ފަލަސްޠީނުގެ ދެކުނު އައްސޭރީގެ ނާބުލްސް ގައި އިޒްރާއިލުން ސިފައިން ހިންގި މިލިޓަރީ ރެއިޑްގައި ޒަހަމްވި 4 މީހަކު އައިސީޔޫގައި ފަރުވާހޯދަމުން އެބަދެއެވެ.

ނާބުލްސް ގައި ހުންނަ ރަފީދިއާ ހޮސްޕިޓަލުގެ ޑިރެކްޓަރ ޣައްސާން ދޮޣްލަސް ވިދާޅުވީ ހަތަރު މީހަކު އެ ހޮސްޕިޓަލް ގެ އައިސީޔޫގައި ފަރުވާހޯދަމުން ދާކަމަށެވެ. "އެމީހުންގެ ހާލަތު މިހާރު އަންނަނީ ރަނގަޅުވަމުން" ޣައްސާން އިތުރަށް ވިދާޅުވިއެވެ.

ފަލަސްޠީނުގެ ސިއްޙީ އޮފިޝަލަކު ވިދާޅުވީ 82 މީހަކު ވަޒަން އަރައިގެން ފަރުވާހޯދައިފައި ވާކަމަށެވެ. ފަލަސްޠީނުގެ ރެޑް ކްރޮސެންޓުން ބުނެފައިވަނީ އެޖަމިއްޔާގެ މެޑިކަލް އޮފިޝަލުން ކަރުނަ ގޭހުގެ އަސަރުކުރި 250 މީހަކަށް ފަރުވާ ދީފައިވާކަމަށެވެ.

Advertisement

ޒަހަމްވި މީހުންގެ ތެރޭގައި ފަލަސްޠީނުގެ ޓީވީ ޖާނަލިސްޓް މުހައްމަދް އަލްޚާޠިބް ވެސް ހިމެނެއެވެ. އޭނާގެ އަތަށް ވަނީ ވަޒަން އަރައިފައެވެ.

އަލްޖަޒީރާގެ ނޫސްވެރިޔާ ނިދާ އިބްރާހިމް ބުނެފައިވަނީ ރާމައްﷲގެ މަގުތައް ރެއިޑް ތަކުގެ ސަބަބުން ހުސްވެފައިވާކަމަށެވެ.

"ފަލަސްޠީނުގެ ރައްޔިތުން ބުނެފައިވަނީ އެމީހުން ތިބީ އެކަނި ކަމަށް، އިޒްރާއިލް ސިފައިންގެ ހަމަލާތަކާއި އަނިޔާތަކާއި ކުރިމަތިލުމަށް ތިބީ އެމީހުން އެކަނި ކަމަށް، އެމީހުން ގެ ދިފާއު ގައި ތެދުވާނެ ބަޔަކުނެތްކަމަށް" ނިދާ ބުނެފައިވެއެވެ.