ކިންގް ސަލްމާނު މިސްކިތް ރަސްމީކޮށް ނުހުޅުވި ލަސްވަނީ ސައުދީއިން ތާރީހެއް ނުދެއްވައިގެން ކަމަށް އިސްލާމިކް މިނިސްޓަރު ޑރ. އަޙްމަދު ޒާހިރު ޢަލީ ވިދާޅުވެއްޖެ އެވެ.
މިނިސްޓަރު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގައި މެމްބަރަކު ކުރެއްވި ސުވާލަށް ޖަވާބުދެއްވަމުން ނެވެ.
މިއަދުގެ މަޖިލީހުގެ ޖަލްސާގައި މެމްބަރަކު ވަނީ ކިންގް ސަލްމާނު މިސްކިތް ރަސްމީކޮށް ނުހުޅުވާ ސަބަބަކީ ކޮބައިތޯ މިނިސްޓަރު އަރިހުން އައްސަވާފަ އެވެ. އަދި ކިންގް ސަލްމާނު މިސްކިތުގައި ނުނިމި އެއްވެސް މަސައްކަތެއް ހުރިތޯ އައްސަވާ މެމްބަރު ސުވާލު ކުރެއްވި އެވެ.
މެމްބަރުގެ އެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ ސަލްމާނު މިސްކިތުގެ ހުރިހާ މަސައްކަތްތައް ވަނީ ނިމިފައި ކަމަށެވެ.
އެހެން ނަމަވެސް މިސްކިތް ރަސްމީކޮށް ނުހުޅުވި ލަސްވަނީ އެކި ފަހަރު ކުރެވުނު މަޝްވަރާތަކަށްފަހުވެސް ސައުދީއިން ރަސްމީ ތާރީހެއް މިހާތަނަށް ލިބިފައި ނުވާތީކަމަށް މިނިސްޓަރު ވިދާޅުވި އެވެ.
"ސަލްމާނު މިސްކިތް ހުޅުވުމާ ގުޅޭގޮތުން ކޯވިޑް އައުމުގެ ކުރިން، ފޮރިން މިނިސްޓްރީއާއި ރައީސް އޮފީހާއި މިނިސްޓްރީއާއި އެކީގައި މަޝްވަރާތަކެއް ކުރެވުނު އަދި އޭރު އޭގެ ދުވަސްކޮޅެއް ފަހުން ސައުދީގެ އިސްލާމިކް މިނިސްޓްރީގެ ބޭފުޅުންވެސް ރާއްޖެ ވަޑައިގެން ހުޅުވުމާއި ގުޅޭގޮތުން އެބޭފުޅުން ވަނީ މަޝްވަރާކޮށް ހުޅުވުމަށްޓަކައި ވަރަށް ބޮޑު ތައްޔާރީތަކެއް ވެވިފަ އޮތީ. ދެން އެހާ ހިސާބުން އޭގެ ފަހުން ދުވަހެއް ކަނޑައަޅުއްވާ މިނިސްޓްރީއަށް، ރާއްޖެއަށް އަންގާނެކަމަށް އެބޭފުޅުން ވިދާޅުވީ، ޑޭޓެއް ލިބުނީމަ ދައުލަތަށް އަންގާނޭކަމަށް އެބޭފުޅުން ވިދާޅުވީ.. އޭގެ ފަހުންވެސް އަޅުގަނޑުމެން މަސައްކަތް ކުރިން.. އެކަމަކު އަދި އެއްވެސް ޑޭޓެއް ނުލިބޭ ކޮން އިރަކު ކަމެއް ހުޅުވޭނީ"
އިސްލާމިކް މިނިސްޓަރު ޑރ އަހުމަދު ޒާހިރު އަލީ
ކިންގް ސަލްމާނު މިސްކިތަކީ ސަައުދީ ސަރުކާރުގެ ހިލޭ އެހީގެ ދަށުން ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ ޒައާމަތުގައި އަޅުއްވާދެއްވި މިސްކިތެކެވެ. މިއީ އެއްފަހަރާ 6000 މީހުންނަށް ނަމާދުކުރެވޭނެ ޖާގައިގެ ތަނަވަސް މިސްކިތެކެވެ.
އޭގެއިތުރުން މި މިސްކިތުގައި ކުތުބު ހާނާއަކާއި ޤުރުއާނާބެހޭ މަރުކަޒަކާއި މަލްޓި ޕާޕާސް ހޯލެއްގެ އިތުރުން ޖަލްސާ ކުރާ މާލަމެއް ގާއިމް ކުރެވިފައި ހުރެއެވެ.
އެ މިސްކިތް ނިމުނުތާ ގިނަ ދުވަސްތަކެއް ވެގެންދިޔައިރު ނުހުޅުވާ ދިގުލައިގެން ދިއުމާއި ގުޅިގެން އާންމުންގެ ބޮޑެތި ފާޑުކިޔުންތަކެއް އަމާޒުވުމުން ސަރުކާރުން ވަނީ އެ މިސްކިތް ވަގުތީގޮތުން ހުޅުވާ ބޭނުންކުރަން ފަށާފައެވެ.
Advertisement
This content is created and paid for by advertisers and does not involve Voice Journalists
