2023 ވަނަ އަހަރުގެ ރިޔާސީ އިންތިޚާބަށް އެންމެ ފުރަތަމަ ރިޔާސީ ކެންޑިޑޭޓެއް ދެއްކީ ޕީޕީއެމުން ކަމަށާއި، އެއީ ޕީޕީއެމްގެ ލީޑަރު ރައީސް އަބްދުالله ޔާމީން އަބްދުލްގައްޔޫމު ކަމަށް ޕީޕީއެމްގެ ނައިބު ރައީސް އަދި މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެ އެވެ. 

ޕީޕީއެމް ޖަގަހަ ޖަލްސާގައި ވާހަކަދައްކަވަމުން ޝިޔާމު ވިދާޅުވީ ޕީޕީއެމްގެ ރިޔާސީ ކެންޑިޑޭޓު ނޭގިގެން ވަރަށް ގިނަ ބޭފުޅުން ސުވާލު ކުރަމުންދާ ކަމަށެވެ. އެ ސުވާލުތައް ކުރަނީ ރައީސް އަބްދުالله ޔާމީން އަބްދުލްގައްޔޫމުގެ މައްޗަށް ކޮށްފައިވާ ހުކުމުން އެމަނިކުފާނު މިނިވަންވާނެކަމާމެދު ސުވާލު އުފައްދާ ފަރާތްތަކުންކަމަށް ޝިޔާމު ވިދާޅުވި އެވެ. 

އެއާއެކު ޝިޔާމު ވިދާޅުވީ ރިޔާސީ އިންތިޚާބަށް އެންމެ ފުރަތަމަ ކެންޑިޑޭޓެއް ދެއްކީ ޕީޕީއެމުން ކަމަށެވެ. ޕީޕީއެމްގެ ރިޔާސީ ކެންޑިޑޭޓެއް ނެތްކަމަށް ބުނާ ވާހަކައަކީ ދޮގެއް ކަމަށާއި، ޕާޓީގެ ކެންޑީޑޭޓަކީ ރައީސް ޔާމީންކަމަށް އިއުލާނުކޮށްފައިވާ ކަމަށާއި، އެ ނިންމުމަށް ބަދަލެއް ނާންނާނެކަމަށް ޝިޔާމު ވިދާޅުވި އެވެ. 

Advertisement

ރައީސް ޔާމިނަށް ޕީޕީއެމްގެ ރިޔާސީ ޓިކެޓު ދޭން ނިންމާފައިވަނީ އެ ޕާޓީގެ ޖޮއިންޓު ކައުންސިލްގެ އިއްތިފާގުންނެވެ. އެފަހުން ބޮޑު ހަފްލާއެއްގެ ތެރެއިން ރާއްޖޭގެ ހުރިހާ ރަށްތައް ތަމްސީލުވާގޮތަށް މަންދޫބުންގެ އަތްޕުޅުން ރައީސް ޔާމިނަށް ވަނީ ރިޔާސީ ޓިކެޓު ހަވާލުކުރައްވާފަ އެވެ. 

އެހެން ނަމަވެސް މިވަގުތު އެމަނިކުފާނު ގެންދަވަނީ ޖަލު ހުކުމެއް ތަންފީޒު ކުރައްވަމުންނެވެ. އެއީ ވ އާރަށުގެ މުއާމަލާތާއި ގުޅުވާ އެމަނިކުފާނުގެ މައްޗަށް އުފުލި ދައުވާތައް ސާބިތުވާކަމަށް ކަނޑައަޅާ މިދިޔަ ޑިސެމްބަރު މަހުގެ 25ގައި ކްރިމިނަލް ކޯޓުން އިއްވި 11 އަހަރުގެ ޖަލު ހުކުމެވެ. 

އެ ހުކުމް މިހާރު ރައީސް ޔާމީންގެ ފަރާތްޕުޅުން އިސްތިއުނާފުކޮށްފައިވާއިރު، ހައިކޯޓު މަރުހަލާއިން އެމަނިކުފާނު މިނިވަންވާނެކަމުގެ ފުރިހަމަ ޔަގީންކަން އޮތްކަމަށް ރައީސް ޔާމީންގެ ޤާނޫނީ ޓީމުން ވަނީ ވިދާޅުވެފަ އެވެ. އަދި އެމަނިކުފާނަށް ކެމްޕޭނު ކުރުމުގެ ފަހި ފުރުސަތެއް ލިބިގެންދާނެކަމަށް ގާނޫނީ ޓީމުން ވިދާޅުވެފައި ވެއެވެ.