އައްޑޫ ސިޓީ ތަރައްގީކުރުމަށް އެންމެ ރޭވުންތެރިކަމާއެކު މަސައްކަތް ކުރަމުންދަނީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ސަރުކާރުން ކަމަށް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު އަދި އެމްޑީޕީ ޕާލިމަންޓްރީ ގްރޫޕްގެ ލީޑަރު މުހައްމަދު އަސްލަމް ވިދާޅުވެއްޖެ އެވެ. 

ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަވަމުން އަސްލަމް ވިދާޅުވީ އެއާޕޯޓު ތަރައްގީ ކުރެވޭނީ ފަތުރުވެރިކަން ފުޅާކުރެވިގެން ކަމަށެވެ. އެގޮތުން އައްޑޫ ސިޓީގައި ފަތުރުވެރިކަން ފުޅާކުރުމަށް ސަރުކާރުން ގިނަ މަސައްކަތްތަކެއް ކޮށްފައިވާކަމަށް އަސްލަމް ވިދާޅުވިއެވެ. އަދި އެނާގެ ވާހަކައިގައި ޚުލާސާކޮށް އެ ކަންކަމަށް އަލިއަޅުވާލެއްވި އެވެ. 

އަސްލަމް ވިދާޅުވީ ޝަންގްރިއްލާ އަލުން ހުޅުވުމަށް ސަރުކާރުން ކުރަމުންދާ މަސައްކަތާއި، އައްޑޫ ސިޓީގައި ޓުއަރިޒަމް ޒޯނު ހުޅުވުމަށް ކުރާ މަސައްކަތްތަކަކީ ފަތުރުވެރިކަން ފުޅާ ކުރުމަށް ކުރެވޭ މުހިންމު މަސައްކަތްތަކެއް ކަމަށެވެ. 

އޭގެ އިތުރުން އައްޑޫ ސިޓީ ހިތަދޫ ވިޔަފާރި ބަނދަރު ތަރައްޤީ ކުރުމަށް ބޭނުންވާ 170 މިލިއަން ރުފިޔާގެ ތެރެއިން 40 މިލިއަން ރުފިޔާ މި އަހަރު ތެރޭގައި ހަމަޖެހޭނެ ކަމަށް އަސްލަމް ވަނީ ވިދާޅުވެފަ އެވެ.

އެކަންކަން ފާހަގަކުރައްވާ އަސްލަމް ވިދާޅުވީ މި ސަރުކާރުން އައްޑޫ ސިޓީ ތަރައްގީ ކުރަމުންދަނީ ޕްލޭނެއްގެ ދަށުން، ވަރަށް ރޭވުންތެރިކަމާއެކުގައި ކަމަށެވެ. 

އައްޑޫ ސިޓީ ތަރައްގީ ކުރުމަށް މި ސަރުކާރުން ކުރާ މަސައްކަތްތަކުގެ ހެޔޮ އަސަރު މުސްތަގުބަލުގައި ރައްޔިތުންގެ ދިރިއުޅުމަށް ކުރާނެކަމަށް އަސްލަމް ވިދާޅުވިއެވެ.