Advertisement

ރާއްޖޭގައި ތަފާތު ދީންތަކަށް ޖާގަ ހޯދައިދޭން ސަރުކާރުން މަސައްކަތް ކުރޭ: މުހައްމަދު އިސްމާއިލް

14 Feb 2023 | 10:01
މުހައްމަދު އިސްމާއިލް ޕީޕީއެމްގެ މުޒާހަރާގައި/ ފޮޓޯ: ވޮއިސް

ދިވެހިރާއްޖޭގައި ތަފާތު ދީން ތަކަށް ޖާގަ ހޯދައިިދިނުމަށް ސަރުކާރުން މަސައްކަތް ކުރާކަމަށް މަޖިލީހުގެ ހޯރަފުށީ ދާއިރާގެ ކުރީގެ މެމްބަރު އަދި އިދިކޮޅު އިއްތިހާދުގެ އެކްޝަން ޑިޕާޓުމަންޓުގެ ޗެއާ މޮހައްމަދު އިސްމާއިލް ތުހުމަތު ކުރައްވައިފި އެވެ. 

ޕީޕީއެމް އޮފީސް ދޮރުމަތީގައި އޮތް ޖަލްސާއެއްގައި ވާހަކަދައްކަވަމުން މުހައްމަދު އިސްމާއިލް ވިދާޅުވީ ސަރުކާރެއް އުފެއްދުމުގެ މަގްސަދާއި ރައީސް އިބްރާހިމް މުހައްމަދު ޞާލިހުގެ ސަރުކާރުން ޚިލާފުވެފައިވާ ކަމަށެވެ. 

އޭނާ ވިދާޅުވި ގޮތުގައި 2018 ވަނަ އަހަރުގެ ރިޔާސީ އިންތިޚާބުގައި ބޭރު ދުނިޔޭގެ ތާއީދު ހޯދުމަށް އެމްޑީޕީއިން ވަނީ އެމީހުންނަށް ވެރިކަމަށް އާދެވިއްޖެ ނަމަ ރާއްޖޭގައި ދީނީ މިނިވަންކަން ދޭނެކަމަށް ބުނެ ވައުދުވެފަ އެވެ. 

Advertisement

އެވާހަކަތައް އޭރު ރައްޔިތުންގެ ސަމާލުކަމަށް ޕީޕީއެމް-ޕީއެންސީ ކޯލިޝަނުން ގެނެސްފައިވާނެކަމަށް މުހައްމަދު އިސްމާއިލް ވިދާޅުވިއެވެ. އެއާއެކު ވެރިކަން ބަދަލުވުމުން މިހާރު ފެންނަމުން މިދަނީ ކުރިން ޕީޕީއެމް-ޕީއެންސީ ކޯލިޝަނުން ބުނިގޮތަށް މި ގައުމުގައި ދީނީ މިނިވަންކަން ގެނެސް، ތަފާތު ދީންތަކަށް ޖާގަ ހުޅުވާލުމަށް ސަރުކާރުން މަސައްކަތް ކުރާ މަންޒަރުކަމަށް މުހައްމަދު އިސްމާއިލް ވިދާޅުވި އެވެ. 

"2018 ގެ ރިޔާސީ ރޭހުގައި ރައީސް ޔާމީން ވާދަކުރަމުން ދިޔައިރުގައި އަނެއްކޮޅުގައި އޮތް ބޭފުޅުން ވާދަކުރަމުން ދިޔައިރުގައި އަޅުގަނޑުމެން މި ކޯލިޝަންގެ ޕޯޑިއަމްތަކުން ދައްކަމުން ދިޔައިމު އޭރުވެސް މި ގައުމުގެ ގޮނޑުދޮށްތަކުން މިޖަހާ ރީތި ރާޅުގެ އަޑު ކެނޑި އަދި މިސްކިތްތަކުން އެ ގޮވަމުންދާ ކެނޑުވުމަށްޓަކައި މިބޭފުޅުން މަސައްކަތް ކުރާނެއޭ. އެ މަންޒަރު މިވީ 4 އަހަރު ދުވަހުގެ ތެރޭގައި ވަރަށް ސާފުކޮށް ރައްޔިތުންނަށް ފެނިގެން ދާނެ"

އިދިކޮޅު އިއްތިހާދުގެ އެކްޝަން ޑިޕާޓުމަންޓުގެ ޗެއާ މުހައްމަދު އިސްމާއިލް 

ތަފާތު ދީންތަކަށް ޖާގަ ހޯދުމަށް ފުޅާދާއިރާއެއްގައި ސަރުކާރުން މަސައްކަތް ކުރާކަމަށް މުހައްމަދު އިސްމާއިލް ތުހުމަތުކުރައްވާފައިވާއިރު، އޭނާ ވިދާޅުވީ އިސްލާމް ދީނަށް ފުރައްސާރަ ކުރާ މީހުންނަށް މި ސަރުކާރުން ހިމާޔަތްދެމުން ދާ ކަމަށެވެ. 

ދީނަށް ފުރައްސާރަކުރުމާއި މިސްކިތުގެ ހުރުމަތް ކެނޑުމަކީ މި ސަރުކާރުގެ ކުރިމަތީގައި އެމީހެއް ގަދަރު އުފުލިގެންދާ ކަންކަމުގެ ގޮތުގައި އޭނާ ސިފަކުރެއްވި އެވެ. 

އޭގެ އިތުރުން މުހައްމަދު އިސްމާއިލް ވަނީ ރާއްޖޭގައި މަސާޖު ޕާލާތަކާއި ހަށިވިއްކާ ތަންތަން ހުޅުވާ އެތަންތަނުން ފުޅާ ދާއިރާއެއްގައި ވިޔަފާރި ކުރަމުންދާއިރު، ފުލުހުންގެ މުއައްސަސާއިން އެކަންކަން ހުއްޓުވުމަށް އެއްވެސް ފިޔަވަޅެއް ނާޅާކަން ފާހަގަކުރައްވާ ބޮޑެތި ކަންބޮޑުވުންތަކެއްވެސް ހިއްސާކޮށްފަ އެވެ. 

އޭނާ ވިދާޅުވީ މުޖުތަމައުގައި ފާހިޝް ކަންކަން އާންމު ވަމުންދާއިރު، ފުލުހުން ތިބީ އެކަންކަމަށް ލޯ މަރާލައިގެން ކަމަށެވެ. މިއަދު ފުލުހުން ކުރާހާވެސް ކަމަކީ، އިދިކޮޅުގެ މުޒާހަރާތައް ހުއްޓުވާ ރައްޔިތުންގެ އަނގަ ބަންދުކުރުންކަމަށް އޭނާ ވިދާޅުވިއެވެ. 

"ރާއްޖޭގައި އިސްލާމްދީނާއި ޚިލާފަށް އެތައް ކަންތައްތަކެއް ހިނގަމުން ދާއިރުގައި އެ މައްސަލަތައް، އެ ކަންތައްތައް ނުބެލި އަޅުގަނޑުމެންނަށް ގާނޫނު އަސާސީން ލިބިދީފައި ހުރި ހައްގުތަކެއްގެ ބޭނުން ކުރާތީވެ އެކަން ހުއްޓުވުމަށް ޕޮލިހުން ފޮނުވުމަކީ ހިތާމަކުރާ ކަމެއް"

އިދިކޮޅު އިއްތިހާދުގެ އެކްޝަން ޑިޕާޓުމަންޓުގެ ޗެއާ މުހައްމަދު އިސްމާއިލް 

ފުލުހުންގެ މުއައްސަސާގެ ބާރު ކަނޑުވާލާފައި އޮތް އޮތުމަކީ މި ސަރުކާރު ބަދަލުކުރަން ޖެހޭ އެއް ސަބަބުކަމަށް މުހައްމަދު އިސްމާއިލްގެ ވާހަކައިގައި ފާހަގަކުރެއްވި އެވެ. 

Advertisement

ކޮމެންޓް

Advertisement

Advertisement