ހައްގުތަކޭ ކިޔައިގެން އެމްޑީޕީން ރައްޔިތުންނަށް ދެއްކީ ހުސް ދަޅަތަކެއްކަމަށް އިދިކޮޅު ކޯލިޝަންގެ އެކްޝަން ޑިޕާޓުމަންޓުގެ ޗެއާ އަދި މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލް ވިދާޅުވެއްޖެ އެވެ. 

މުހައްމަދު އިސްމާއިލް މިފަދައިން ވިދާޅުވެފައިވަނީ އިދިކޮޅުގެ ސިޔާސީ ލީޑަރު ރައީސް އަބްދުالله ޔާމީން އަބްދުލްގައްޔޫމު މިނިވަންކުރުމަށް ގޮވާލާ އިދިކޮޅުން ސިލްސިލާގޮތެއްގައި ކުރިއަށް ގެންދާ މުޒާހަރާތަކަށް ފުލުހުން މެދުވެރިކޮށް ހުރަސްއަޅަމުންދާކަން ފާހަގަކުރައްވާ ކުރެއްވި ޓްވީޓެއްގަ އެވެ. 

އެ ޓްވީޓުގައި މުހައްމަދު އިސްމާއިލް ވަނީ ގާނޫނު އަސާސީން ރައްޔިތުންނަށް ލިބިދޭ ޚިޔާލުފާޅުކުރުމުގެ ހައްގު އެމްޑީޕީގެ ވެރިކަމެއްގައި ކަށަވަރުކޮށްދޭނެކަމަށް އެ ޕާޓީން މީގެކުރިން ދެއްކި ވާހަކަތަކަށް ފާޑުވިދާޅުވެފަ އެވެ. 

Advertisement

މުހައްމަދު އިސްމާއިލް ވިދާޅުވީ، އެއީ އެމްޑީޕީން ރައްޔިތުންނަށް ދައްކާލި ދަޅައެއްކަމަށެވެ. ހައްގުތަކުގެ ވާހަކަދައްކައިގެން ވެރިކަމަށް އައިފަހުން ފެނިގެންދަނީ ޤާނޫނު އަސާސީން ރައްޔިތުންނަށް ލިބިދޭ ހައްގުތަކަށް އަރައިގަންނަމުންދާ މަންޒަރުކަމަށް އޭނާ ވިދާޅުވި އެވެ. 

މުހައްމަދު އިސްމާއިލް ވަނީ ރައްޔިތުންނަށް ޚިޔާލު ފާޅުކުރުމުގެ މިނިވަންކަންދޭން މި ސަރުކާރަށް ނުކެރޭއިރު، އެމީހުން ގެންނަން ބުނި ޑިމޮކްރަސީ އޮތީ ކިހާ ހިސާބަކުތޯ އައްސަވާ ސުވާލު ކުރައްވާފަ އެވެ. 

މުހައްމަދު އިސްމާއިލްގެ ފާޑުކިޔުންތައް ސަރުކާރަށް އަމާޒުކުރައްވާފައިވާއިރު، އިދިކޮޅުން ކުރަމުންދާ ސިލްސިލާ މުޒާހަރާތަކަށް ފުލުހުން ދަނީ ތަކުރާރުކޮށް ހުރަސްއަޅަމުން ނެވެ. އަދި މުޒާހަރާތަކަށް ހުރަސްއެޅުމަށް ހާލާތާއި ނުބައްދަލު ބާރުގެ ބޭނުން ކުރަމުންނެވެ. 

އިދިކޮޅުގެ މުޒާހަރާތަކުގެ ތެރެއިން މިހާތަނަށް 100 އަށްވުރެ ގިނަ މީހުން އެކި ފަހަރުމަތިން ހައްޔަރުކޮށްފައިވާއިރު، ހައްޔަރު ކުރާ މީހުންނަށް އިހުމާލުވާ މައްސަލަތަކެއް ވެސް ވަނީ ފެންމަތިވެފަ އެވެ.