މި އަހަރު ބާއްވާ ރިޔާސީ އިންތިޚާބުގައި ރައީސް ޞާލިހުގެ ވެރިކަން ނިންމާ ސިއްކަ ޖަހާނެކަމަށް އިދިކޮޅު އިއްތިހާދު ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ. 

އަބްދުއްރަހީމް މިފަދައިން ވިދާޅުވެފައި ވަނީ ޕީޕީއެމް އޮފީސް ދޮރުމަތީގައި ބޭއްވި ޖަލްސާއެއްގައި ވާހަކަދައްކަވަމުން ނެވެ. 

އަބްދުއްރަހީމް ވިދާޅުވީ ރައީސް ޔާމީން އަނބުރާ ވެރިކަމަށް ގެނައުމުގެ މަސައްކަތް އިދިކޮޅުން ކުރަމުންދަނީ ދިވެހި ވަންތަ ވެރިކަމެއް މި ގައުމުގައި އުފެއްދުމަށްކަމަށެވެ. އަދި އިންޑިއާގެ ނުފޫޒުން މި ގައުމު ސަލާމަތްކޮށް ގައުމުގެ ސިޔާދަތީ ބާރުތައް ނެގެހެއްޓުމަށް ކަމަށެވެ. 

އޭނާ ވިދާޅުވީ ގާނޫނީ އިމުގެ ތެރެއިން ރައީސް ޔާމީން ވެރިކަމަށް ގެންނާނެކަމަށެވެ. އަދި މި އަހަރު އޮންނަ ރިޔާސީ އިންތިޚާބުގައި ރައީސް ޞާލިހުގެ ވެރިކަން ނިނުމަކަށް ގެނެސް އެ ވެރިކަމުގައި ސިއްކަ ޖަހާނެކަމަށެވެ. 

އަބްދުއްރަހީމް ވަނީ ޕީޕީއެމްއާއި ރައީސް ޔާމީންގެ ސަޕޯޓަރުން މާޔޫސް ނުވުމަށް އިލްތިމާސް ކުރައްވާފަ އެވެ.

ރައީސް ޔާމީން ހުންނެވީ ސާބިތުކޮށް ކަމަށާއި، އެމަނިފާނު ހައިކޯޓު މަރުހަލާއިން މިނިވަންވެވަޑައިގަންނަވާނެ ކަމުގެ ޔަގީންކަން ރައީސް ޔާމީންގެ ގާނޫނީ ޓީމުން ދެއްވާއިރު ރައްޔިތުންވެސް ސާބިތުކަމާއެކު ތިއްބެވުމަށް އަބްދުއްރަހީމް ވަނީ އެދިލައްވާފަ އެވެ. 

އޭގެ އިތުރުން އަބްދުއްރަހީމް ވަނީ ރައީސް ޔާމީން މިނިވަންކުރުމަށް ގޮވާލާ އިދިކޮޅުން ސިލްސިލާގޮތެއްގައި ކުރިއަށް ގެންދާ ހަރަކާތްތަކުގައި ވީހާވެސް ގިނަ މީހުން ބައިވެރިވެވަޑައިގަތުމަށް ގޮވާލައްވާފަ އެވެ.