މާތް الله ގެ ކޯފާއަށް ވުރެ ބިރުވެރިކަމެއް ނޯންނާނެކަމަށް ޖުޑީޝަރީގައި ތިއްބެވި ފަރާތްތަކުން ޤަބޫލުކުރަންޖެހޭ ކަމަށް މާލެސިޓީ ކައުންސިލްގެ މޭޔަރު އަދި ޕީޕީއެމް ގެ ނައިބު ރައީސް ޑރ. މުހައްމަދު މުޢިއްޒު ވިދާޅުވެއްޖެއެވެ. 

ރޭ ބޭއްވި ޕީޕީއެމްގެ ޖަގަހަ ޖަލްސާގައި ވާހަކަ ދައްކަވަމުން މުޢިއްޒު ވިދާޅުވީ، އިދިކޮޅުގެ ރިޔާސީ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމް ނުހައްގުން ޖަލުގައި އޮންނަވާތާ މިހާރު ދެމަސްދުވަސް ވެފައިވާކަމަށެވެ.

އަދި ދިވެހި ގައުމުދެކެ ލޯބިވާ، ދިވެހި ގައުމުގައި ހިނގަމުންދާ ކަންކަން ރަނގަޅަށް އެނގޭ އެންމެހައި ފަރާތްތަކުން ވެސް އެދި ގޮވަނީ އެމަނިކުފާނު މިނިވަން ކުރެއްވުމަށް ކަމަށާ އެކަން ވަރަށް އަވަހަށް ވެގެން ދާނެ ކަމަށްވެސް މުޢިިއްޒު ވިދާޅުވިއެވެ. 

Advertisement

އެގޮތުން، ރައީސް ޔާމީންގެ މައްޗަށް ކްރިމިނަލް ކޯޓުން ކުރި ހުކުމް މިހާރު އިސްތިއުނާފު ކޮށްފައިވާކަން ފާހަގަކުރައްވައި މުޢިއްޒުވަނީ އެ މައްސަލަ އަވަސް ކޮށްދީ، އެމަނިކުފާނަށް އިންސާފް ހޯދައި ދިނުމަށް ޖުޑިޝަރީގައި މަސައްކަތް ކުރާ އެންމެހާ ފަރާތްތަކަށް ގޮވާލާފައެވެ. 

މިއާއެކު މުޢިިއްޒު ވިދާޅުވީ ކޯޓުތަކުގައި ހަރުކޮށްފައިވާ ގުރުއާނުގެ އާޔަތުގައި ވަނީ ޢަދުލުވެރިކަމާއި އެކު ހުކުމް ކުރުމަށް ކަމަށާ، އިދިކޮޅުން އެދެނީ އެ ބަހާއި ޢަމަލާއި ދިމާކުރުން ކަމަށެވެ. 

މުޢިއްޒު އިތުރަށް ވިދާޅުވީ، ރައީސް ޔާމީންގެ މައްސަލަ އިންސާފުވެރިކަމާއި އެކު އަވަހަށް ނިންމުމަކީ ހަމައެކަނި ހައިކޯޓުގެ ޒިންމާއެއް ނޫން ކަމަށާ ސްޕްރީމްކޯޓުން ވެސް އެކަން އެގޮތަށް ކުރަންޖެހޭ ކަމަށާ، އެހެނީ އެމަނިކުފާނު މިނިވަންވެ މިގައުމުގެ ވެރިކަމާއި ހަވާލުވުމަކީ އެތައް ބަޔަކު އެދޭ އެދުމަކަށްވާއިރު، އެކަމަކީ ގައުމުގެ މަސްލަހަތާއި ގުޅުން ހުރި ކަމެއް ކަމަށެވެ. 

އެހެންކަމުން ރައީސް ޔާމީނަށް އިންސާފް ހޯދައި ދިނުމުގައި ސާބިތުވެ ތިބުމަށް ޝަރުޢީ ދާއިރާގައި މަސައްކަތް ކުރާ އެންމެހާ ފަރާތަކުގެ އަރިހުން މުޢިިއްޒު ވަނީ އެދިވަޑައިގެންފަ އެވެ.