ރާއްޖޭގައި ހިންގާ އެކި މަޝްރޫޢުތަކުން އާމްދަނީ އިން ޓެކްސް ނެގުމުގެ ޤާނޫނުގެ ދަށުން އިސްތިސްނާ ދީފައިވާ މަޝްރޫޢުތަކުގެ ލިސްޓް ފިނޭންސް މިނިސްޓްރީން އިއުލާން ކޮށްފި އެވެ. 

ވިޔަފާރި މަޝްރޫޢުތަކާއި ދާއިރާތަކުން ލިބޭ އާމްދަނީ އިން ޓެކްސް ދެއްކުމުން ޙާއްޞަ އިސްތިސްނާ ދިނުމާބެހޭ ގަވާއިދު ގެ 7 ވަނަ މާއްދާގެ ދަށުން، އާމްދަނީން ޓެކްސް ނެގުމުގެ ޤާނޫނުގެ 1-12 ވަނަ މާއްދާގެ ދަށުން އާމްދަނީ އިން ޓެކްސް ދެއްކުމުން އިސްތިސްނާކުރުމަށް ރައީސުލްޖުމްހޫރިއްޔާ ކަނޑައަޅާ ފަރާތްތަކުގެ ދަފްތަރު މިއަދު ފިނޭންސް މިނިސްޓްރީން ވަނީ އިއުލާންކޮށްފަ އެވެ.

އެގޮތުން އެގޮތުން އިސްތިސްނާކޮށްފައިވާ ކުންފުނިތަކުގެ ތެރޭގައި ތިލަމާލެ ބުރިޖާއި އައްޑޫގެ މަގުހެދުމުގެ މަޝްރޫޢު ހިންގާ އެފްކޯންސް ކުންފުނި ހިމެނޭއިރު، ބުރިޖު މަޝްރޫޢާ ގުޅިގެން 16 ސެޕްޓެންބަރު 2021 ވަނަ ދުވަހުން ފެށިގެން 17 މޭ 2024 ވަނަ ދުވަހާ ހަމައަށް އެ ކުންފުންޏަށް ވަނީ އިސްތިނާ ދީފައެވެ. އަދި އައްޑޫ މަގުހެދުމާ ގުޅިގެން 26 މޭ 2021 ވަނަ ދުވަހުން 31 ޑިސެންބަރު 2024 ވަނަ ދުވަހާ ހަމައަށް އިސްތިސްނާ ދީފައިވެއެވެ. 

މީގެ އިތުރުން އައްޑޫ ސިޓީ ޑިވެލޮޕްމެންޓު މަޝްރޫޢަށް ކޮންސަލްޓެންސީ ދޭ އިންޑިއާ ދެ ކުންފުނިކަމަށްވާ އެލް އެންޑް ޓީ އިންފްރަސްޓްރަކްޗާ އިންޖިނިއަރިން ލިމިޓެޑްއާއި ލިއާ އެސޯސިއޭޓްސް ސައުތު އޭޝިއާ ޕްރައިމެޓް ލިމިޓެޑް ޖޭވީ އަށް އިންކަމް ޓެކުސް ޤާނޫނުން 26 މޭ 2021 އިން ފެށިގެން 31 ޑިސެންބަރު 2025 ވަނަ ދުވަހާ ހަމައަށް އިސްތިސްނާ ދީފައިވެއެވެ. 

ހަނިމާދޫ އެއާޕޯޓް އާއި ރާއްޖޭގެ އެކި ސަރަހައްދުތަކުގައި ފެނާއި ނަރުދަމާގެ މަސައްކަތް ކުރަމުން އަންނަ އިންޑިއާ ކުންފުންޏެއް ކަމަށްވާ ޖޭއެމްސީ ޕްރޮޖެކްޓްސްއަށް 2025 ވަނަ އަހަރާ ހަމައަށް އިސްތިސްނާ އިސްތިސްނާ ދީފައިވެއެވެ. އެގޮތުން، 2025 ވަނަ އަހަރުގެ މާރިޗު މަހާއި ހަމައަށް އިސްތިސްނާ ދީފައިވަނީ ފެނާއި ނަރުދަމާގެ މަސައްކަތް ތަކުގެ މަޝްރޫޢުތަކަށެވެ. އަދި އެ އަހަރުގެ އޮކްޓޯބަރު މަހަށް އިސްތިސްނާ ދީފައިވަނީ ހަނިމާދޫ އެއާޕޯޓް ގެ މަޝްރޫއަށެވެ. 

ހަމައެހެންމެ، 6 ރަށެއްގައި ނަރުދަމާގެ މަސައްކަތްކުރާ ވިޝްވަރާޖު އެންވަރަމެންޓް ޕްރައިވެޓް ލިމިޓެޑް 27 ޖުލައި 2021 ވަނަ ދުވަހުން ފެށިގެން 31 މާޗު 2025އާ ހަމައަށް އިންކަމް ޓެކްސް ޤާނޫނުން އިސްތިސްނާކޮށްފައިވެއެވެ.

މި ކުންފުނިތަކުގެ މަޝްރޫއުތަކަށް އިސްތިސްނާ ދިން ސަބަބެއް ކަމުގައި ފިނޭންސް މިނިސްޓްރީން ބުނީ، އެ ކުންފުނިތަކުން ހިންގާ މަޝްރޫޢުތައް ހިންގުމަށް ބޭނުންވާ ފައިސާ ހަމަޖެއްސުމާ ގުޅޭ ގޮތުން އިންޑިއާގެ އެގްޒިމް ބޭންކާއެކު ވެފައިވާ އެއްބަސްވުމުގެ ދަށުން އެ ކުންފުނިތަކުން ހިންގާ މަޝްރޫޢުތަކާ ގުޅިގެން ޓެކުސް ނެގުމުން އިސްތިނާކުރަންޖެހޭތީކަމަށެވެ.