މުސްލިމް އަންހެން ކުދިން ލޯބީގެ ދަލުގައި ޖެއްސުމުން ވަޒީފާ ކަށަވަރިކޮށްދޭނެ ކަމަށް އިންޑިޔާގެ ޕޮލިޓީޝަނެއް ކަމަށްވާ ޕްރަމޯދް މުތަލިކް ހިންދޫ ދީނުގެ ޒުވާނުންނަށް ގޮވާލައިފިއެވެ.

ޢާންމުކޮށް ހުޅުވާލެވިގެން ކަރްނާޓަކާގެ ބަގަލްކޯޓްގައި ކުރިއަށް ދިޔަ ރަސްމިއްޔާތެއްގައި ވާހަކަ ދައްކަމުން ޕްރަމޯދް ބުނެފައިވަނީ "މިކަން ހިނގާގޮތް އަހަންނަށް އެބައިނގޭ، އަހަރެން ބޭނުން މިތާގައި ތިބި އަހަރެމެންގެ ޒުވާނުންނަށް ދައުވަތުދެން، ހިންދޫ އެއް އަންހެން ކުއްޖަކު ގެއްލިއްޖެއްޔާ މުސްލިމް 10 އަންހެން ކުދިން ލޯބީގެ ދަލުގައި ޖައްސަން، އެގޮތަށް ކަންތައް ކޮށްފިނަމަ އަހަރެންގެ "ޝްރީ ރާމް ސޭނާ" އިން ތި ޒުވާނުންގެ ޒިންމާ ނަގާނަން، ރައްކާތެރިކަން ކަށަވަރުކޮށްދޭނަން، ވަޒީފާވެސް ޔަޤީން ކޮށްދޭނަން" މިހެނެވެ.

ޕްރަމޯދް އަކީ އިންޑިޔާގެ ބީޖޭޕީ އަށް ނިސްބަތްވާ މީހެކެވެ.

Advertisement

އެރަސްމިއްޔާތުގައި ވާހަކަ ދައްކަމުން ޕްރަމޯދް ހިންދޫ ދީނުގެ ޒުވާނުންނަށް ގޮވާލައިފައިވަނީ  "ލަވް ޖިހާދު" ގައި ޖެހުނު ހިންދޫ ދީނުގެ އަންހެން ކުދިންނަށް ޓަކައި ބަދަލު ހިފުމަށް މުސްލިމް އަންހެން ކުދިން ލޯބީގެ ދަލުގައި ޖެއްސުމަށެވެ.

"އަދިވެސް ހާލަތު އޮތީ ހަމަ އެގޮތަށް، އަހަރެމެންގެ އަންހެންކުދިން ލޯބީގަ ޖެހި "ލަވް ޖިހާދު" ގެ ޝިކާރައަކަށް ވެގެން މިދަނީ، ޤައުމުގެ އެކި ކަންކޮޅުތަކުގައި މިކަން މިދަނީ ތަކުރާރު ވަމުން، އެތައް ހާސް އަންހެން ކުދިންނަކަށް ލޯބީގެ ނަމުގައި ދަނީ މަކަރުހަދަމުން، އަހަރެމެންގެ އަންހެން ކުދިން މިކަމަށް ހުޝިޔާރު ކުރުވަން އެބަޖެހޭ" ޕްރަމޯދްގެ ވާހަކައިގައި ބުނެފައިވެއެވެ.

"ލަވް ޖިހާދު" ގެ ނަމުގައި މުސްލިމުންގެ ބޮލުގައި އަޅުވާ އިލްޒާމަކީ ހުދު ހިންދޫއިން އިސްލާމްދީނާއި ދެކޮޅަށް އުފައްދާފައިވާ ފިކުރެއްކަން ފާހަގަ ކޮށްލަން ޖެހެއެވެ. އެފިކުރަކީ މުސްލިމުންނާއި މެދުގައި މީހުންގެ ހިތްތަކުގައި ނަފްރަތު އުފެއްދުމަށް ފޯއްދައި ފެންދީ ބޮޑު ކޮށްފައިވާ ފިކުރެކެވެ.

"ލަވް ޖިހާދު" ގެ ތިއަރީ އަކީ މުސްލިމް ފިރިހެނުން ހިންދޫ ދީނުގެ އަންހެނުން ލޯބީގެ މަޅީގައި ޖައްސައި އެއަންހެނުންނަށް އިސްލާމް ދީނަށް ވަނުމަށް މަޖުބޫރު ކުރުވާ ކަމަށެވެ. އަދި އެއަންހެނުން މެދުވެރިކޮށް މީހުން މަގުފުރެއްދުމާއި، ރަހީނު ކުރުން ފަދަ ބޮޑެތި ކުށްތައް ކުރާ ކަމަށާއި، ބައިނަލް އަޤްވާމީ ބޮޑެތި ކުށްވެރިންނާއި ގުޅިގެން އިންޑިޔާއާއި ދެކޮޅަށް ރޭވުންތައް ރޭވުން ކަމަށް އެފިކުރު އުފެއްދި ހިންދޫން ވަނީ ހަދައިފައެވެ.