ޕީޕީއެމް އާއި ޕީއެންސީ ކޯލިޝަނަގެ ބ ތުޅާދޫ ދާއިރާގެ ރައީސް މުޙައްމަދު ޢަޠީފް ހައްޔަރުކުރުމުން އެކަން ކުށްވެރިކޮށްފިއެވެ.

އެ ކޯލިޝަނުން ނެރެފައިވާ ނޫސްބަޔާނުގައި ބުނެފައިވަނީ މިކޯލިޝަންގެ ތުޅާދޫ ދާއިރާގެ ނާއިބު ރައީސް މުޙައްމަދު ޢަޠީފް ހައްޔަރުކޮށް އޭނާއަށް ދެމުންދާ ލާއިންސާނީ އަނިޔާތައް ހަރުކަށި އިބާރާތުން ކުށްވެރި ކުރާކަމަށެވެ.

އަދި މިނޫސް ބަޔާނުގައި ބ. ތުޅާދޫ ދާއިރާގެ ނާއިބު ރައީސް މުޙައްމަދު ޢަޠީފް އާއި ދޭތެރޭ ބ. ތުޅާދޫ ފުލުހުން ޢަމަލު ކުރަމުން ގެންދާ ލާއިންސާނީ ގޮތްތައް މިހާރުން މިހާރަށް ބައްލަވާދެއްވާ ފިޔަވަޅު އަޅުއްވައިދެއްވުމަށް ހިޔުމަންރައިޓްސް ކޮމިޝަން އޮފް ދި މޯލްޑިވްސް އާއި ނޭޝަނަލް އިންޓެގްރިޓީ ކޮމިޝަނަށްވެސް ގޮވާލައިފައެވެ. އަދި ފުލުހުންގެ ކިބައިން މިފަދަ ލާއިންސާނީ ޢަމަލުތައް ތަކުރާރުވަމުންދާ ދިއުމާއިމެދު ފުލުހުންގެ އިދާރާއިން ދިވެހި ރައްޔިތުންނަށް ޖަވާބުދާރީ ވުމަށް ހޯމް މިނިސްޓަރު އަދި ކޮމިޝަނަރ އޮފް ޕޮލިސް މުޙައްމަދު ޙަމީދަށްވެސް ގޮވާލައިފައިވެއެވެ.

Advertisement

ޝަހީދުންގެ ދުވަސް ފާހަގަ ކުރުމުގެ ގޮތުން ބ. ތުޅާދޫގައި ސަރުކާރުން ބޭއްވި ރަސްމީ ޖަލްސާއަށް ހޯމް މިނިސްޓަރުގެ ދައުވަތަށް ޕީޕީއެމް  ޕީއެންސީ ކޯލިޝަންގެ ތުޅާދޫ ދާއިރާގެ ނާއިބު ރައީސް މުޙައްމަދު ޢަޠީފް (އަތީ) ޖަލްސާއަށް ގޮސް، ޖަލްސާގައި ހުއްޓައި ޖަލްސާއިން ބޭރުކޮށް ފުލުހުން ވަނީ އޭނާ ހައްޔަރުކޮށްފައެވެ.

އޭނާ ހައްޔަރުކޮށްފައިވަނީ ޤާނޫނީ އިންޒާރު ދިނުމެއް ނެތިކަމާއި، ފުލުހުންގެ ބެލުމުގެ ދަށުގައި އޭނާ ހައްޔަރުކޮށްގެން ގެންގުޅޭއިރު އޭނާގެ ވަކީލުންނާއި އޭނާއާއި މުޢާމަލާތު ކުރުމުގެ ފުރުޞަތު ނުދީ ގެންގުޅޭ ކަމާއި، ސިއްޙީ ހާލު ދަށްވުމުން ރޭގެ ވަގުތެއްގައި ހޮސްޕިޓަލަށް ގެންގޮސް އެކަނިމާއެކަނި ހޮސްޕިޓަލަށް ދޫކޮށްލުމަށްފަހު އެތައް ވަގުތެއް ފާއިތުވި ފަހުން މިއަދުގެ ހެނދުނުގެ ވަގުތެއްގައި އަނެއްކާވެސް އަނބުރާ ފުލުހުންގެ މަރުކަޒަށް ގެންގޮސްފައި ވާކަމަށް ނޫސް ބަޔާނުގައި ވެއެވެ.

ޢަޠީފްގެ ލޯޔަރުން އޭނާއަށް ޤާނޫނީ އެހިތެރިކަން ފޯރުކޮށްދިނުމަށް ކުރި މަސައްކަތަށް ފުލުހުން ހުރަސް އަޅާ މުޙައްމަދު ޢަޠީފް ކިޔާ ބޭފުޅަކު ބ. ތުޅާދޫއިން ހައްޔަރުކުރެވިފައި ނުވާކަމަށް ވެސް ފުލުހުންގެ އިދާރާއިން ލޯޔަރުންނަށް ދެންނެވިކަމަށް ނޫސް ބަޔާނުގައިވެއެވެ. 

މުޙައްމަދު ޢަޠީފް ފުލުހުންގެ ބެލުމުގެ ދަށަށް ގެންގޮސް، އޭނާގެ ސިއްޙީ ހާލު ދަށްވުމުން ބ. ތުޅާދޫ ހޮސްޕިޓަލަށް އެކަނިމާއެކަނި ދޫކޮށްލުމަށްފަހު، މިއަދުގެ ވަގުތެއްގައި އަނެއްކާވެސް ފުލުހުންގެ ބެލުމުގެ ދަށަށް ގެންގޮސް އޭނާގެ ވަކީލުންނަށް ފުރުޞަތު ނުދީ ގެންގުޅޭ ގެންގުޅުން އިދިކޮޅުގެ ފަރާތުން އެންމެ ހަރުކަށި އިބާރާތުން ކުށްވެރިކުރާ ކަމަށް ނޫސް ބަޔާނުގައި ވެއެވެ.  

ހައްޔަރުކުރި ގޮތަށް މިވަގުތާއި ހަމައަށް ވަކީލަކު ޢައްޔަން ވުމަށް ހުރަސްއެޅުމުގެ އިތުރުން ޢަޠީފް އަށް ކާއެއްޗެއްވެސް ދީފައި ނުވާ ކަމަށް ނޫސް ބަޔާނުގައި ބުނެފައިވެއެވެ.