މިއަހަރު މާލެ ސަރަހައްދުގެ ފަގީރުންނާއި މިސްކީނުންގެ ދަފުތަރުގައި ޖެހެން ނަންނޯޓްކޮށްފައިވާ ފަރާތްތަަކުގެ ތެރެއިން އެ ދަފުތަރުގައި ނަން ނެތިގެން، އެކަމުގެ ޝަކުވާއެއް ހުށަހަޅަން އެދޭ ފަރާތަތަކަށް އެ ފުރުސަތު ހުޅާލައިފި އެވެ.

އިސްލާމިކް މިނިސްޓްރީން އިއްޔެ ކުރި އިއުލާނެއްގައި ބުނީ މާލެ، ހުޅުމާލެ އަދި ވިލިމާލޭގައި ދިރިއުޅޭ މީހުންގެ ތެރެއިން ފަގީރުންގެ ދަފުތަރުގައި ރަޖިސްޓްރީ ވާން ، 22 ޑިސެމްބަރު ، 2022 އިން 19 ޖެނުއަރީ 2013 އަށް ފޯމު ހުށަހެޅި ފަރާތްތަކަށް މިހާރު ޖަވާބު މެސެޖްކޮށްފައި ކަމަށެވެ.

އަދި ފަގީރުންގެ ދަފުތަރުގައި ނަން ނެތިގެން ޝަކުވާ ހުށަހަޅަން އެދޭ ފަރާތްތަކަށް އެ ފުރުސަތު އޮންނާނީ މިހަފުތާގެ ބުރާސްފަތި ދުވަހާ ހަމައަށް (16 ފެބްރުއަރީ އާ ހަމައަށް) ކަމަށް ވެސް އެ އިއުލާނުގައި ބުންޏެވެ.

Advertisement

އެގޮތުން ޝަކުވާ ހުށަހަޅަން ބޭނުންވާ ފަރާތްތަކުން މިނިސްޓްރީގެ ކައުންޓަރަށް، ލިއުމުން ހުށަހަޅައިގެން ނުވަތަ އީމެއިލް މެދުވެރިކޮށް ޝަކުވާ ހުށަހެޅޭނެ ކަމަށް ބުނެފައިވެއެވެ. އީމެއިލް މެދުވެރިކޮށް ޝަކުވާ ހުށަހަޅާނީ [email protected] އަށް ކަމަށްވެސް އިއުލާންގައި ވެއެވެ. 

އީމެއިލް މެދުވެރިކޮށް ޝަކުވާ ހުށަހަޅާ ނަމަ މެއިލްގެ ސަބްޖެކްޓްގައި ޝަކުވާ ހުށަހަޅާ މީހާގެ ނަމާއި، އައިޑީކާޑް ނަމްބަރު އަދި ފޯމު ނަމްބަރު ޖަހަން މިނިސްޓްރީން ބުނެފައިވެއެވެ.

މީގެ އިތުރުން އެ މިނިސްޓްރީން ބުނީ، ޝަކުވާ ހުށަހަޅަން ދީފައިވާ މުއްދަތުގެ ފަހުން އެއްވެސް ޝަކުވާއެއް ބަލައިނުގަންނާނެ ކަަމަށެވެ.