އިޒްރާއިލް ސިފައިން ޣައްޒާގައި ފަލަސްޠީނުގެ ރައްޔިތުން ދިރިއުޅެމުންދާ ސަރަހައްދަށް ވައިގެ ހަމަލާއެއްދީފިއެވެ.
އިޒްރާއިލުން ބުނެފައިވަނީ ޣައްޒާއަށް ދިން މި ހަމަލާއަކީ ހަފްތާބަންދުގައި ފަލަސްޠީނުން ދިން ރޮކެޓުހަމަލާއެއްގެ ރައްދުގައިދިން ހަމަލާއެއްކަމަށެވެ.
މިއަދު ހެނދުނު ޣައްޒާގައި އެތައްގޮވުމެއްގެ އަޑު އިވިފައިވެއެވެ. އިޒްރާއިލް ސިފައިން ބުނެފައިވަނީ އެއީ ހަމާސްގެ ހަނގުރާމަވެރިން ހޮނިހިރުދުވަހު ހަމަލާދިނުމަށް ބޭނުންކުރި ރޮކެޓު ހެދުމަށް ބޭނުންކުރި ރޯމެޓީރިއަލްސް ގޮވައިގެން އިވުނު އަޑުތަކެއް ކަމަށެވެ.
ހަމާސް އިން ދިންކަމަށް ބުނާ ރޮކެޓް ހަމަލާގައި އެއްވެސް މީހަކަށް ޒަހަމްވެ އަނިޔާވެފައެއް ނުވެއެވެ. އަދި ފަލަސްޠީނުގެ އެއްވެސް ހަނގުރާމަވެރި ގްރޫޕަކުން މިކަމުގެ ޒިންމާވެސް ނަގައިފައެއް ނުވެއެވެ.
ރޭ ފަތިހު އިޒްރާއިލުން ނާބުލްސް އަށް ވަދެ ހިންގި މިލިޓަރީ ރެއިޑްގައި އެކަކު ޝަހީދުވެފައި ވާކަމަށް ފަލަސްޠީނުގެ ރެޑްކްރޮސެންޓުން ވަނީ ބުނެފައެވެ. ފަލަސްޠީނުން ރޮކެޓް ހަމަލާއެއް ދިން ކަމަށް ބުނެ ވާހަކަދެއްކި އިޒްރާއިލްގެ މިލިޓަރީ އިން ނާބުލްސް ގައި ހިންގި މިލިޓަރީ ރެއިޑާއި މެދު އެއްޗެއް ބުނެފައެއް ނުވެއެވެ.
މި އަހަރުގެ މިހާތަނަށް އިޒްރާއިލުން ފަލަސްޠީނުގެ 42 މީހަކު ވަނީ ޝަހީދުކޮށްލައިފައެވެ. އަދި އިޒްރާއިލްގެ 10 މީހަކުވެސް އެމުއްދަތުގެ ތެރޭގައި މަރުވެފައިވެއެވެ.
Advertisement
This content is created and paid for by advertisers and does not involve Voice Journalists
