ވ. އާރަށް ކުއްޔަށް ދޫކުރުމުގެ މައްސަލާގައި ކުރީގެ ރައީސް އަދި އިދިކޮޅު ކޯލިޝަންގެ ރިޔާސީ ކެންޑިޑޭޓް އަބްދުالله ޔާމީނަށް ކްރިމިނަލް ކޯޓުން އިއްވި 11 އަހަރުގެ ޖަލު ހުކުމް އެމަނިކުފާނުގެ ފަރާތުން ހައި ކޯޓުގައި މިއަދު އިސްތިއުނާފްކޮށްފިއެވެ.

ރައީސް ޔާމީންގެ ގާނޫނީ ވަކީލުންގެ ޓީމުގައި އެންމެ އިސްކޮށް އުޅުއްވާ ކުރީގެ ނައިބު ރައީސް ޑރ.މުހައްމަދު ޖަމީލު އަހުމަދު ވިދާޅުވީ ރައީސް ޔާމީންގެ މައްސަލަ އިސްތިއުނާފްކޮށްފައިވާ ކަމަށާއި ހުށަހެޅި އިސްތިއުނާފް ގައި ހުރި ކަންކަމަށް ބަލައި، އިންސާފުވެރި ޝަރީއަތެއް ހިންގައިފި ނަމަ، އިރާދަކުރެއްވިޔާ އިސްތިއުނާފު ކާމިޔާބު ވާނެކަމަށެވެ.

"މާތް ރަސްކަލާނގެ ތަނަވަސް ރަހުމަތާއި އެކީގައި އަޅުގަނޑުމެންނަށް ޔަގީންކަން އެބައޮތް ރައީސް ޔާމީން މިނިވަންވެ ވަޑައިގަންނަވާނެ ކަމަށް. މި އިސްތިއުނާފް ކާމިޔާބު ވާނެ ކަމަށް ވަރަށް ފުރިހަމަ ޔަގީން ކަމެއް އެބައޮތް."

"އަޅުގަނޑުމެން މި މަސައްކަތް ކުރީ ވަރަށް ޔަގީން ކަމާއި އެކީގައި. އަޅުގަނޑުމެންނަށް މީގެން ފެނުނު ކަންތައްތައް އަޅުގަނޑަށް ހަމަ ޔަގީން ކަށަވަރުކަން އެބައޮތް ރާއްޖޭގައި ގާނޫނު ކިޔަވައިގެން ތިބި ބޭފުޅުންނެއް ގަބޫލެއް ނުކުރާނެ ކަން ހެދި ގޯސްތައް ހިފަހައްޓަން. އެހެންވީމާ މި ކާމިޔާބު ވާނެ. ރައީސް ޔާމީން އިރާދަކުރެއްވިޔާ މި އަހަރު ބޭއްވޭ އިންތިޚާބުގައި މިނިވަންކަމާއި އެކީގައި ތިޔަބޭފުޅުންގެ އަރިހަށް ވަޑައިގަންނަވާނެ ކަމުގެ ވަރަށް ފުރިހަމަ ޔަގީން ކަން އަޅުގަނޑަށް އެބައޮތް" ޑރ. ޖަމީލް ވިދާޅުވި އެވެ. 

ވ. އާރަށް މައްސަލައިގައި ރައީސް ޔާމީނުގެ މައްޗަށް ދައުލަތުން ކޮށްފައިވާ ދެ ދައުވާވެސް ސާބިތުވާ ކަމަށް ކަނޑައަޅައި އެމަނިކުފާނު 11 އަހަރަށް ޖަލަށް ލައި، 5 މިލިއަން ޑޮލަރުން ޖޫރިމަނާ ކުރުމަށް ކްރިމިނަލް ކޯޓުން ހުކުމްކުރީ މިދިޔަ ޑިސެމްބަރު މަހުގެ 25 ވަނަ ދުވަހު އެވެ.

މި މައްސަލަ އިސްތިއުނާފް ނުކުރެވި ލަސްވަމުންދާތީ ގިނަ ބައެއްގެ ފާޑުކިޔުންތައް ރައީސް ޔާމީންގެ ވަކީލުންނަށާއި ޕީޕީއެމަށްވެސް އަމާޒުވެގެން ދިޔައެވެ. އެހެން ނަމަވެސް، އިސްތިއުނާފު ލަސްވެފައިވަނީ، ލިޔެކިޔުންތައް ނުލިބި އަދިވެސް އެފަދަ މައްސަލަތައް ހުރުމުން ކަމަށް އެމަނިކުފާނުގެ ގާނޫނީ ޓީމުން އޭރުވެސް ދިޔައީ ބުނަމުންނެވެ.