ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު އަކީ، ކުރީގެ ރައީސް ޔާމީން އަބްދުލް ގައްޔޫމްގެ ދައުރުގައި 390 ސިޔާސީ މަގާމު އުފައްދައިގެން، އެ ކަމަށް ފާޑުވިދާޅުވި ބޭފުޅެއްކަމަށާއި އެހެންނަމަވެސް އެމަނިކުފާނުގެ ވެރިކަމުގައި ސިޔާސީ މަގާމުތަކުގެ އަދަދު 1420 އަރާފައިވާ ކަަމަށް މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެއެވެ.

މަޖިލީހުގެ މިއަދުގެ ޖަލްސާގައި މަޖިލީހުގެ މިއަދުގެ ޖަލްސާގައި ދަރަނި ރީސްޓްރަކްޗާ ކުރުމަށް ސަރުކާރަށް ދީފައިވާ ލަފާ ތަންފީޒު ކުރުމަށް ގޮވާލައި ގަލޮޅު އުތުރު ދާއިރާގެ މެންބަރު އީވާ އަބްދުالله ހުށަހެޅުއްވި ގަރާރަށް ބަހުސް ކުރައްވަމުން ޝިޔާމް ވިދާޅުވީ، ރައީސް ޔާމީންގެ ވެރިކަމުގައި އެމަނިކުފާނު ވެސް ލޯނުތައް ނެންގެވި ކަމަށެވެ. އަދި އެ ލޯނުތައް ނަންގަވައިގެން ހިންގަވާފައިވާ ބޮޑެތި މަޝްރޫޢުތައްވެސް ފެންނަން ހުރި ކަމަށާ، އަދި ދަރަނި އަދާކުރައްވަން އިންތިޒާމް ކުރައްވާފައިވާ ހަރުދަނާ ނިޒާމްތައްވެސް މެންބަރުންނަށް އެނގިވަޑައިގަންނަވާނެ ކަމަށް ވިދާޅުވިއެވެ. 

ކަން މިހެން ހުރި އިރުވެސް، ރައީސް ޞާލިހު އޭރު ކެންޕެއިންގެ ތެރެއިން ރައީސް ޔާމީންގެ ސަރުކާރަަށް ފާޑު ވިދާޅުވެ، އެއީ "މަތިބަރު" ސަރުކާރެއްގެ ގޮތުގައި ސިފަކުރެއްވި ކަމަށް ޝިޔާމް ވިދާޅުވި އެވެ. އަދި އެމްޑީޕީގެ ސަރުކާރެއްގައި “މަތިބަރު” ނުވާނެކަމަށްވެސް ބުނެފައިވާކަމަށާ އެ ދެއްކެވި ވާހަކަތަކަށްފަހު، މިއަދު ވެރިކަމަށް ވަޑައިގަތުމަށްފަހު، ފެނިގެންދަނީ 1420 ސިޔާސީ މަގާމު އުފައްދާފައިވާތަން ކަމަށް ޝިޔާމް ފާހަގަކުރެއްވިއެވެ.

"މިހާރު މިއޮތް އެމްޑީޕީގެ ސަރުކާރުން ނުކުރަން އޭރު އިދިކޮޅުގައި އޮވެ، ނުކުރަން ވިދާޅުވި ހުރިހާ ކަމެއް، ކެންޕެއިންގެ ތެރޭގައި ދެއްކެވި ހުރިހާ ވާހަކަ ތަކެއް، ތިމަންނަމެން ނުކުރާނަމޭ، ރައީސް ޔާމީންގެ ސަރުކާރުގައި ދަރަނި ނަގައިގެންނޭ (ހިންގީ) ތިމަންނަމެން ދަރަނި ނު އުފައްދާނަމޭ. ތިމަންނަ މެންގެ ސަރުކާރެއް މިހާ މަތިބަރެއް ނުވާނެ އޭ. މިއަދުގެ ރައީސުލްޖުމްހޫރިއްޔާ އެހެން ވިދާޅުވީ." 

"ދައުލަތުގެ މަތިބަރު ވާހަކަ ދެކެވޭ އިރުގައި ކުރީ ސަރުކާރުގައި އުފެއްދެވީ 390 ސިޔާސީ މަގާމު. ރައީސް ޞާލިހް (އޭރު) ވިދާޅުވީ ސިވިލް ސާވިސް މުވައްޒަފުން އެބަ ތިބެޔޭ. ދައުލަތް ހިންގެޔޭ. މިއަދު އަޅުގަނޑު ބަލާލި އިރު 1420 ސިޔާސީ މަގާމު އެބަހުރި. ވިއްޔާ ވާނީ އިތުރު." ޝިޔާމް ވިދާޅުވި އެވެ.  

މީގެ އިތުރުން ޝިޔާމް ވިދާޅުވީ، އިގްތިސާދީ ކަންކަން ހަރުދަނާކުރުމަށާއި ދުވެލި ވަރުގަދަ ކުރުމަށް އެއްވެސް މަސައްކަތެއް ކޮށްފައިނުވާކަމަށާ، ލިޔުނު އެއްވެސް އެއްޗެއްވެސް ނެތް އިރު، ލިޔެފައި ހުރި ކަންކަންވެސް ފޮހެލާފައިވާ ކަމަށެވެ. 

ޝިޔާމް ވިދާޅުވީ، މި ސަރުކާރުން އުޅެނީ ފައިސާ ޗާޕު ކުރާ މެޝިނެއް ގެނެސްގެންކަމަށާ، އަދި ފައިސާ ޗާޕު ކޮށްގެން ބޭނުންވާ މީހުންނަށް ލުއި ލޯނު ދިނުން ފަދަ ކަންކަން ކުރެވިދާނެކަމަށެވެ. 

އެއާއެކު ޝިޔާމް ވަނީ ފައިސާ ޗާޕު ކުރުމުން ވެގެންދާ ގޮތާއިމެދު ވާހަކަދައްކެވުމަށް ކެރިވަޑައިނުގަންނަވަނީ ކޮން ސަބަބަކާއި ގުޅިގެންތޯ ސުވާލު ކުރައްވާފަ އެވެ. އަދި އޭގެ ސަބަބުން ގެއަށް ގަންނަ ކިރުދަޅުގެ އަގާއި އެހެނިހެން ތަކެތިވެސް އަގު ބޮޑުވެގެންދާކަމަށާއި ޗާޕުކުރުމުން ވަނީ އެ އުނދަގޫތައް ކަމަށް އޭނާ ވިދާޅުވިއެވެ.

އަދި ހަމަ އެހެންމެ އޭގެ ސަބަބުން، ދިރިއުޅުމުގެ ހަރަދުތައް ބޮޑުވެ ދައްކަމުންދާ ގޭ ކުލިއަށްވެސް އަސަރުތައް ކުރާނެކަމަށާއި ޗާޕު ކުރުމުގެ ސަބަބުން ރައްޔިތުންގެ ޖީބަށް ބުރަ ބޮޑުވާ ވާހަކަތައް އެމްޑީޕީގެ ރައީސް ސާލިހު ފެކްޝަނަށް ނިސްބަތްވާ ބޭފުޅުންނަށް ދައްކަވަން ކެރިވަޑައިނުގަންނަވާ ސަބަބަކީ ކޮބައިތޯވެސް އޭނާ ސުވާލު ކުރެއްވި އެވެ.