމެންނަކީ ހާލުގައިޖެހިފައި ތިބި ބަޔަކަށް އެހީވުމުގައި އެންމެ ކުރީ ސަފުގައި ތިބޭ ބައެއް،" ޑރ. މުހައްމަދު ޢަލީ ވިދާޅުވި އެވެ.

ޑރ. މުހައްމަދު ޢަލީގެ މި ޕޯސްޓް ހިއްސާކުރަމުން އައިއޭސީން ވަނީ، ޑރ. ގެ އަމިއްލަ އިސްނެންގެވުމާ އެކު އެޓީމާއި ބައިވެރިވުމަށް ނިންމިކަމީ އުފާ ކުރާ ކަމަށް ބުނެފައެވެ. 

ޑރ. މުހައްމަދު އަލީ މީގެ ކުރިން ވެސް އައިއޭސީގެ ޓީމާއި އެކު ހާލުގައި ޖެހިފައިވާ ފަރާތްތަކަށް އެހީތެރިކަން ފޯރުކޮށްދިނުމުގައި ޢަމަލީގޮތުން ހަރަކާތްތެރިވެފައިވެއެވެ. އެގޮތުން މިދިޔަ އޮކްޓޯބަރު މަހު ބަންގްލަދޭޝްއަށް ދަތުރުކުރައްވައި އެގައުމުގައި ތިބި ރޮހިންޖާ ރެފިއުޖީން ބެލުމުގެ މެޑިކަލް ކޭމްޕެއް ހިންގެވި އެވެ.

ބިންހެލުމާއި ގުޅިގެން ހާލުގައި ޖެހިފައިވާ މީހުންނަށް އެހީވުމަށް އައިއޭސީގެ އެމެޖެންސީ ރިލީފް ފަންޑު ހުޅުވާލީ މިދިޔަ އަންގާރަ ދުވަހުގެ ރޭގައެވެ. އެ ފުރުސަތު ހުޅުވާލިތާ 24 ގަޑިއިރު ނުވަނީސް 1 މިލިއަން ރުފިޔާ ޖަމާވި ކަމަށް އައިއޭސީ އިން ބުނެފައިވެ އެވެ. އަދި، އޭގެ ތެރޭގައި ގިނައީ 50 ރުފިޔާ އަދި 100 ރުފިޔާ ފަދަ މަދު އަދަދުތަކުން ގިނަ ބަޔަކު ހަދިޔާކުރި ފައިސާ ކަންވެސް އެ ޖަމިއްޔާއިން ވަނީ ފާހަގަ ކޮށްފައެވެ. 

ބިންހެލުމުގައި ހާލުގައި ޖެހިފައިވާ މީހުންނަށް ބޭނުންވާ ޒަރޫރީ އެހީތައް ފޯރުކޮށްދިނުމަށް އައިއޭސީއިން ކުރަމުންދާ މަސައްކަތަށް އެހީވުމުގެ ފުރުސަތު އަދިވެސް ވަނީ ހުޅުވާލައިފަ އެވެ. އެގޮތުން އެހީވާން ބޭނުންވާ ފަރާތްތަކުން އަންނަނިވި އެކައުންޓަށް ފައިސާ ޖަމާކުރެވޭނެ ކަމަށް އައިއޭސީއިން ބުނެއެވެ. 

7.8 މެގްނެޓިޔުޓް ބާރު މިނުގައި ތުރްކިޔޭގެ ދެކުނަށާއި ސީރިޔާގެ އުތުރަށް އައި ބިންހެލުމުގައި ބޮޑެތި ޢިމާރާތް ތަކެއް ވަނީ ވެއްޓީ ބިމާއި ހަމަވެފައެވެ. އިމާރާތް ތަކުގެ ދަށުވެފައި އެތަށް ބަޔަކު ތިބި އިރު، ބިން ހެލުމުގެ ސަބަބުން އެތައް ބަޔަކު ވަނީ މަގުމަތިވެފައެވެ.

އެމެރިކާގެ ޖިއޮލޮޖިކަލް ސާވޭ އިން ދައްކާގޮތުން މި ބިންހެލުން އުފެދިފައިވަނީ ގަޒިއަންޓެޕް ކިޔާ ހިސާބާއި 20 މޭލު ކައިރިން ކަމަށާއި އަދި ބިން ހެލުން އަތުވެފައިވަނީ 11 މޭލު އަޑިން ކަމަށެވެ. 6.7 މެގްނެޓިޔުޓް ގައި އައިކަމަށް ރިކޯޑް ކުރެވިފައިވާ ބިންހެލުން ހުއްޓުމަށްފަހު އޭގެ އަސަރު 10 މިނިޓަށް ދެމިގެން ދިޔަ ކަމަށެވެ. އަދި ބިންހެލުމުގެ އިހްސާސް ސައިޕްރަސް އާއި ލުބްނާން ވަނީ ކޮށްފައިކަމަށެވެ.