އެމްޑީޕީގެ ޕްރައިމަރީ ކާމިޔާބުކުރެއްވި ކެންޑިޑޭޓު، ރައީސް އިބްރާހީމް މުހައްމަދު ޞާލިހަށް ރިޔާސީ ޓިކެޓު އެރުވުމަށް ބޭއްވި ޖަލްސާއަށް، ޕްރައިމަރީ ނާކާމިޔާބުވެވަޑައިގެންނެވި އެ ޕާޓީގެ ރައީސް މުހައްމަދު ނަޝީދު ވަޑައިނުގެންނެވުމަކީ ހުތުރު ޢަމަލެއް ކަމަށް މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ) ވިދާޅުވެއްޖެ އެވެ.

މިދިޔަ ހުކުރު ދުވަހުގެރޭ ރައީސް ޞާލިހަށް އެމްޑީޕީގެ ރިޔާސީ ޓިކެޓު އެރުވުމަށް ބޭއްވި ޖަލްސާ އަށް ރައީސް ނަޝީދާއި އެމަނިކުފާނުގެ "ފިކުރެއްގެ ދިރުން" ހަރަކާތަށް ތާއީދު ކުރައްވާ މަޖިލިސް މެންބަރުންނާއި ލީޑާޝިޕުގައި ހިމެނި ވަޑައިގަންނަވާ ބޭފުޅުން ވަޑައިނުގަންނަވަ އެވެ.

އެކަމާ ގުޅިގެން މަވޯޓާ ކުރެއްވި ޓުވީޓެއްގައި ވިދާޅުވީ ޑިމަކްރަސީގެ ރީތި ހަމަތައް ގަބޫލުކުރާ ކޮންމެ މީހަކުވެސް އިންތިހާބެއްގައި ބަލިވެއްޖެ ނަމަ ބަލި ގަބޫލުކުރާނެ ކަމަށެވެ. އަދި އެމްޑީޕީގެ ރައީސް މަގާމުގައި ހުންނަވައިގެން ރައީސް ސޯލިހަށް ޓިކެޓު ހަވާލުކުރުމުގެ ރަސްމިއްޔާތަށް ނަޝީދު ވަޑައިނުގަތުމަކީ ވަރަށް ދެރަވަރު ހުތުރު އަމަލެއް ކަމަށް އޭނާ ވިދާޅުވި އެވެ.

މިދިޔަ މަހު 28 ގައި ބޭއްވި އެމްޑީޕީގެ ރިޔާސީ ޕްރައިމަރީގައި ނަޝީދާއި ވާދަކުރައްވައި 61 ޕަސެންޓު ވޯޓުން ރައީސް ޞާލިހު އިންތިޚާބު ކާމިޔާބު ކުރެއްވި ނަމަވެސް، ރައީސް ނަޝީދު ވިދާޅުވަމުން އަންނަނީ އެ އިންތިހާބު ބާއްވާފައި ވަނީ އެމްޑީޕީގެ 39,000 މެންބަރުން ޕާޓީން ވަކިކުރުމަށް ފަހުގައި ކަމަށެވެ. 

އަދި، ރިޔާސީ އިންތިހާބުގައި ވެސް ރައީސް ޞާލިހަށް ތާއީދު ނުކުރައްވާނެ ކަން ހާމަކުރައްވައި، އެމަނިކުފާނު އަންނަނީ ޕާޓީ ތެރެއިން "ފިކުރެއްގެ ދިރުން" ގޮފި އުފައްދަވައި އެ ހަރަކާތަށް މެންބަރުން ހޯދުމުގެ މަސައްކަތް ކުރައްވަމުންނެވެ.