މިދިޔަ ޖެނުއަރީމަހު މޯލްޑިވިއަން ޑިމޮކްރަޓިކް ޕާޓީ އެމްޑީޕީ ރިޔާސީ ކެންޑިޑޭޓު ހޮވުމަށް ބޭއްވި ރިޔާސީ ޕްރައިމަރީގެ އިންތިހާބު ބާތިލުކޮށް، އެ ޕާޓީގެ ރިޔާސީ ޓިކެޓު ރައީސުލްޖުމްހޫރިއްޔާ އިބްރާހީމް މުޙައްމަދު ސާލިހަށް އެރުވުން ހުއްޓުވަން ސިވިލް ކޯޓަށް މައްސަލައެއް ހުށަހަޅައިފިއެވެ.

މި މައްސަލަ ސިވިލް ކޯޓަށް ހުށަހެޅީ، ހެންވޭރު ދެކުނު ދާއިރާގެ ކުރީގެ މެމްބަރު އަދި މިހާރުގެ ޕޮލިސް ބޯޑުގައި އިންނަވާ ހާމިދު އަބްދުލްޣަފޫރެވެ. އޭނާގެ ވަކީލެއްގެ ގޮތުގައި ހަމަޖައްސާފައި ވަނީ ވަނީ ނަޝީދުގެ ސަރުކާރުގައި ބަންޑާރަ ނައިބުކަން ކުރެއްވި ފާތިމަތު ދިޔާނާ ސައީދުވެ.

އެމްޑީޕީން ރައީސް ސާލިހަށް ރިޔާސީ ޓިކެޓް ހަވާލު ކުރާ ޖަލްސާ ބާއްވަން ނިންމާފައިވަނީ 17 ފެބްރުއަރީވާ ހުކުރު  ދުވަހުގެރޭ (މާދަމާރޭ) އެވެ.

ރައީސް ނަޝީދު ފެކްޝަނުން ހުށަހެޅުއްވި މިމައްސަލައިގައި ބުނީ، އެމްޑީޕީގެ އަސާސީ ޤަވާއިދު ބުނާ ގޮތުން ޕާޓީގެ މެންބަރުކަމުން މީހަކު ވަކިކުރުމަކީ ޕާޓީން އަޅާ ފިޔަވަޅެއްކަމަށްވާއިރު، އެ ޕާޓީގެ ޤައުމީ މަޖިލީހުން ނިންމައިގެން 39،000 މެންބަރުން ވަކިކޮށްފައިވަނީ ފިޔަވަޅު އެޅުމުގައި އަމަލުކުރަންޖެހޭ އިޖުރާއާތުތަކާ ޚިލާފަށް ކަމަށާ އެހެންކަމުން އެ މެންބަރުންނަށް ބައިވެރިވެވޭ ގޮތަށް އަލުން އިންތިޚާބު ބޭއްވުމަށް އެމްޑީޕީގެ މައްޗަށް އަމުރުކޮށްދިނުމަށް ދިނުމަށެވެ. 

އަދި ރިޔާސީ ޓިކެޓު ރައީސް ޞާލިހާއި ހަވާލުކުރުން ހުއްޓުވައިދިނުމުގެ ވަގުތީ އަމުރެއް ނެރެދިނުމަށްވެސް ވަނީ އެދިފައެވެ. 

ފާއިތުވެދިޔަ މަހުގެ 28 ވަނަ ދުވަހު ބޭއްވުނު ރިޔާސީ ޕްރައިމަރީ ރައީސް ސާލިހު ކާމިޔާބު ކުރެއްވީ 61 އިންސައްތައިގެ ބޮޑު އަޢުލަބިއްޔަތަކުންނެވެ. ޕްރައިމަރީގެ އިންތިޚާބުގައި ބަލިވި، އެ ޕާޓީގެ ރައީސް މުހައްމަދު ނަޝީދަށް ލިބިވަޑައިގެންނެވީ އެންމެ 39 އިންސައްތަ ވޯޓެވެ.