ކުރިއަށް އޮތް ރިޔާސީ އިންތިހާބުގައި އިދިކޮޅު ޕީޕީއެމް/ޕީއެންސީއާއި އެކު ކޯލިޝަން ހެދުމަށް އެދި އެމްޑީއޭ އަށް ސިޓީއެއް ފޮނުވައިފި އެވެ. 

ވިޔަފާރިވެރިޔާ އަހުމަދު ސިޔާމް (ސަން ސިޔާމް) ރައީސް ކަމުގެ މަގާމު ފުރުއްވަމުންދާ އެމްޑީއޭ އާއި އެކުގައި ކޯލިޝަން ސަރުކާރެއް އެކުލަވައި ލުމަށް އިދިކޮޅުން ޝައުގުވެރިކަން ފާޅުކޮށްފައިވާ ކަމަށް އެމްޑީއޭއިން މިއަދު ވަނީ ބުނެފައެވެ. އަދި ކޯލިޝަން ހެދުމަށް ޝައުގުވެރިވާ ހުރިހާ ޕާޓީތަކަށް ވެސް މަޝްވަރާ ކުރުމުގެ ފުރުސަތު މިއަދުން ފެށިގެން އޮތް ކަމަށް އެޕާޓީން ބުނެފައިވެއެވެ. 

އެކަމާއި ގުޅިގެން އިދިކޮޅުން ބުނީ، އެ ކޯލިޝަންގެ ލީޑަރުން މިއަދު ހަވީރު އެމްޑީއޭއާއި އެކު މަޝްވަރާ ބައްދަލުވުމެއް މިއަދު ހަވީރު 5:00 ގައި ބޭއްވުމަށް ހަމަޖެހިފައިވާ ކަމަށެވެ. އަދި އެކަމާއި ގުޅޭ އިތުރު ތަފްސީލް ބައްދަލުވުމަށް ފަހުގައި ހިއްސާ ކުރާނެ ކަމަށްވެސް ބުނެފައިވެއެވެ. 

އިދިކޮޅުން އެމްޑީއޭ އާއި ބައްދަލު ކުރަން ނިންމާފައިވާއިރު، އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ އަރިސް ބޭފުޅުންވެސް މިއަދު ވަނީ އެމްޑީއޭގެ ރައީސް ސަން ސިޔާމް އާއި ބައްދަލު ކުރައްވާފައެވެ. 

ރައީސް ޞާލިހާއިއެކު ކޯލިޝަން ހަދާނެކަން މިހާތަނަށް އިއުލާން ކޮށްފައިވަނީ ހަމައެކަނި އަދާލަތު ޕާޓީން އެކަންޏެވެ. އެހެންނަމަވެސް، ޖުމްހޫރީ ޕާޓީއާއި، އެމްއާރްއެމް އަށްވެސް ރައީސް ޞާލިހު ވަނީ ކޯލިޝަން ހެދުމުގެ ދައުވަތު ދެއްވާފައެވެ.