ޢަރަބިއްޔާ ސްކޫލްގެ މައްސަލައިގައި ޖަވާބުދާރީ ކުރުވުމަށް އެޑީޔުކޭޝަން މިނިސްޓަރ މަޖިލީހަށް ހާޒިރުކުރުމަށް ހުށައަޅައިފައިވާނެ ކަމަށް މަހިބަދޫ ދާއިރާގެ މެމްބަރ އަހްމަދް ޠާރިޤް ވިދާޅުވެއްޖެއެވެ.

މަހިބަދޫ ދާއިރާގެ މެމްބަރު އަޙްމަދު ޠާރިޤް ވިދާޅުވީ ޢަރަބިއްޔާ ސްކޫލްގެ އާ އިމާރާތުގެ މަސައްކަތުގެ ތަފްސީލް ހޯދުމަށް، މިނިސްޓަރު އާއިޝަތު އަލީ ރައްޔިތުންގެ މަޖިލީހަށް ހާޒިރުކުރުމަށް ހުށަހަޅާފައިވާނެ ކަމަށެވެ.

ވަޒީރަކާއި ސުވާލުކުރުގެ ނޯޓިސްގައިވާ ގޮތުން ޓޮމް މިނިސްޓަރާއި ކުރަން ބޭނުންވާ ސުވާލުގައި ބުނެފައި ވަނީ ޢަރަބިއްޔާ ސްކޫލަށް މާލޭގައި އާ އިމާރާތެއް އެޅުމަށް ކޮންޓްރެކްޓަކާއި ހަވާލުކޮށްފައިވާ ކަމަށް 2022 އިއުލާނުކޮށްފައިވާ ކަމަށެވެ.

ޢަރަބިއްޔާއަށް އަޅާ ސްކޫލްގެ ކްންޓްރެކްޓް އަގަކީ ކިހާވަރެއްތޯ އާއި މަސައްކަތް ނިންމަން ހަވާލުކުރި މުއްދަތަކީ ކޮބައިތޯ ޠާރިޤްގެ ސުވާލުގައި ވެއެވެ. އަދި މިހާރު މަސައްކަތް ނިމިފައިވަނީ ކިހާވަރަކަށްތޯ އާއި ސްކޫލްގެ ބޭނުންކުރަން ފެށޭނެ ދުވަހެއް އެނގިލައްވާތޯ ވެސް ސުވާލުގައި ވެއެވެ.

މި ހަފްތާގެ އާދީއްތަ ދުވަހު ޢަރަބިއްޔާގެ ބެލެނިވެރިން ވަނީ ބާޖަމާލުއްދީން ކައިރީގައި އިހްތިޖާޖް ކޮށްފައިވެއެވެ. ބެލެނިވެރިން އިހްތިޖާޖު ކޮށްފައިވަނީ 18 މަސް ދުވަހުން ނިންމަން ބުނި ޢަރަބިއްޔާގެ ޢިމާރާތް އެޅުމަށް އަދި ބިންގާވެސް އެޅިފައި ނުވާތީ އެކަމާއި ގުޅިގެނެވެ.

18 މަސް ދުވަސް ތެރޭގައި ޢަރަބިއްޔާގެ ޢިމާރާތް ނިންމަން ބުނި ނަމަވެސް އަދިވެސް 2 މަސްދުވަސް ތެރޭގައި ތަޅައި ސާފުކޮށް ހުސްކުރަން ބުނި ބަޖަމާލުއްދީނުގެ ބިން ސާފުކޮށްވެސް ނުނިމެއެވެ. އެމަސައްކަތް ފެށިތާ މިހާރުވަނީ 7 މަސް ދުވަސް ވެފައެވެ.

ޢަރަބިއްޔާ ސްކޫލް އިމާރާތުގައި ރެނދުލައި، އެތަނަކީ ކުދިންތަކެއް ކިޔެވުމަށް ދިއުމަށް އެކަށީގެން ނުވާ ތަނެއް ކަމަށް  ބުނެ މިދިޔަ އަހަރުގެ ފަހުކޮޅު އެ ސްކޫލްގެ ބެލެނިވެރިން ވަނީ އިހްތިޖާޖު ކޮށްފައެވެ. އޭރު ސްކޫލްގެ ތަނބުތަކުގައި ރެނދުލައި ފައި ހުރި ފޮޓޯތަކާއި ވީޑިއޯ ތައްވެސް މީޑިއާގައި ދައުރުވެފައިވެއެވެ.

އެ އިހުތިޖާޖުތަކާ ގުޅިގެން އެޑިއުކޭޝަން މިނިސްޓްރީން ފުރަތަމަ ނިންމީ ޢަރަބިއްޔާގެ ކުދިން ވަގުތީ ގޮތުން އިއްޒުއްދީން ސްކޫލަށް ބަދަލު ކުރާށެވެ. ނަމަވެސް އެ ސްކޫލްގެ ބެލެނިވެރިން އެ ނިންމުމާ ދެކޮޅު ހެދުމުން އާ އިމާރާތެއް އަޅަން މާލެއިން ބިމެއް ހޯދުމުގެ މަސައްކަތް ކުރާނެކަން އެޑިއުކޭޝަން މިނިސްޓްރީން ފާހަގަކުރިއެވެ.

އޭގެ ފަހުން، އަރަބިއްޔާ ސްކޫލް އިމާރާތުގެ ބަދަލުގައި އާ އިމާރާތެއް އަޅަން ނިންމެވިކަން ރައީސް އިބްރާހީމް މުޙައްމަދު ޞާލިޙު 2021 ގެ ޑިސެމްބަރު މަހުގެ ތެރޭގައި އިއުލާންކުރެއްވިއެވެ.

އެގޮތުން ސަރުކާރުން ބާ ޖަމާލުއްދީން ބިމުގައި ޖަމާލުއްދީން ސްކޫލުގެ އިތުރު އިމާރާތަކާއި

ޢަރަބިއްޔާ ސްކޫލުގެ އާ އިމާރާތް އެޅުމަށް 168 މިލިއަން ރުފިޔާއަށް އަމިން ކޮންސްޓްރަކްޝަންއާ ހަވާލުކޮށް އެއްބަސްވުމުގައި ސޮއިކޮށްފައިވެއެވެ.

އަރަބިއްޔާ ސްކޫލުގެ ދަރިވަރުން މިހާރު ވަގުތީ ގޮތުން ކިޔަވަމުން ގެންދަނީ ފޮރިން މިނިސްޓްރީ ހިންގި ސޯމިލް އިމާރާތުގައެވެ. އެ އިމާރާތުގައި ގިނަ ދުވަސްތަކެއް ހޭދަކުރަން ޖެހުމަކީ ދަރިވަރުން އަސާސީ އެތައް ހައްގުތަކުން މަހުރޫމުކޮށްގެން ތިބެން ޖެހޭ ކަމެއްކަން ފާހަގަކުރައްވާ ޢަރަބިއްޔާ ސުކޫލުގެ ބެލެނިވެރިން ވަނީ ބޮޑެތި ކަންބޮޑުވުންތަކެއް ފާޅުކޮށްފައެވެ.