އެކި އެކި ސަރުކާރުތަކުގައި އެމްޑީީގެ ރައީސް މުހައްމަދު ނަޝީދަށް އެކި ގޮތްގޮތުން އަނިޔާތައް ދީފައިވީނަމަވެސް، ކަނޑައެޅިގެން ނަޝީދު އަވަހާރަކޮށްލުމަށް ބޮމުގެ ހަމަލާއެއް ދިނީ އެމްޑީޕީ އިސްވެ އޮވެ ހިންގާ ރައީސް އިބްރާހިމް މުހައްމަދު ޞާލިހުގެ ސަރުކާރުގައި ކަމަށް މަޖިލީހުގެ މާފަންނު ދާއިރާގެ މެމްބަރު އިމްތިޔާޒު ފަހުމީ (އިންތި) ވިދާޅުވެއްޖެ އެވެ. 

އިމްތިޔާޒު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ސެކިއުރިޓީއާއި ގުޅޭގޮތުން މަޖިލީހުގެ ހެންވޭރު ދެކުނު ދާއިރާގެ މެންބަރު ހުސެއިން ޝަހީމް (އަނދުން ހުސެއިން) ދެއްކެވި ވާހަކަތަކާއި ގުޅިގެން މަޖިލީހުގައި ނުރުހުން ފާޅުކުރައްވަމުން ނެވެ. 

މިއަދުގެ ޖަލްސާގައި ވާހަކަދައްކަވަމުން އަނދުން ހުސެއިން ވިދާޅުވީ ނަޝީދުގެ ސެކިއުރިޓީއަށް 50 ބޮޑީގާޑުންގެ އިތުރުން ހަތަރު ވެހިކަލް މިހާރުވެސް ބާއްވާފައިވާކަމަށެވެ. އަދި އެމަނިކުފާނުގެ ސެކިއުރިޓީ ކަންކަމަށް އެކަނި ބަޖެޓުގައި 23 މިލިއަން ރުފިޔާ ހިމަނާފައިވާކަމަށެވެ. އޭގެ އިތުރުން ސަރުކާރުން އެމަނިކުފާނަށް ގެކޮޅެއް ދިނުމަށް ނިންމާފައިވާކަމަށެވެ. 

މަޖިލީހުގެ ރިޔާސަތުގައި އިންނަވާ ނަޝީދުގެ އިސްނެންގެވުމުގެ ދަށުން ސަރުކާރަށް ފުރައްސާރަކުރުމުގެ ގޮތުން ކޮންމެ ދުވަހަކު ހުށައަޅާ ކުއްލި މައްސަލަތައް ހުއްޓުވަން ޖެހޭކަމަށް އަނދުން ހުސެއިން ވިދާޅުވިއެވެ. އަދި މި ސަރުކާރު ބަދަލުވެއްޖެނަމަ ނަޝީދުގެ ސެކިއުރިޓީ ކުޑަކޮށް އެންމެ ބޮޑީ ގާޑެއް ބަހައްޓާފާނެތީ ކަންބޮޑުވާކަމަށް އޭނާ ވިދާޅުވިއެވެ. 

މަޖިލީހުގެ ރައީސްގެ ސެކިއުރިޓީއާއި ގުޅޭގޮތުން ވާހަކަނުދެއްކެވުމަށް ތަކުރާރުކޮށް ރިޔާސަތުން އެންގުމުންވެސް އަނދުން ހުސެއިން ވަނީ އެކި ގޮތްގޮތަށް ނަޝީދަށް މިހާރު ދޭ ބޮޑު ސެކިއުރިޓީގެ ވާހަކަ ދައްކަވާފައެވެ. އަދި މުސްތަގުބަލުގައި ކަންކަން ވާ ގޮތަކުން އެ ސެކިއުރިޓީ ކުޑަވެދާނެކަމަށް ވިދާޅުވެފައެވެ. 

އަނދުން ހުސޭނަށްފަހު މަޖިލީހުގައި ވާހަކަދައްކަވަމުން އިމްތިޔާޒު ވަނީ ހަނދުން ހުސޭނަށް ހޫނު ރައްދެއް ދެއްވާފަ އެވެ. 

އިމްތިޔާޒު ވިދާޅުވީ އެކި އެކި ސަރުކާރުތަކުގައި ނަޝީދަށް ބޮޑެތި އަނިޔާތަކެއް ދީފައިވާ ކަމަށެވެ. ޖަލުގެ ތޭރިތަކުގެ ތެރޭގަޔާއި މަގުމަތީގައިވެސް އަނިޔާތައް ދީފައިވާކަމަށެވެ. 

އެހެން ނަމަވެސް ނަޝީދަށް އެންމެ ބޮޑު އަނިޔާއެއް ލިބިގެންދިޔައީ އެމްޑީޕީގެ މި ސަރުކާރުގައި ކަމަށް އިމްތިޔާޒު ވިދާޅުވިއެވެ. އެގޮތުން ކަނޑައެޅިގެން ނަޝީދުގެ ފުރާނަފުޅު ދުއްވާލުމަށް ބޮމުގެ ހަމަލާއެއް ދިނުމުގެ ފުރުސަތު ދިނީ ހަމައެކަނި އިބްރާހިމް މުހައްމަދު ޞާލިހުގެ ސަރުކާރުންކަމަށް އިމްތިޔާޒު ވިދާޅުވިއެވެ. 

އޭނާ އިތުރަށް ވިދާޅުވީ އެ ހަމަލާ ދިނީ އޭގެ ހުރިހާ މައުލޫމާތެއް ސަރުކާރަށް ލިބި އެއްވެސް ފިޔަވަޅެއް ނާޅާ އޮތުމުގެ ނަތީޖާއެއްގެ ގޮތުން ކަމަށެވެ. 

އިމްތިޔާޒު ވިދާޅުވީ ނަޝީދަށް ދިން ބޮމުގެ ހަމަލާގެ މައްސަލަ ބެލުމުގެ އެއްވެސް ޝައުގުވެރިކަމެއް ސަރުކާރު ނެތްކަމަށެވެ. އެ ހަމަލާއާއި ގުޅިގެން މަޖިލީހުގެ 241 ކޮމެޓީއިން ކުރި ދިރާސާގެ މައްޗަށް ރިޕޯޓެއް އެކުލަވާލާފައިވާއިރު އެއާ އެއްގޮތަށް އަމަލުކުރަމުން ނުދާކަން އިމްތިޔާޒު ފާހަގަކުރެއްވި އެވެ. 

އިމްތިޔާޒު ވިދާޅުވީ މަޖިލީހުގެ މެމްބަރުންނަކީ ސަރުކާރު ފަޅީގައި ތިއްބަވާ ބައެއްކަން ދެއްކުމަށް، ކުރާ މަސައްކަތްތައް ކުށްވެރި ކުރާ ކަމަށެވެ. އަދި ނަޝީދުގެ ސެކިއުރިޓީއާއި ގުޅޭގޮތުން އެ މޭރުމުން ވާހަކަ ދެއްކެވުމަކީ އިންތިހާއަށް ކަންބޮޑުވާ ކަމެއް ކަމަށެވެ.