މޯލްޑިވްސް ޑިވެލޮޕްމެންޓް އެލަޔަންސް (އެމްޑީއޭ) އާއި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އަކީ އެއްބަޔެއް ކަމަށާއި، ކުރިއަށް އޮތް ރިޔާސީ އިންތިޚާބުގައި އެމްޑީއޭއިން ޕީޕީއެމްއާއެކު ކޯލިޝަން ހަދާނެކަމުގެ އުންމީދު ވަރަށް ބޮޑުކަމަށް ޕްރޮގްރެސިވް ކޮންގްރެސް ކޯލިޝަނުން ބުނެފި އެވެ. 

ރިޔާސީ އިންތިޚާބުގައި ކޯލިޝަން ހެދުމާއި ގުޅޭގޮތުން އެ ދެޕާޓީން ވަނީ މިއަދު މަޝްވަރާ ބައްދަލުވުމެއް ބާއްވާފަ އެވެ. 

އެ ބައްދަލުވުމަށްފަހު ނޫސްވެރިންނާއި ވާހަކަދައްކަވަމުން އިދިކޮޅު އިއްތިހާދުގައި ހިމެނޭ ޕީއެންސީގެ ނައިބުރައީސް އިބުރާހިމް ޝުޖާއު ވިދާޅުވީ ޕީޕީއެމްއާއި އެމްޑީއޭއަކީ އެކުގައި މަސައްކަތް ކުރުމުގެ ތާރީހެއް އޮތް ދެ ޕާޓީކަމަށެވެ.

Advertisement

މިއަދު ކުރިއަށް ދިޔަ ބައްދަލުވުމަކީ ދެ ޕާޓީ ގުޅިގެން އިންތިޚާބުގައި މަސައްކަތް ކުރުމާއި ގުޅޭގޮތުން ކުރިއަށް ގެންދިޔަ ފުރަތަމަ ބައްދަލުވުން ކަމަށާއި، އަދި އެއީ ވަރަށް ކާމިޔާބު ބައްދަލުވުމެއްކަމަށް ޝުޖާއު ވިދާޅުވި އެވެ. 

އެމްޑީއޭއާއި ޕީޕީއެމްގެ މަޝްވަރާ ބައްދަލުވުމުގެ ތެރެއިން 

ޝުޖާއު އިތުރަށް ވިދާޅުވީ އިދިކޮޅުން މީގެ ކުރިން އެމްޑީއޭއާކު ކޯލިޝަން ހެދުމުގެ ޝައުގުވެރިކަން ފާޅުނުކުރީ، އެ ޕާޓީގެ ލީޑަރު ވެރިކަމަށް ކުރިމަތިލައްވާނެކަމަށް އިއުނާލުކޮށްފައި އޮތުމުން ކަމަށެވެ. 

އެހެން ނަމަވެސް ޕާޓީގެ ސްޓޭންޑު ބަދަލުވުމުން، ޕީޕީއެމްއިން ކޯލިޝަން ހެދުމަށް އެންމެ ފުރަތަމަ މަޝްވަރާކޮށްފައިވާނީ އެމްޑީއޭއާކަމަށް ޝުޖާއު ވިދާޅުވި އެވެ. އަދި އެމްޑީއޭއާއެކު ކުރިއަށް އޮތް އިންތިޚާބުގައި މަސައްކުރެވޭނެކަމަށް އުންމީދުކުރައްވާކަމަށް ވިދާޅުވި އެވެ.