މިނިސްޓްރީއަށް ދައްކަން ނުޖެހޭ ފީއެއް ދެއްކުނު ނަމަ, ކަމާއި ބެހޭ ފަރާތަކަށް ހުށަހަޅާ: ޑރ.މައުސޫމް
މިނިސްޓްރީއަށް ދައްކަން ނުޖެހޭ ފީއެއް ދެއްކުނުކަމަށް، ނުވަތަ ދައްކަންޖެހޭ ވަރަށް ވުރެ ބޮޑު އަދަދެއް ދައުލަތަށް ދައްކަން ޖެހުނު ނަމަ ކަމާއި ބެހޭ މުވައްސަސާތަކަށް މައްސަލަ ހުށަހަޅައިގެން ކުރިޔަށް ދިއުމުގެ ފުރުސަތު އޮންނާނެކަމަށް ޓޫރިޒމް މިނިސްޓަރު ޑރ. އަބްދުالله މައުސޫމް ވިދާޅުވެއްޖެ އެވެ.
މިނިސްޓަރު މިފަދައިން ވިދާޅުވީ މިހާރު ކުރިއަށްދާ ރައްޔިތުންގެ މަޖިލީހުގެ ޖަލްސާގައި މެދު ހެންވޭރު ދާއިރާގެ މެމްބަރު އަލީ އާޒިމް ކުރެއްވި ސުވާލަށް ޖަވާބު ދެއްވަމުންނެވެ.
އެގޮތުން އާޒިމް ވަނީ ސަރުކާރުން، ބުނަމުން ދަނީ ރައްޔިތުންގެ އަތުން ޓެކްސްއާއި، ފީ ނުވަތަ ޖުރިމަނާ ނެގޭނީ ގާނޫނުގައި ކަނޑައެޅިފައިވާ އަދަދުތަކުގެ ތެރެއިންކަން ފާހަގަކުރައްވައި އެއާއި ޚިލާފަށް ކަން ކުރަމުންދާ ކަމަށް ވިދާޅުވެފައެވެ.
އެގޮތުން، ޓޫރިޒަމްގެ ގާނޫނު ބުނާ ގޮތުން ނަމަ ކުންފުންޏެއްގެ ޝެއާއެއް، ނުވަތަ ނަން ބަދަލު ކުރާނަމަ، ދައްކަންޖެހޭނީ 10،000 ޑޮލަރުކަމަށާ، އެހެންނަމަވެސް، އެގޮތުން ބަދަލުކުރާ ކޮންމެ ފަހަރަކު ވެސް އެއް ލައްކަ ޑޮލަރު ނަގަމުންދާ ކަމަށް އޭނާ ވިދާޅުވި އެވެ.
އަދި އެކަންކަމަކީ ގާނޫނާއި ޚިލާފް ކަމެއް ކަމަށް މަޖިލީހުގެ ކޮމިޓީ ތަކުގައި ކަމާއި ގުޅޭ ގާނޫނީ ވަކީލުންވެސް ވިދާޅުވެފައިވާއިރު އެކަން އެގޮތަށް މި ދައުރުގައިވެސް ހިނގަމުންދާ ކަމަށާ، އެފަދަ ކަންކަން މިނިސްޓްރީގެ ތެރެއިން ހުއްޓޭނެ ގޮތަކާއި އަދި އެ ބަދަލު ގެންނަކަމަށް ވާނަމަ ކުރިން ބޮޑެތި ފީތައް މިނިސްޓްރީއަށް ދައްކާފައި ހުރި ކުންފުނިތަކާއި މީހުންނަށް އެ ފައިސާ އަނބުރާ ލިބޭނެ ތޯ އާޒިމް ސުވާލު ކުރެއްވި އެވެ.
އާޒިމްގެ ސުވާލަަށް ޖަވާބު ދެއްވަމުން މިނިސްޓަރު ވަނީ މިހާރު އެފަދަ ފީތައް ނުނަގާ ކަމަށް ވިދާޅުވެފައެވެ. އަދި ކުރިން ފައިސާ ބޮޑު އަދަދަކުން ދައްކާފައި ހުރި ބަޔަކަށް އެ އަނބުރާ ދެވޭނީ ގާނޫނަކުން ނުވަތަ ގަވައިދަކުން އެގޮތަށް ކަނޑައެޅުމުންކަމަށްވެސް މިނިސްޓަރު ވިދާޅުވި އެވެ.
”ކުރިން އެފަދަ ފީތައް ނަގަމުން އައި. އެކަމަކު މިހާރު، އަޅުގަނޑު އުފަލާއި އެކު ދަންނަވަން. އެފަދަ ފީތަކެއް މިހާރު ނުނަގާނެ. ކުންފުންޏެއްގެ ޝެއާ ބަދަލު ކުރާއިރު މިހާރު ޓުރިޒަމް މިނިސްޓްރީ ކައިރީ އަހާކަށް ވެސް ނުޖެހޭނެ. ޓޫރިޒަމް މިނިސްޓްރީން މިދަނީ ފަހި ކުރާ މިނިސްޓްރީއެއްގެ ގޮތުގައި ރައްޔިތުންނަށް ހިދުމަތް ދެމުން. ދެން ފަހުން ތި ކުރެއްވި ސުވާލުގެ ޖަވާބުގައި، ގާނޫނަކަށް ގަވާއިދަކަށް އަންނަ ބަދަލަކާއި ގުޅިގެން، މާޒީގައި ހިނގާފައި އޮތް ކަމަކާ ބެހޭގޮތުން، އަޅުގަނޑު ހިތުން، ހައްގެއް ގެއްލިފައި އޮތް ކަމަށް ގަބޫލު ކުރެވޭ ހާލަތުގައި، އެކަމާއި ގުޅޭ ފަރާތްތަކަށް ވަޑައިގަތުން ރަނގަޅު ވާނެ ކަމަށް ފެނޭ."
ޑރ. މައުސޫމް
މިނިސްޓަރުގެ ޖަވާބާއި ގުޅިގެން ނިޒާމީ ނުކުތާއެއް ނަންގަވައި އާޒިމް ވަނީ، ޑރ. މައުސޫމް ވަޒީރުކަމާއި ހަވާލުވީ ފަހުން، ވެސް އެއްލަކަ ރުފިޔާ ފީއެއްގެ ގޮތުގައި ނަގާފައި ހުރިކަމާއި އެފަދައިން ކަން ނުކުރާ ކަމަށް ވިދާޅުވި ނަމަވެސް ފަހަކާއި ޖެހެންދެން އަމަލު ކުރަމުން އައި ގޮތަކީވެސް އެއީކަމަށް ވިދާޅުވެފައެވެ. އަދި އެކަން އެފަދައިން ކޮށްފައި އެވަނީ ގާނޫނު އަސާސީގައިވާ ގޮތާއި ޚިލާފަށް ކަމަށް ވާއިރު، އޭގެ ބަދަލު އެ ރައްޔިތުންނަށް ލިބެންޖެހޭނެ ކަމަށްވެސް އޭނާ ވިދާޅުވި އެވެ.
ޖަވާބުގައި އަނެއްކާވެސް މައުސޫމް ވިދާޅުވީ ނުހައްގުން އެއްވެސް މީހެއްގެ ހައްގެއް އެއީ މަޖިލީހުގެ މެމްބަރެއްގެ ހައްގެއް ނަމަވެސް އެ ނިގުޅައިގަނެފައިވާކަމަށް ގަބޫލު ކުރެވޭނަމަ ކަމާއި ގުޅޭ މުވައްސަސާތައް މެދުވެރިކޮށް އެ ހައްލު ލިބޭނެ ކަމަށެވެ.
"އެއްވެސް ރައްޔިތަކަށް އަދި ރައްޔިތުންގެ މަޖިލީހުގެ މެންބަރަކަށްވެސް ހައްގެއް ގެއްލިފައިވާ ކަމަށް، އަދި ނުހައްގުން އޭނާގެ އަތުން ފައިސާއެއް ނެގިފައިވާ ކަމަށް ގަބޫލުކުރެވޭ ނަމަ، އަޅުގަނޑު ހިތުން ކަމާއި ގުޅޭ އިދާރާތައް މެދުވެރިކޮށް އެ ހައްގު ހޯދުމުގެ ފުރުސަތު އޮންނާނެ." ޑރ. މައުސޫމް ވިދާޅުވި އެވެ.
Advertisement
Advertisement
Advertisement
This content is created and paid for by advertisers and does not involve Voice Journalists
