އާއިލާއާއެކު އިންޑިއާއަށް ބޭސްފަރުވާ ކުރުމަށް ގޮސް ހުއްޓާ ޕީޕީއެމް ހުޅުމާލެ ދާއިރާގެ ރައީސް އަބްދުއް ސަމަދު (ސަމަދުބެ) ހިފެހެއްޓި މައްސަލަ ބަލަމުންދާ ކަމަށް ފޮރިން މިނިސްޓްރީން ބުނެފިއެވެ. 

މިމަހުގެ 11 ވަނަ ދުވަހު ސަމަދުބެ ހައްޔަރުކޮށްފައިވަނީ ބެންގަލޫރުގެ މަނިޕާލް ހޮސްޕިޓަލިގެ ތެރެއިންކަމަށް "ވޮއިސް" އަށް ވަނީ މައުލޫމާތު ދީފައެވެ. އޭނާ ހައްޔަރުކުރުމުގައި ހަރަކާތްތެރި ވެފައިވަނީ އިންޑިއާގެ އިމިގްރޭޝަން އޮފިސަރުންތަކެ ކެވެ. 

ސަމަދުގެ އިންޑިއާއަށް ދިޔައީ އާއިލާގެ އިތުރު 3 މީހުންނާއެކު އެންމެން ޑޮކްޓަރަށް ދެއްކުމަށް މިމަހު 10 ވަނަ ދުވަހުއެވެ. އަދި އޭނާ އިންޑިއާއަށް ދިޔައިރު، އެއާޕޯޓުން އެއްވެސް މައްސަލައެއް ޖެހިފައެއް ނުވެއެވެ. 

Advertisement

އެހެން ނަމަވެސް ހޮސްޕިޓަލުގައި ހުއްޓާ އޭނާ ހައްޔަރުކޮށް ޑީޕޯޓު ކުރުމުގެ މަސައްކަތް މިހާރު ކުރަމުންދާކަމަށް އާއިލާއިން ވަނީ މައުލޫމާތު ދީފަ އެވެ. 

އެކަމާއި ގުޅިގެން ފޮރިން މިނިސްޓްރީން ބުނީ، ބެންގަލޫރުގައި ހުރި ދިވެއްސަކު 11 ފެބްރުއަރީ 2023ގައި އިންޑިއާގެ އިމިގްރޭޝަން އޮފިސަރުންގެ ބެލުމުގެ ދަށަށް ގެންގޮސްފައިވާ ކަމުގެ މަޢުލޫމާތު ލިބުމާ ގުޅިގެން، މިމައްސަލައާ ގުޅޭ ގޮތުން އިތުރަށް ސާފުކުރަންޖެހޭ ކަންކަން އިންޑިއާގެ ކަމާބެހޭ ފަރާތްތައް މެދުވެރިކޮށް ސާފުކުރަމުންދާ ކަމަށެވެ. 

މި މައްސަލަ އާއި ގުޅިގެން އިތުރު މައުލޫމާތެއް ފޮރިން މިނިސްޓްރީން ދީފައި ނުވާއިރު، ސަމަދުބެ އަކީ "އިންޑިއާ އައުޓް" ހަރަކާތުގައި ވެސް ވަރަށް އިސްކޮށް ހަރަކާތްތެރިވާ މީހެއްކަން ފާހަގަކޮށްލަން ޖެހެ އެވެ.