ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ވެރިކަން ދަމަހައްޓަން މަސްތުވާތަކެއްޗާއި ހަށިވިއްކުން ފަހިކޮށްފައިވާކަމަށް ކުރީގެ ނައިބުރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެ އެވެ. 

ޑރ ޖަމީލު މިފަދައިން ވިދާޅުވެފައިވަނީ ރައީސް ޞާލިހު ޑްރަގް ކާޓަލްތަކާއި ގުޅުމެއް ނެތްކަމަށް ވިދާޅުވުމުން އެކަން ޤަބޫލުފުޅު ކުރައްވަން ދަތިފުޅުވާކަމަށް މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވެފައިވާކަމަށް ޝާއިއުކޮށްފައިވާ ޚަބަރެއް ހިއްސާކުރައްވާ ކުރެއްވި ޓްވީޓެއްގަ އެވެ. 

ޖަމީލް ވިދާޅުވީ މަސްތުވާތަކެތީގެ ވަބާއިން އެތައް އާއިލާއެއް ނިކަމެތިވެ ހާލުގައި ޖެހިފައިވީ ނަމަވެސް މިހާރު ޕޮލިސީ އޮތީ އެ ވަބާ ފެތުރޭގޮތައް ފަރުމާކޮށްފައި ކަމަށެވެ. އަދި އެ ޕޮލިސީ ތަންފީޒު ކުރަމުންދަނީ ސީދާ ރައީސުލްޖުމުހުރިއްޔާ އިބްރާހިމް މުހައްމަދު ޞާލިހު އަންގަވައިގެންކަމަށް ޑރ ޖަމީލު ތުހުމަތުކުރެއްވި އެވެ. 

Advertisement

އެކަން ފާހަގަކުރައްވާ ޑރ ޖަމީލު ވިދާޅުވީ ވެރިކަން ދެމެހެއްޓުމަށް މަސްތުވާތަކެއްޗާއި ހަށިވިއްކުން މި ސަރުކާރުން ފަހިކޮށްފައިވާ ކަމަށެވެ. 

މި ސަރުކާރުން މަސްތުވާތަކެތި އާންމުކުރާކަމަށް ޑރ ޖަމީލު ތުހުމަތު ކުރައްވާފައިވާއިރު މަސްތުވާތަކެތީގެ ވިޔާފާރި ކުރިކަމުގެ ކުށް ސާބިތުވެ ޖަލު ހުކުން ކޮށްފައިވާ މީހަކު މި ސަރުކާރުން ވަނީ މިނިވަންކޮށްފަ އެވެ. އަދި ރާއްޖެއަށް މަސްތުވާތަކެތި އެތެރެކުރާ ބޭރު މީހުން އަނބުރާ ފޮނުވާލެވޭ ގައިދެއް ހަދާ، އެ ގަވައިދުގެ ދަށުން ބަޔަކު ވަނީ އަނބުރާ ފޮނުވާވެސް ލައިފައެވެ. 

ސަރުކާރުން މިފަދައިން އަމަލުކުރަމުންދާކަން ފާހަގަކޮށް އެމްޑީޕީގައި ތިއްބަވާ ސަރުކާރަށް ފާޑުކިޔާ މެމްބަރުންތައް ދަނީ ކަންބޮޑުވުން ފާޅުކުރަމުންނެވެ.