ފެނުމުގެ ނުކުޅެދުންތެރިކަން ހުންނަ މީހުންނަށް މިނިވަންކަމާއި އެކު ވޯޓު ލުމުގެ ހައްގު ހޯދާއިދޭން އެދި ޕެޓިޝަން ދިވެހި ރާއްޖޭގެ ލޯފަން މީހުންގެ ހައްގުތަށް ހޯދައި ދިނުމަށް މަސައްކަތް ކުރާ ޖަމިއްޔާ، ބްލައިންޑް އެންޑް ވިސުއަލީ އިމްޕެއަރޑް ސޮސައިޓީ އޮފް މޯލްޑިވްސް (ބީވީއައިއެސްއެމް) ފަރާތުން ފެޓިޝަނެއް އެކުލަވާލައިފިއެވެ.

މި ޕެޓިޝަނުގައި އެ ޖަމިއްޔާއިން ވަނީ، ދިވެހި ރާއްޖޭގައި ނިންމާ ބޮޑެތި ނިންމުންތައް ނިންމުމައްޓަކައި ނެގޭ ވޯޓަކީ ސިއްރު ވޯޓަކަށް ވުމުގެ ހައްގަކީ ކޮންމެ ދިވެހި ރައްޔިތަކައްމެ ލިބިގެން ވާ ހައްގަކަށް ވީ ހިނދު ވެސް ދުނިޔޭގެ ގައުމު ތަކުގައި ފެނުމުގެ ނުކުޅެދުންތެރިކަން ހުންނަ ފަރާތްތަކަށް އެހެން މީހަކަށް ބާރޯސާ ވުމެއް ނެތި ސިއްރު ވޯޓެއް ލުމައްޓަކައި ހަމަޖައްސާފައި ހުންނަ ތަފާތު ވަސީލަތް ތަކުގެ ތެރެއިން އެއްވެސް ވަސީލަތެއް ދިވެހި ރާއްޖޭގައި ބޭނުން ނުކުރާކަން ފާހަގަކޮށްފައެވެ. 

އަދި އޭގެ ސަބަބުން ދިވެހި ރާއްޖޭގައި އުޅޭ ފެނުމުގެ ނުކުޅެދުންތެރިކަން ހުންނަ ފަރާތްތައް ވަނީ މިނިވަންކަމާއި އެކު ވޯޓުލުމުގެ ހައްގުން މަހުރޫމު ވެފައި ކަމަށްވެސް ބުނެފައިވެއެވެ. 

"އެހެން މީހަކަށް ބަރޯސާ ވެގެން ވޯޓު ލުމަށް މަޖުބޫރު ވެފައި ވުމުން އެހީތެރިކަން ހޯދާ ފަރާތުގެ ނުފޫޒާއި ހުރެ އަމިއްލަ ވިސްނުމާއި އެއްގޮތަށް ވޯޓު ލުމަށް ވަނީ ހުރަސް އެޅިފައެވެ." ބްލައިންޑް އެސޯސިއޭޝަންގެ ޕެޓިޝަނުގައި ބުނެފައި ވެއެވެ. 

މި ސަބަބު ތަކާއި ހުރެ، އެ ޕެޓިޝަނުގައި ވަނީ، ކުރިއަށްވެސް އޮތީ ގައުމުގެ އެންމެ ބޮޑު ނިންމުން ނިންމާ އިންތިހާބު ކަމަށް ވުމާ އެކު ފެނުމުގެ ނުކުޅެދުން ތެރިކަން ހުންނަ ފަރާތްތަކަށް އެހެން މީހަކަށް ބަރޯސާ ވުމެއް ނެތި ވޯޓު ލުމައްޓަކައި ހުރި ހުރަސްތަ މި ހިނދުން މި ހިނދަށް ނައްތާލާ، މި ހައްގު ކަށަވަރު ކޮށްދިނުމަށް އިލެކްޝަން ކޮމިޝަނަށާއި، ސިޔާސީ ޕާޓީ ތަކަށާއި، ކަމާއި ގުޅުން ހުރި ދައުލަތުގެ އެންމެހައި މުވައްސަސާތަކަށް ދިވެހި އެންމެހައި ފެނުމުގެ ނުކުޅެދުންތެރިކަން ހުންނަ ފަރާތްތަކުގެ ނަމުގައި ގޮވާލާފައެވެ. 

އަދި މި ޕެޓިޝަނުގައި ވީހާވެސް ގިނަ ފަރާތްތަކުން ސޮއި ކުރުމަށްވެސް އެ އެސޯސިއޭޝަނުން ވަނީ އެދިފައެވެ.