ޑްރަގް އަކީ ވެރިންގެ ވިޔަފާރި ކަމަށް މާލެ ސިޓީގެ ކުރީގެ މޭޔަރު ޝިފާ މުހައްމަދު ވިދާޅުވެއްޖެއެވެ.

ރައްޔިތުންގެ އުނގޫފާރު ދާއިރާގެ މެމްބަރު އިބްރާޙިމް ވަހީދު މަޖިލީހުގައި ދެއްކެވި ވާހައެއްގެ ވީޑިއޯ އެއް ހިއްސާކޮށް ޝިފާ ކުރެއްވި ޓުވީޓެއްގައި ވިދާޅުވީ ސަރުކާރު މެމްބަރުންނޭ ކިޔައިގެން ތިއްބާ ޑިކްޓޭޓަރޝިޕަކަށް މިއަދުގެ ސަރުކާރު ބަދަލުވެފައިވާ ކަމަށެވެ. 

"އެމްޑީޕީ އުފެދުނީވެސް ގައުމު އިސްލާހު ކުރުމަށް އަދި އިންސާފު ހޯދުމަށް. ޑްރަގް އަށް ނޫނެކޭ ބުނަންޖެހޭ. ބެސްޓް ޕްރެކްޓިސް ކަމަށް ބުނެ ހުރިހާ އުނދަގުލެއް ތަހައްމަލު ކުރަނީ އާއްމު ރައްޔިތުން. ޑްރަގު އަކީ ވެރިންގެ ވިޔަފާރި." ޝިފާ ވިދާޅުވި އެވެ.

Advertisement

ޝިފާ ޓްވީޓް ކުރެއްވި ވީޑިއޯގައި ވަހީދު ވަނީ ކުޑަރަށެއް ބޮޑު ރަށެއް ތަފާތު ނުކޮށް މި ސަރުކާރުން މަޝްރޫއުތައް ހިންގަމުންދިޔަ ނަމަވެސް، އެއީ ހަމައެކަނި މެނިފެސްޓޯ ކަމުގައި ދެކި އެހެން އެއްވެސް ކަމެއް ނުކުރާ ކަމަށް ވިދާޅުވެފައެވެ.

އަދި ސަރުކާރު ޖަވާބްދާރީ ކުރެވޭނެ ނުވަތަ ޒިންމާދާރު ވެރިކަމެއް ހިންގޭނެ ނިޒާމެއް ގާއިމް ނުކުރެވޭ ކަމަށާއި، ސަރުކާރާއި ދެކޮޅަށް ވާހަކަ ދެއްކުމުން އެކަން އެގޮތަށް ނުކުރެވޭނެ ކަމަށް ސަރުކާރަށް ތާއީދު ކުރާ މެންބަރުން ބުނަމުންދާ ކަމަށްވެސް ވަހީދު ވަނީ ވިދާޅުވެފައެވެ.