ދިވެހި ދައުލަތުން ނަގާފައިވާ ދަރަނި އަނބުރާ ދެއްކުމާއި ގުޅޭގޮތުން ރައްޔިތުންގެ މަޖިލީހުން ހުށައަޅާފައިވާ ކަންތައްތަކާއި އެއްގޮތަށް ދަރަނި އަދާކުރުމުގެ ކަންކަން ސަރުކާރުން ކުރިއަށް ގެންދިއުމަށް ގޮވާލާ ގަރާރެއް ހުށައަޅައިފި އެވެ.
މި ގަރާރު ހުށައަޅުއްވާފައި ވަނީ މަޖިލީހުގެ ނައިބު ރައީސާ އަދި ގަލޮޅު އުތުރު ދާއިރާގެ މެމްބަރު އީވާ އަބްދުالله އެވެ.
އީވާގެ ގަރާރުގައި ވަނީ އެއީ ދިވެހި ދައުލަތުން ދަރަނިވެރި ވެފައިވާ މިންވަރާއި ދަރަނި ބެހެއްޓިފައިވާ ގޮތާއި އަދި އެ ދަރަނި އަނބުރާ ދެއްކުމަށް ދިވެހި ދައުލަތުގެ އާމްދަނީ ޖާގަ ދޭނެ މިންވަރު ދެނެގަތުމުގައި އަމަލު ކުރާނެ އިރުޝާދެއްގެ ގޮތުގައި ރައްޔިތުންގެ މަޖިލީހުން ފާސްކޮށްފައިވާ ރިޕޯޓްގައި ދައުލަތުގެ ދަރަޖި ރީސްޓްރަކްޗާކޮށް ދަރަނި ބެލެހެއްޓުމަށް ސަރުކާރުން ކުރަމުންދާ މަސައްކަތް އިތުރަށް ހަރުދަނާ ކުރުމާ ގުޅޭގޮތުން ރައްޔިތުންގެ މަޖިލީހުގެ ހުށައެޅުންތަކުގައިވާ ކަންކަން ކުރުމަށް ސަރުކާރަށް ގޮވާލާފަ އެވެ.
އީވާގެ ގަރާރުގައި ވަނީ 2013 އިން 2018 އަށް ދައުލަތުން ނަގާފައިވާ ދަރަނިތަކާއި ވޭތުވެދިޔަ ފަސް އަހަރުގެ ތެރެގައި ދައުލަތުން ނަގާފައިވާ ދަރަނިތައް ރީސްޓްރަކްޗާކޮށް ދައުލަތުން ދަރަނި އަނބުރާ ދެއްކުމާއި ގުޅޭގޮތުން މަޖިލީހުން ފާސްކޮށްފައިވާ ހުށައެޅުންތަކުގައިވާ ކަންކަން ކުރުމަށް ސަރުކާރަށް ގޮވާލާފައިވެއެވެ.
2013 ވަަނަ އަހަރާއި 2018 ވަނަ އަހަރާ ދެމެދު ދިވެހި ދައުލަތުން ދަރަނިވެރި ވެފައިވާ މިންވަރާއި ދަރަނި ބެހެއްޓިފައިވާ ގޮތާއި އަދި އެ ދަރަނި އަނބުރާ ދެއްކުމަށް ދިވެހި ދައުލަތުގެ އާމްދަނީ ޖާގަ ދޭނެ މިންވަރު ދެނެގަތުމުގައި އަމަލު ކުރާނެ އިރުޝާދަކަށް އެދި އޮގަސްޓް 10، 2020 ގައި ރައްޔިތުންގެ މަޖިލީހުގެ ރިޔާސަތުން ހުށައެޅި މައްސަލަ މުޅި މަޖިލީހުގެ ކޮމެޓީން ދިރާކޮށް ނިންމި ގޮތުގެ ރިޕޯޓް އޮގަސްޓް 27، 2020 ގައި މަޖިލީހުން ވަނީ ފާސްކޮށްފައެވެ.
އެ ރިޕޯޓްގައި އޭރު ދައުލަތުގެ ދަރަނީގެ ހާލަތާއި 2013 އިން 2018 އަށް ދައުލަތް ދަރަނިވެރި ވެފައިވާ މިންވަރާއި އެ ދަރަނި ބެލެހެއްޓިފައިވާ ގޮތާއި އަދި ތިން އަހަރުގެ ތެރޭގައި އެ ދަރަނި އަނބުރާ ދެއްކުމަށް ދައުލަތުގެ އާމްދަނީ ޖާގަ ދޭނެ މިންވަރު ދެނެގަތުމާއި ދަރަނި ބެލެހެއްޓުމަށް ސަރުކާރުން ކުރާ މަސައްކަތް އިތުރަށް ހަރުދަނާ ކުރުމާ ގުޅޭގޮތުން ސަރުކާރަށް ލަފާ ދީފައިވެއެވެ.
ރައްޔިތުންގެ މަޖިލީހުގައި ތިއްބަވާ އެމްޑީޕީގެ މެމްބަރުންގެ ތެރެއިން ރައީސް ނަޝީދަށް ތާއީދުކުރައްވާ މެމްބަރުން ގެންދަވަނީ ސަރުކާރުގެ ޚަރަދުތައް ބޮޑުވަމުންދާ މައްސަލައިގައި ކަންބޮޑުވުން ފާޅުކުރަމުން ނެވެ.
އޭގެ އިތުރުން ދައުލަތުގެ ޚަރަދު އިންތިހާއަށް ބޮޑުވަމުންދާއިރު، ސިޔާސީ މަގާމުތަކަށް ބޮޑު ހޭދައެއް ކުރާ މައްސަލައިގައި އެ މެމްބަރުން ގެންދަވަނީ ސަރުކާރަށް ބޮޑެތި ފާޑުކިޔުންތަކެއް އަމާޒުކުރައްވަމުން ނެވެ.
Advertisement
This content is created and paid for by advertisers and does not involve Voice Journalists
