ޕީޕީއެމް ގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ މައްޗަށް ހުކުން ކުރާ ކޮންމެ ފަނޑިޔާރަކަށް ޕްރޮމޯޝަން ދިނުމަކީ ބޮޑު ގޯހެއްކަމަށް، ރައީސް ޔާމީންގެ އިސް ގާނޫނީ ވަކީލު ޑރ މުހައްމަދު ޖަމީލު އަހުމަދު ވިދާޅުވެއްޖެ އެވެ.
ވ އާރަށުގެ މުއާމަލާތާއި ގުޅިގެން ރައީސް ޔާމީންގެ މައްޗަށް ކުރި 11 އަހަރުގެ ޖަލު ހުކުމް ހައިކޯޓުގައި އިސްތިއުނާފު ކޮށްފައިވާއިރު އެކަމާއި ގުޅިގެން ނޫސްވެރިންނަށް މައުލޫމާތު ދިނުމަށް ބޭއްވި ބައްދަލުވުމުގައި ޑރ ޖަމީލު ވަނީ ޝަރުއީ ދާއިރާއަށް އޮތް ސިޔާސީ ނުފޫޒުތަކަށް އަލިއަޅުވާލައްވާ މުހިންމު ވާހަކަތަކަށް ހިއްސާކުރައްވާފަ އެވެ.
އެގޮތުން އެމަނިކުފާނު ވިދާޅުވީ ރައީސް ޔާމީންގެ މައްޗަށް ހުކުން ކުރާ ކޮންމެ ފަނޑިޔާރަކަށް އެފަހުން ޕްރޮމޯޝަން ލިބިގެން ދިއުމަކީ ވަރަށް ނުރައްކާތެރި ކަމެއް ކަމަށެވެ. އަދި އެހީ ޖުޑިޝަރީގެ ނަޒާހަތްތެރިކަން ގެއްލި، ކޯޓުތަކަށް ރައްޔިތުންގެ އިތުބާރު ގެއްލިގެންދާނެ ކަމެއް ކަމަށެވެ.
"ރައީސް ޔާމީންގެ މައްސަލައިގައި އެންމެ ފުރަތަަމަ މައްސަލައިގައި ހުކުން އިއްވި ފަނޑިޔާރަށް ޑިރެކްޓު ޕްރޮމޯޝަނެއް ސުޕްރިމް ކޯޓަށް. އެ މައްސަލަ ބެލި ހައިލަމް ވަކި ވެގެން ދިޔަ ގޮތް ފެންނަން އެ އޮތީ މައްސަލަ. އޭގެ ފަހުން ހައިލް ދިން ބަޔާނުގައި ހައިލަމް އެބައޮތޭ ވިދާޅުވެ ނުފޫޒު ފޯރުވިއޭ... ދެން އޭގެ ފަހުން ފާޅުވެގެން ދިޔަ، ލީކުވެގެން ދިޔަ އޯޑިއޯތައް.. އެ ފަނޑިޔާރުގެ ކަންތައް ނިމުނީ، މިހާރު އަޑުއިވޭ ގޮތުގައި އެންމެ ފަހުން ހުކުން އިއްވި މި ފަނޑިޔާރުވެސް މިހާރު އިންޓަވިއުއަށް ހިނގައްޖެ. މާދަމާ އިވޭނީ މިސާލަކަށް ޕްރޮމޯޝަން ލިބޭ އަޑު.. އެހެންވީމަ މި މިންވަރަށް ކަންތައްތައް ދިޔައިމަ މި ގޯސް"
ރައީސް ޔާމީންގެ އިސް ގާނޫނީ ވަކީލު ޑރ ޖަމީލު
ޑރ ޖަމީލު ވިދާޅުވީ ރައީސް ޔާމިނަށް ހުކުން ކުރާ ފަނޑިޔާރުން ކުއްލިގޮތަކަށް ޕްރޮމޯޝަންތައް ލިބިގެންދާ މައްސަލައަކީ ޖުޑިޝަރީގެ އިސް ނެންގެވުމުގެ ދަށުން ބަލަން ޖެހޭ މައްސަލައެއްކަމަށެވެ. ރާއްޖޭގެ ސުޕްރިމް ކޯޓުން އަމިއްލަ އިސް ނެންގެވުމުގެ ތެރެއިން އެ މައްސަލަތައް ބަލަން ޖެހޭކަމަށް ޑރ ޖަމީލު ވިދާޅުވިއެވެ.
"ޖުޑިޝަރީއޭ އަޅުގަނޑު މާނަ ކުރަނީ ޖުޑިޝަރީގެ އެންމެ ބޮޑު މަސްއޫލިއްޔަތެއް އޮތީ ސުޕްރިމް ކޯޓަށް. އަޅުގަނޑު ގަބޫލުކުރާ ގޮތުގައި އެބަޖެހޭ އެބޭފުޅުން މި ކަމުގައި ވިސްނުންތަކެއް ވިސްނަން. ޕާކިސްތާކުގައި އެބަ ބަލާއެބަ މިހާރު ޕާކިސްތާނުގެ ސުޕްރިމް ކޯޓުގެ އަމިއްލަ އިސް ނެންގެވުމުގެ މަތިން އެތާގެ ފަނޑިޔާރުންތަކެއްގެ އޯޑިއޯތަކެއް ލީކުވެގެން. އެކަމަކު އަޅުގަނޑުމެންގެ ރާއްޖޭގައި ފުލުހުންގެ މައްސަލަތަކެއް ނުބެލޭ.
ރައީސް ޔާމީންގެ އިސް ގާނޫނީ ވަކީލު ޑރ ޖަމީލު
ޝަރުއީ ދާއިރާގައި ހަދަމުންދާ ބޮޑެތި ގޯސްތައް ހުރި ނަމަވެސް ހައި ކޯޓުން ރައީސް ޔާމީނަށް އިންސާފު ލިބޭނެކަމާމެދު ޝައްކު ނުކުރައްވާކަމަށް ޑރ ޖަމީލު ވިދާޅުވިއެވެ.
އެމަނިކުފާނު ވިދާޅުވީ، ރައީސް ޔާމިންގެ ގާނޫނީ ޓީމުން އިސްތިއުނާފު ހުށައަޅާފައިވާނީ، ދަށު ކޯޓު މަރުހަލާގައި ހަދާފައިވާ ބޮޑެތި ގޯސްތައް ފާހަގަކޮށް ފުރިހަމަ ދިރާސާއެއްގެ މައްޗަށް ކަމަށެވެ. އަދި ގާނޫނީ ގިނަ އިސްތިއުނާފީ ނުގުތާތަކެއް ހުށައަޅާފައިވާނެކަމަށް އެމަނިކުފާނު ވިދާޅުވި އެވެ.
އެއާއެކު އެމަނިކުފާނު ވިދާޅުވީ ގާނޫނީ ފަންނުގެ ބޭފުޅުންނަށް ވަރަށް ތިލަކޮށް ކްރިމިނަލް ކޯޓުން ހަދާފައިވާ ގޯސްތައް އިސްތިއުނާފީ ނުގުތާތަކަށް ބަލާލުމުން ފާހަގަކުރެވޭނެ ކަމަށެވެ.
އެހެންނަމުން ދަށު ކޯޓުން ހަދާފައިވާ އެ ގޯސްތައް ހައިކޯޓުން ދަމަހައްޓާނެކަމަށް ގަބޫލު ނުކުރައްވާ ކަމަށާއި، ރައީސް ޔާމިން ހައިކޯޓު މަރުހަލާއިން މިނިވަންވެ ވަޑައިގަންނަވާނެކަމަށް ޔަގީންކުރައްވާކަމަށް ޑރ ޖަމީލު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
