ދިވެހި ސަރުކާރުގެ ކުންފުނިތަކާއި އަގު ހުރި އެސެޓުތައް ބޭރު ކުންފުނިތަކާއި ހަވާލުކުރުމުގެ ވިސްނުން ގެންގުޅެން ޖެހޭކަމަށް ރައްޔިތުންގެ މަޖިލީހުގެ މަތިވެރި ދާއިރާގެ މެމްބަރު ހަސަން ޒަރީރު ވިދާޅުވެއްޖެ އެވެ.
ޒަރީރު މިފަދައިން ވިދާޅުވެފައިވަނީ ސްޓްރެޓެޖިކް ޕާޓްނާޝިޕް އަދި ޕަބްލިކް ޕްރައިވެޓް ޕާޓްނާޝިޕްގެ ދަށުން އައްޑޫ އެއާޕޯޓާއި ރީޖަނަލް ސީޕޯޓު ޕްރައިވެޓައިޒް ކުރުމަށް ގޮވާލާ މަޖިލީހުގެ ހިތަދޫ ދާއިރާގެ މެމްބަރު އަހުމަދު ރަޝީދު ހުށައެޅުއްވި ޤަރާރަށް ތާއީދު ކުރައްވާ ވާހަކަދައްކަވަމުން ނެވެ.
ޒަރީރު ވިދާޅުވީ ސަރުކާރު ކުންފުނިތަކާއި، އެއާޕޯޓުތައް ހިންގުމުގެ ވާހަކައަކީ ދެއްކުންވެސް މަނާ ވާހަކައަކަށް ހަދާފައިވާކަމަށެވެ. އަދި އެފަދަ ވާހަކައެއް ދައްކައިފިނަމަ އެއީ ގައުމު ވިއްކާލުންކަމަށް އިދިކޮޅު ފަރާތްތަކުން ބުނަމުންދާކަމަށް ޒަރީރު ވިދާޅުވި އެވެ. އަދި އެކަމުގެ ސަބަބުން އެފަދަ މަސައްކަތްތަކަށް ހުރަސްއެޅޭކަން އޭނާ ފާހަގަކުރެއްވި އެވެ.
"ދުނިޔޭގެ އެންމެ ކާރުބާރު ބޮޑު އެއް އެއާޕޯޓު ހިރިތަރު އެއާޕޯޓުވެސް އެވެސް ބޭރުބަޔަކު ކުއްޔަށް ނަގައިގެން ހިންގަމުން ދާ ތަނެއް. އެހެން ނަމަވެސް އަޅުގަނޑުމެންގެ ތެރޭގައި ދެން އިދިކޮޅު ފަރާތްތަކުން ނިކުމެ ގައުމު ވިއްކާލީ، ހަނާވަނީ.. ފަނާވަނީ.. މި ޝުއޫރުތައް މުޅި ޕަބްލިކުގައި ފާޅުކޮށް ރައްޔިތުންގެ މެދުގައި އެ ދަނީ ނަފްރަތު އުފައްދަމުން"
މަޖިލީހުގެ މަތިވެރި ދާއިރާގެ މެމްބަރު ހަސަން ޒަރީރު
ޒަރީރު ވިދާޅުވީ ދިވެހި ކުންފުނިތައް ބޭރު ފަރާތްތަކަށް ދިނުމާއި ގުޅޭގޮތުން ގެންގުޅޭ ވިސްނުން ބަދަލުކުރަން ޖެހޭކަމަށެވެ. ދިވެހި ރާއްޖެ ނޫނަސް ވަރަށް ގިނަ ގައުމުތަކުން އެފަދައިން ކަންކަން ކުރާކަމަށް ޒަރީރު ވިދާޅުވި އެވެ.
އެހެންކަމުން، އެ ވިސްނުން ބަދަލުކުރަން ޖެހޭކަމަށް އޭނާ ވިދާޅުވި އެވެ.
"ރާއްޖޭގެ ކުންފުނިތަކާއި އެހެނިހެންވެސް ވެލިއުބަލް އެސެޓުތައް އަޅުގަނޑުމެން ބޭނުންކޮށްގެން ބޭރުގެ ފަރާތްތަކާއި ގުޅިގެންވެސް އަދި ރާއްޖޭގެ ކުންފުނިތަކާއި ގުޅިގެންވެސް އަޅުގަނޑުމެން އެބަ ޖެހޭ އެކަން ކުރަން. ބައެއް ފަރާތްތަކުން އެބަ ވިދާޅުވޭ ތިމަންނަމެން ބޭނުންވަނީ ހަމައެކަނި ދިވެހި ކުންފުނިތަކަށް ދޭން. އަޅުގަނޑު ހިތަށް އަރާ ކިހެނެއްބާއޭ އަޅުގަނޑުމެންގެ ވިސްނުމަށް ވެފައި މި ހުރީ؟ އަޅުގަނޑުމެންގެ އަތުގައި އެފަދަ ބޮޑެތި ކުންފުނިތައް ނެތިއްޖެއްޔާ ދެން އަޅުގަނޑުމެން ޖެހޭނީ ބޭރާ ދިމާލަށް ދާކަށް ނޫންތޯ؟ "
މަޖިލީހުގެ މަތިވެރި ދާއިރާގެ މެމްބަރު ހަސަން ޒަރީރު
ޒަރީރު ވިދާޅުވީ ސަރުކާރުގެ ކުންފުނިތައް ޕްރައިވެޓައިޒްކޮށް ބޭރު ފަރާތްތަކާއި ހަވާލުކުރުމުން އޭގެ މަންފާ އެމްޑީޕީގެ ފުރަތަަމަ ވެރިކަމުގައިވެސް ލިބިފައިވާކަން ފެންނަމުންދާ ކަމަށެވެ. އެހެންކަމުން، ކުރިއަށް އޮތް ތަނުގައިވެސް އެކަން އެ އުސޫލުގެ ތެރެއިން ކުރަން ޖެހޭކަމަށް މެމްބަރު ޒަރީރު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
