ދަރިވަރުންނަށް ލޯނު ދެނީ ސަރުކާރުން ވަރަށް ބޮޑު ގުރުބާނީއެއް ވެގެން ކަމަށާ، އެ ލޯނު ނުދައްކައިގެން ކޯޓަށް ދާން ޖެހޭ ހިސާބަށް ގޮސްފިނަމަ އެކަންވެސް ކުރައްވާނެ ކަމަށް ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަން ވިދާޅުވެއްޖެއެވެ. 

ރައީސް އޮފީހުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި، ސްޓޫޑެންޓް ލޯން ނުދައްކާ ދަރިވަރުންނާއި މެދު ޢަމަލު ކުރާނެ ގޮތާއި ގުޅިގެން ނޫސްވެރިއެއް ކުރި ސުވާލަށް ޖަވާބު ދެއްވަމުން މިނިސްޓަރު ވިދާޅުވީ، ލޯނު ނުދައްކައިގެން ކޯޓަށް ދާން ޖެހިއްޖެ ހާލަތެއްގައި ކޯޓަށްވެސް ދާނެ ކަމަށެވެ. އެހެނީ ދަރިވަރުންނަށް ސަރުކާރުން ލޯނު ދެނީ ވަރަށް ބޮޑު ގުރުބާނީ ތަކެއް ވެގެން ކަމަށާ، ލޯނު ދެއްކުމަކީ ލޯނު ނަގާ ކޮންމެ ދަރިވަރެއްގެ މައްޗަށްވެސް ވާޖިބެއް ކަމަށް ވިދާޅުވިއެވެ. 

"ލޯނު ފައިސާ ހޯދުމަށްޓަކައި އަޅުގަނޑުމެން ކޯޓަށް ދާންޖެހޭ ހިސާބަށް ދިޔައީމާ ކޯޓަށްވެސް ދާނަން. ދަރިވަރުންނަށް ލޯނުމިދެނީ ސަރުކާރުން ވަރަށް ބޮޑު ގުރުބާނީއެއް ވެގެން. ހޭދައެއް ކޮށްގެން. ތަރައްގީގެ ވަރަށް ގިނަ މަޝްރޫޢުތައް އެބަހުރި ރާއްޖޭގައި ހިންގަންޖެހޭ."

"މިހުރިހާ ކަމެއް ހުއްޓާ، ކޮވިޑް ތެރޭގައިވެސް މިހާރުވެސް އޭގެ ކުރިންވެސް ދަރިވަރުންނަށް ސްޓޫޑެންޓް ލޯން މިދެނީ މީހުން ބިނާ ކުރުމަށްޓަކައި އެކަން މުހިންމު ވާތީ. އެހެންވީމާ ދަރިވަރުންގެ މައްޗަށް އޮތް ޒިންމާއެއް، އެމީހުންގެ މައްޗަށް ވާޖިބެއް އެއީ އެ ފައިސާ ދެއްކުން." މިނިސްޓަރު ވިދާޅުވި އެވެ. 

މިއާއެކު މިނިސްޓަރު ވިދާޅުވީ، މުސްތަގުބަލުގައި އެހެން ދަރިވަރުންނަށް ވެސް ތައުލީމު ހާސިލު ކުރުމަށް ލޯނު ފޯރުކޮށްދެވޭނީ، ކުރިން ލޯނު ނަގާ ދަރިވަރުން އެ ދެއްކުމުން ކަމަށެވެ. އެއީ މުސްތަގުބަލުގައި ގައުމު ބިނާ ކުރުމަށްވެސް މުހިންމު ކަމެއްކަން ފާހަގަކުރައްވައި މިނިސްޓަރު ވަނީ ލޯނު ނުދައްކާ ދަރިވަރުންގެ އަތުން އެ ފައިސާ ހޯދުމަށް ކުރަންޖެހުނު ކޮންމެ ކަމެއް ކުރައްވާނެ ކަމުގެ ޔަގީންކަން ދެއްވާފައެވެ.  

"އަޅުގަނޑު ގަބޫލުކުރާ ގޮތުގާއި ކޮންމެ ދަރިވަރެއްގެ މައްޗަށް ވެސް ވާޖިބެއް، ސަރުކާރުން ލޯނު ދިނީމާ، އެ ފުރުސަތުގެ ބޭނުން ހިފުމަށްފަހު، އެ ފުރުސަތު ގެ ބޭނުން އެހެން ދަރިވަރުން ހިފުމަށްޓަކައި އެކަން ކުރުން. އެއީ ހަމަ މޯރަލް ރެސްޕޮންސިބިލިޓީއެއް. އެހެންވީމާ އަޅުގަނޑުމެން އެ ފައިސާ ހޯދަން ކުރަން ޖެހުނު ކޮންމެ ކަމެއްވެސް ކުރާނެ ކަމުގެ ޔަގީންކަން އަރުވަން." މިނިސްޓަރު ވިދާޅުވި އެވެ.