ހުކުރު ދުވަހަކީ އާއްމުކޮށް ކުކުޅަށް ޚާއްސަ ދުވަހެކެވެ. މިއަދު ގިނަ ގޭގޭގެ މެންދުރު ކެއުމަށް ސުފުރާމަތިން ފެންނާނީ ކޮންމެވެސް ގޮތަކަށް ތައްޔާރު ކޮށްލާފައި ހުރި ކުކުޅެވެ. އެހެންކަމުން މި ހުކުރު ވޮއިސް ގެ ބަދިގެއިން ވެސް މި ގެނެސްދެނީ މީރުކޮށް ކުކުޅު ހަނާކުރާނެ ގޮތެވެ. 

1 ކުކުޅު (1400 ގުރާމުގެ، ހަންގަނޑު ނޮޅައިފައި ބޮޑެތިކޮށް ކޮށާފައި)

4 މޭޒުމަތީސަމުސާ ދިވެހި ހަވާދު (ހިމުންކޮށް މުގުރާފައި)

½ ސައިސަމުސާ މުގުރި ފޮނިތޮށިކާފޫރުތޮޅި (ބޭނުން ނަމަ)

½ ސައިސަމުސާ އަސޭމިރުސް (މުގުރި)

5 ލޮނުމެދު (ގާނައިފައި) 

1 ސައިސަމުސާ އިނގުރު (ގާނައިފައި)

2 ފިޔާ (ބޮޑު، ތުނިކޮށް ކޮށާފައި)

½ ސައިސަމުސާ ރީނދޫ

½1 ޖޯޑު ކާށިކިރު 

ތެޔޮ

ހިކަނދިފަތް، ރާނބާފަތް، ގިތެޔޮމިރުސް، އަދި ރަހަލާވަރަަށް ލޮނު

1) ކުކުޅުގައި އަސޭމިރުހާއި، ރީނދުލާއި، 1/2 ސައިސަމުސާ މުގުރާފައި ހުރި އިނގުރާއި ލޮނުމެދު، އަދި ރަހަލާނެ ވަރަށް ލޮނު ލުމަށްފަހު 10 މިނެއްޓު ވާންދެން މެރިނޭޓް ކޮށްލާށެވެ. 

2) ދެން އެ ކުކުޅު ކޮޅު ރަން މުށި ކުލަ އަރަންދެން ތެލުލާލާށެވެ. 

3) އެއަށްފަހު ތެޔޮ ފޮދެއްގެ ތެރޭގައި ފިޔާ މީރުކޮށް ލާށެވެ. އަދި ފިޔާކޮޅު މޯޅިވީމައި ހިކަނދި ފަތާއި ރާނބާފަތް އަދި ބާކީހުރި އިނގުރާއި ލޮނުމެދު އެއްކޮށްފައި، ކުޑަކޮށް ފްރައި ކޮށްލާށެވެ. 

4) ދެން އެއަށް ހަވާދު އެޅުމަށްފަހު ގާތް ގަނޑަކަށް 2 މިނެޓް ވަންދެން ހަނާކޮށްލާށެވެެ. 

5) އެއަށްފަހު ތެލުލި ކުކުޅުކޮޅު އަޅާލައި ރަނގަޅަށް އެކުލަވައި ލުމަށްފަހު، ބައި ޖޯޑު ކާށިކިރު އަޅައިފައި، މަތިޖަހައިގެން، މަޑު ގިނީގައި 15 މިނެޓް ވަންދެން ކައްކާލާށެވެ. ކައްކާއިރު، ކޮންމެ 3 މިނެއްޓަކުން ކުކުޅުކޮޅު ފުށުންޖަހައިލަން ވާނެއެވެ.  

6) ބާކީ ހުރި ކާށިކިރުޖޯޑުގެ ތެރެއަށް ފޮނިތޮށިކާފޫރުތޮޅި، ގިތެޔޮމިރުސް (ބޭނުންވާ ވަރަކަށް) އަޅައިލުމަށްފަހު އެ ކާށިކިރުޖޯޑު ކުކުޅުކޮޅުގެ ތެރެއަށް އަޅައިލާށެވެ. 

7) ދެން ރަނގަޅަށް އެއްކޮށްލައިފައި ލޮނު ހެޔޮވަރުކޮށްލުމަށްފަހު ކުޑަކޮށް ފެންގަނޑު ހިނދެންދެން ކައްކައިލާށެވެ.