ކ. ތިލަފުށީން ބޭރުގެ ކުންފުނިތަކަށް ބިން ކުއްޔަށް ދޫކުރުމަށް ސަރުކާރުން ނިންމާފައިވާ ނިންމުމަކީ ސިޔާސީ ބޭނުމަށް، ކުރިއަށް އޮތް ރިޔާސީ އިންތިޚާބަށް ފައިސާ ހޯދައި ވައްކަން ކުރުމަށް ނިންމާފައިވާ ނިންމުމެއް ކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަދި ޕީޕީއެމްގެ ނައިބު ރައީސް އަހުމަދު ޝިޔާމް ވިދާޅުވެއްޖެއެވެ.
ތިލަފުށިން 99 އަހަަރަށް ބޭރުމީހުންނަށް ބިން ކުއްޔަށް ދޫކުރުމަށް ސަރުކާރުން ނިންމުމާއި ގުޅިގެން ހުރި ކަންބޮޑުވުންތައ ހިއްސާ ކުރުމަށް އިދިކޮޅުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޝިޔާމް ވިދާޅުވީ، ދިވެހިރާއްޖޭގެ ބިންތައް ނުއަގުގައި، ގާނޫނު އަސާސީ އާއި ބިމުގެ މުއާމަލާތް ތައް ހިންގުމަށް ހެދިފައިވާ ގާނޫނު ތަކާއިވެސް ޚިލާފަށް، ސިޔާސީ ބޭނުމަށް ވިއްކުމަށް އަދުގެ ސަރުކާރުން މަސައްކަތް ކުރަމުންދާ ކަމަށެވެ.
އަދި ތިލަފުށީގެ ބިމަކީ ދިވެހި ރައްޔިތުންގެ ޓެކްސް ފައިސާއިން ވަރަށް ބޮޑު ހޭދައެއް ކޮށްގެން ހިއްކާފައިވާ ބިމެއް ކަމަށް ވާއިރު، އެ ބިމުން ބައެއް، ވަކި ބަޔަކަށް ދިނުމަށް ސަރުކާރުން މަސައްކަތް ކުރަމުންދާކަން ފާހަގަކުރައްވައި ޝިޔާމް ވިދާޅުވީ، އެފަދަ ނިންމުމެއް ސަރުކާރުން ނިންމާފައިވަނީ މި އަހަރު ބާއްވާ ރިޔާސީ އިންތިހާބަށް ފައިސާ ހޯދުމަށްޓަކައި ކަަމަށެވެ.
"މިބިންތައް ސަރުކާރުން، ވަކިން ޚާއްސަކޮށް މި އަހަރަކީ މިއީ ރިޔާސީ އިންތިޚާބު އޮންނަ އަހަރަށްވާތީ އާއި އެކީގައި، ރިޔާސީ އިންތިޚާބަށް ފައިސާ ހޯދުމުގެ ބޭނުމުގަޔާއި، އަދި ވައްކަން ކުރުމުގެ ނިޔަތުގައި މި ބިންތައް ނުއަގުގައި، ބޭރު މީހުންނަށް، ވަކިން ޚާއްސަކޮށް އަޅުގަނޑުމެންނަށް މި އެނގެނީ، ނި ޑޮކިޔުމެންޓްގެ ކަރުދާސްތައް ފަރުމާކުރެވިފައި ހުރި ގޮތުން، އަޅުގަނޑުމެންނަށް މި އެނގެނީ، ސީދާ ވަކި ބަޔަކަށް، ވަކި ކުންފުނި ތަކަކަށް، ވަކި ގައުމެއްގެ، އިންޑިއާ ގެ ވަކި ކުންފުނި ތަކަކަށް ދިނުމުގެ ބޭނުމުގައި ތައްޔާރުކޮށް ފަރުމާ ކުރެވިފައިވާ ކަރުދާސްތަކެއް މި ހުރީ."
ޕީޕީއެމްގެ ނައިބު ރައީސް އަހުމަދު ޝިޔާމް
ޝިޔާމް ވިދާޅުވީ ދިވެހިރާއްޖެ އަކީ މިނިވަން މުސްތަޤިއްލު ގައުމަކަށްވާއިރު، މި ދިވެހިރާއްޖޭގެ މިނިވަންކަމާއި ސިޔާދަތާއި އިސްތިގުލާލަށް ބުރޫ އަރާފަދަ އެތައް ކަމެއް މިސަރުކާރުން ކުރަމުންދާ ކަމަށާއި، އެއީ އިދިކޮޅުންނާއި ދިވެހި ރައްޔިތުންވެސް ނުހަނު ކަންބޮޑުވާ ކަމެއް ކަމަށެވެ.
އެހެންކަމުން، އިދިކޮޅުން އަޑު އުފުލަމުން ދަނީ، އެފަދަ ކަންކަމާއި ދެކޮޅަށް ކަމަށާ، ތިލަފުށީގެ ބިން، "އުމުރު ދުވަހަށް" ބޭރުގެ ކުންފުނިތަކަށް ނު އަގުގައި ދެވޭ ދިނުމަކީ އެއްގޮތަށްވެސް ބަލައި ގަނެވޭނެ ކަމެއް ނޫން ކަމަށް ޝިޔާމް ވިދާޅުވި އެވެ.
ތިލަފުށިން ބީލަމުގެ އުސޫލުން ބިން ދޫކުރާއިރު ބޭރު ފަރާތްތަކަށް ބިން ދޫކުރާނީ ކުއްޔަށް ކަމަށާއި، އަދި އެފަދައިން ބިންތައް ދޫކުރާނީ ރާއްޖޭގައި ވިޔަފާރި ކުރުމުގެ ހުއްދަ އޮންނަ ފަރާތްތަކަށް އެކަނި ކަމަށް ހައުސިން ޑިވެލޮޕްމަންޓު ކޯޕަރޭޝަން(އެޗްޑީސީ) އިން ވަނީ ބުނެފަ އެވެ.
އެގޮތުން ތިލަފުށިން 150 ހެކްޓަރުގެ ބިން ހިއްކުމަށް ނިންމާފައިވާކަމަށެވެ. އަދި އެ ބިންތަކުގެ ތެރެއިން 4.3 ހެކްޓަރު (ވަކި 50 ޕްލޮޓެއްގެ ގޮތުގައި) ބީލަމުގެ އުސޫލުން ދޫކުރުމަށް 2023 ފެބުރުއަރީ 7 ވަނަ ދުވަހު އެ ކުންފުނިން އިއުލާނު ކޮށްފައިވާ ކަމަށެވެ. އަދި ބޭރުގެ ފަރާތްތަކަށް އެ ބީލަމުގައި ބައިވެރިވެވޭނީ އެ ވިޔަފާރިތަކަކީ ސަރުކާރުގެ ފޮރިން ޑިރެކްޓު އިންވެސްޓުމަންޓު ޕޮލިސީގެ ދަށުން އެފަރާތްތަކުން ކުރަން ގަސްދުކުރާ ވިޔަފާރިއަކަށް ހުއްދަ އޮތް އަދި ރާއްޖޭގައި ރަޖިސްޓްރީކޮށްފައިވާ ކުންފުނިތަކަށް ކަމަށެވެ. އެފަދަ ކުންފުނިތަކަށްވެސް ބިން ދޫކުރާނީ ކުއްޔަކަށް ކަމަށް އެޗްޑީސީން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
