މިމަހު 6 ވަނަދުވަހު ތުރުކިޔޭ އަދި ސީރިއާއަށް އައި ބާރުގަދަ ބިންހެލުމާއި ގުޅިގެން އިމާރާތް ތަކުގެ ދަށުވެފައިވާ މީހުން ސަލާމަތް ކުރުމުގެ މަސައްކަތް އަދިވެސް ކުރެވެމުންދާއިރު އެގޮތުން ސަލާމަތްކުރެވުނު އަންހެނަކު އޭނާ އިމާރާތް ތަކުގެ ދަށުގައި ތާށިވެފައި އޮތް އިރު ކުރަމުން ދިޔަ ދުޢާ ހާމަކޮށްފި އެވެ. 

ތުރްކިޔޭ އާއި ސީރިޔާ އަށް އައި ބާރުގަދަ ބިންހެލުން ތަކުގައި ދެޤައުމުން ނިޔާވި މީހުންގެ ޢަދަދު މިހާރު ވަނީ 29000 އަށް އަރާފައެވެ. އެގޮތުން ތުރްކިޔޭ އިން މިހާތަނަށް 24700 މީހުން ނިޔާވެފައިވާއިރު ސީރިޔާގެ 3500 މީހުން ވަނީ ނިޔާވެފައެވެ.

ސަލާމަތުން ގިނަ ބަޔަކު ފެނިދާނެ ކަމަށް ކުރަމުންދާ އުންމީދު ފަނޑުވި ނަމަވެސް ރެސްކިޔު ވޯކާސް ދަނީ ވެއްޓިފައިވާ އިމާރާތް ތަކުގެ ދަށުން މީހުން ސަލާމަތުން ނެރެވޭތޯ މަސައްކަތް ކުރަމުންނެވެ. ކާރިސާއަށް ފަސްދުވަސް ފާއިތުވި ފަހުންވެސް ބައެއް މީހުން ވަނީ ސަލާމަތުން ނެރެވިފައެވެ.

Advertisement

އެގޮތުން، ބިންހެލުމަށް 119 ގަޑިއިރު ވެދިޔަ ފަހުން އިމާރާތެއްގެ ދަށުވެފައިވާ އަންހެނަކު ސަލާމަތްކޮށްފައިވާއިރު، އެ އަންހެން މީހާ އާއި ހަވާލާދީ ބޭރުގެ ބައެއް ނޫސްތަކުން ވަނީ އޭނާ އިމާރާތުގެ ދަށުވެފައި ވަނިކޮށް ކުރަމުންދިޔަ ދުޢާ ހާމަކޮށްފައެވެ. 

އިމާރާތުގެ ދަށުގައި ގާތް ގަޑަކަށް 5 ގަޑިއިރު ހޭދަކުރި އެ އަންހެން މީހާ الله ސުބުޙާނަހޫވަތަޢާލާ އަށް ދުޢާ ދަންނަވަމުން ދިޔައީ ޔޫސުފް ޢަލައިހިއްސަލާމްގެ އަޚުން އެކަލޭގެފާނު ވަޅަކަށްލުމުން އެ ވަޅުގެ ތެރެއިން އެކަލޭގެފާނު ސަލާމަތް ކުރެއްވި ފަދައިން އޭނާވެސް އެ އިމާރާތުގެ ދަށުން ސަލާމަތް ކުރައްވާތޯއެވެ.   

މި ނޫންވެސް މިފަދަ އެތަކެއް ވާހަކަތަކެއް މިކާރިސާގައި ސަލާމަތްވި މީހުންގެ ފަރާތުން ރިޕޯޓް ކުރެވެމުންދާއިރު، އިމާރާތުގެ ދަށުގައި 104 ގަޑި އިރު ހޭދަކުރި ފިރިހެނެއް ސަލާމަތް ކުރިވަގުތު، ބަޤަރާ ސޫރަތުގެ ފަހު ދެ އާޔަތް އޭނާ ކިޔަވަމުންދިޔަ މަންޒަރު ފެންނަ ވީޑިއޯ އަކަށްވެސް ގިނަބައެއްގެ ސަމާލުކަން ހުއްޓުނެވެ. 

އެގޮތުން އޭނާ ކިޔަވަމުން ދިޔަ އާޔަތުގެ ބައެއްގެ މާނައިގައިވަނީ، އެއްވެސް އިންސާނަކަށް ނު އުފުލޭ ވަރުގެ ބުރައެއް މާތް الله ނުޖައްސަވާނެއޭ އެވެ.