ފުލުހުން ހިންގާ އެކި އޮޕަރޭޝަންތަކުގައި ކަރަންޓް ޝޮކް ޖައްސާ ޓޭޒާ ގަން ބޭނުން ކުރަން ފަށައިފިއެވެ.
ފުލުހުން ބޭނުން ކުރަން ތައްޔާރުވާ ޓޭޒާ ގަންއަކީ އެމެރިކާގައި ތައްޔާރުކޮށް، މިހާރު ދުނިޔޭގެ ކުރިއަރާފައިވާ ގިނަ ގައުމުތަކުގައި ބޭނުން ކުރަމުންދާ ވަސީލަތެކެވެ. ޓޭޒާ-7ގެ މި ގަންއަކީ މިމޮޑެލްގެ އެންމެފަހުގެ ވާޝަންއެވެ.
ޓޭޒާގަން ޖެހުމާއެކު މީހާ ބިންމައްޗަށް ވެއްޓި، ގާތްގަނޑަށް 5 ވަރަކަށް ސިކުންތު މީހާގެ ހަރަކާތް ހުއްޓި ފުލުހުންނަށް އޭނާ ބެލުމުގެ ދަށަށް ގެނައުމަށް ފަސޭހަ ވެއެވެ.
މާލެ ސަރަހައްދުގައި ޓޭޒާ ގަން ބޭނުން ކުރަން ފެށިކަން ހާމަކޮށް ކޮމިޝަނަރ އޮފް ޕޮލިސް މުހައްމަދު ހަމީދު ކުރެއްވި ޓުވީޓުގައި ވިދާޅުވީ ގަން ބޭނުން ކުރާނީ ސާޖެންޓު އަދި އެއަށްވުރެ މަތީ ރޭންކުގައި އެކަމަށް ޚާއްސަ ތަމްރީން ލިބިފައިވާ ފުލުހުން ކަމަށެވެ.
ފުލުހުންގެ ޚިދުމަތުގެ ޤާނޫނުގެ ދަށުން ފުލުހުންގެ ސަލާމަތާއި ރައްކާތެރިކަމަށާއި، މުޖުތަމަޢުގެ ސަލާމަތަށްޓަކައި ބޭނުން ކުރަން ފަށާފައިވާ ޓޭޒާ ގަންއަކީ ފުލުހުން ކުރިމަތިލާންޖެހޭ އެކި ސީންތަކާއި ގުޅިގެން މިހާރު ކުރިމަތިވާ މައްސަލަތަކަށް ހައްލު ލިބިގެންދާނެ މުހިންމު ވަޞީލަތެއް ކަމަށް މިގަން ފުރަތަމަ ނޫސްވެރިންނަށް ދައްކާލުމަށް މިދިޔަ އަހަރު ބޭއްވި ނޫސްވެރިންގެ ބައްދަލުވުމުގައި ސީޕީ ވިދާޅުވިއެވެ.
ފުލުހުން މިގަން ބޭނުން ކުރާ ސީންތަކަކީ އެހާލަތަކާއި ގުޅިގެން އެސަރަހައްދު ކޮންޓްރޯލް ކުރުމަށް އެވަގުތު އެސަރަހައްދުގައި ހަރަކާތްތެރިވާ އިސް އޮފިސަރަށް ފެނިއްޖެނަމަ ބޭނުން ކުރާގޮތަށް ހަމަޖެހިފައިވާ ވަސީލަތެކެވެ. އަދި ޓޭޒާ ގަން ބޭނުންކުރާ ކޮންމެ ޕޮލިސް އޮފިސަރެއްގެވެސް ޔުނިފޯމްގައި ބޮޑީވޯން ކެމެރާ ހުންނާނީ ހަރުކޮށްފައިކަމަށް އެ އިދާރާއިން ވަނީ ބުނެފަ އެވެ.
Advertisement
This content is created and paid for by advertisers and does not involve Voice Journalists
