އަމީނީ އަދިވެސް ހަދަމުންދަނީ މަގުގެ ފުޅާމިން ހަނިވާ ގޮތަށް ކަމަށާ އޭގެ ސަބަބުން މަގުގައި ދެކޮޅަށް ދުއްވަން ދާއިމީ ގޮތެއްގައި ދަތިވާނެ ކަމަށް މާލެ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު ވިދާލުވެއްޖެ އެވެ.
އަމީނީމަގު ހަދަމުންދާގޮތުން މަގުގެ ތޮއްޖެހުން އިތުރަށް ގޯސްވާނެކަމަށް ވިދާޅުވެ މީގެ ކުރިންވެސް ޑރ. މުޢިއްޒު ވަނީ ކަންބޮޑުވުން ފާޅުކުރައްވައިފައެވެ. އެގޮތުން މުޢިިއްޒު ވިދާޅުވީ އަމީނީމަގު ހަދަމުންދަނީ ޕޭވްމަންޓް ވަރަށްފުޅާކޮށް، މަގުގެ ދުއްވަން އޮންނަބައި 25 ފޫޓުން 21 ފޫޓް 10އިންޗިއަށް ހަނިކޮށްކަމަށާއި މިކަމުގެ ސަބަބުން މަގުގެ ތޮއްޖެހުން އިތުރަށް ގޯސްވާނެކަމަށް ފެންނަ ކަމަށެވެ.
އެ މައްސަލާގައި މިއަދު މޭޔަރ ކުރެެއްވި އެހެން ޓުވީޓެއްގައި މުއިއްޒު ވިދާޅުވީ އަމީނީ މަގުގެ މަސައްކަތް އިންތިހާއަށް ލަސްކޮށް، އަދި އެހާމެ އަގުބޮޑުކޮށް ހަދަމުންދާއިރު، މަގުގެ ފުޅާމިނުން 3 ފޫޓް 2 އިންޗި ހަނިކޮށް ހަދާ ހެދުމަށް އަދިވެސް ބަދަލު ނުގެންނަ ކަމަށެވެ.
"[އެކަމަށް ބަދަލު ނުގެނައުމަކީ] ޕަބްލިކް ޓްރާންސްޕޯޓު ބަސްތައް އަދި ޓޫވޭ ޓްރެފިކަށް ކުރިމަތިވާ ދާއިމީ ދަތިކަމެއް،" ޑރ. މުއިއްޒު ވިދާޅުވި އެވެ
މާލޭގެ މަގު ހެދުމުގެ މަޝްރޫޢު އަކީ ނިމިދިޔަ ކައުންސިލާއި އާރްޑީސީ އާއި ދެމެދު ވެވިފައިވާ އެއްބަސްވުމެއްގެ ދަށުން ކުރިއަށް ގެންދިއުމަށް ނިންމި މަޝްރޫޢުއެކެވެ.
އެހެން ނަމަވެސް 4 ވަނަ ދައުރުގެ ޕީޕީއެމް މެޖޯރިޓީ އޮތް ކައުންސިލް އިންތިޚާބުވެ އެދެވޭ ހެޔޮ ބަދަލުތަކާއިއެކު 39 މިލިއަން ރުފިޔާއަށް މި މަޝްރޫއު ނިންމޭނެކަމަށް ކަނޑައަޅާފައިވަނިކޮށް ސަރުކާރުން ވަނީ މި މަޝްރޫޢު މާލެ ސިޓީ ކައުންސިލްގެ އަތުން އަތުލައި، ކުރިން މި މަޝްރޫޢު ހިންގުމަށް އެއްބަސްވެފައިވާ އަގުގެ އެތައްގުނައެއް އަގުބޮޑުކޮށް 84 މިލިއަން ރުފިޔާއަށް އާރްޑީސީ އާއި ހަވާލުކޮށްފައެވެ.
މާލެ ސިޓީ ކައުންސިލާއި އާރްޑީސީ އާއި ދެމެދު ހެދިފައިވާ އެއްބަސްވުމާއި ޚިލާފަށް މާލޭގެ މަގުހެދުމުގެ މަޝްރޫޢު ކައުންސިލް އަތުން އަތުލާ ކޮރަޕްޝަނަށް މަގުފަހިވާގޮތަށް މަޝްރޫޢު ކުރިއަށް ގެންދަވާތީ ކައުންސިލުން ވަނީ މިކަމުގެ ކަންބޮޑުވުން ކަމާއި ގުޅުންހުރި އިދާރާތަކަށްވެސް ހުށަހަޅާފައެވެ.
Advertisement
This content is created and paid for by advertisers and does not involve Voice Journalists
