ހުޅުމާލޭ ދެވަނަ ފިޔަވަހިން ފަސް ލައްކަ އަކަފޫޓަށްވުރެ ބޮޑު ބިމެއް 800 މިލިއަން ރުފިޔާއަށް ސަރުކާރުން އެޗްޑީސީގެ އަތުން ގަނެފި އެވެ. 

ހުޅުމާލެއިން ގަތް ބިންތަކުގެ މިލްކުވެރިކަން ސަރުކާރަށް ބަދަލުކުރުމުގެ މުއާމަލާތްތައް ވަނީ ސިވިލް ކޯޓުގައި ހިނގައިފައެވެ. އެގޮތުން ފިނޭންސް މިނިސްޓްރީިން އެޗްޑީސީގެ އަތުން އެކު ޖުމުލަ 567،516.87 އަކަފޫޓުގެ 17 ޕްލޮޓެއް ގަނެފައިވެ އެވެ.

މި ޕްލޮޓުތަކުގެ ޖުމްލަ އަގަކީ 878،363،556.90 (އަށްސަތޭކަ ހަތްދިހަ އަށް މިލިއަން ތިން ސަތޭކަ ފަސްދޮޅަސް ތިންހާސް ފަސްސަތޭގަ ފަންސާސް ހަ ރުފިޔާ ނުވަދިހަ ލާރި)އެވެ.

އެ މުއާމަލާތާއި ގުޅޭގޮތުން ސިވިލް ކޯޓުން ކުރި ހުކުމުގައި ބުނެފައިވަނީ ހުޅުމާލޭ ދެވަނަ ފިޔަވަހިން ގަތް ބިންތަކަށް ފިނޭންސް މިނިސްޓްރީން ފައިސާ ދައްކާ ޚަލާސްކޮށްފައިވާކަން އެ މުއާމަލާތްތަކާއި ގުޅޭ ފުލް ޕޭމަންޓު ސްޓޭޓްމަންޓުން އެނގޭ ކަމަށެވެ. 

އެއާއެކު އެ ބިންތަކުގެ މިލްކުވެރިކަން ސިވިލް ކޯޓުން ވަނީ ފިނޭންސް މިނިސްޓްރީއަށް ބަދަލުކޮށްފަ އެވެ. 

ސަރުކާރުން ސަރުކާރުގެ ކުންފުންޏަކަށް އެވަރުގެ ބޮޑު އަދަދެއް ދައްކާ ޚަލާސްކުރުމަށްފަހު ބިންތަކެއް ހޯދި ސަބަބު މިހާތަނަށް ހާމަކޮށްފައެއް ނުވެއެވެ. 

އެހެން ނަމަވެސް ހުޅުމާލޭ ދެވަނަ ފިޔަވަހިން އަގުބޮޑު ބިންތަކެއް ސަރުކާރުން ގަނެފައިވާއިރު، ހުޅުމާލޭގެ ދެވަނަ ފިޔަވަހީގައި އަޅާފައިވާ ހިޔާ ފްލެޓުތަކުގެ ފިނިޝިން މަސައްކަތް ނިންމުމަށް ސަރުކާރުން ވަނީ ދެކޮޅު ހަދާފައެވެ. އަދި އެފަދައިން ދެކޮޅު ހެދީ ފިނިޝިން މަސައްކަތް ނިންމުމަކީ ސަރުކާރަށް މާލީގޮތުން ބުރަވާނެ ކަމަކަށް ވާތީކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވަނީ ވިދާޅުވެފަ އެވެ. 

އެހެން ނަމަވެސް އެޗްޑީސީން 17 ޕްލޮޓެއް ސަރުކާރުން ގަނެފައިވަނީ ހިޔާ ފްލެޓުތަކުގެ ފިނިޝިން މަސައްކަތް ނިންމުމަށް ބޭނުންވާ އަދަދަށްވުރެ ބޮޑު އަގުގައިކަން ފާހަގަކޮށްލެވެ އެވެ.